السلام عليكم و رحمة الله و بركاته ,
أهلاً أخواتي الغاليات الحبيبات الطّيبات ,, ^_^ ,, العفيفات المسلمات ,,
بالبداية حبايب قلبي .. أنـا حبيت أحط هالصورة لأن نصيحتي مطلعتها من قلبي آللي يحبكن و يبي لكن الخير
و أتمنّى تعذروني لو أطلت في النصيحة و فصّلت في بعض الأمور لأن والله الشي آللي جالس يصير خطير و ما ينسكت عليه
و لعل صدوركن و قلوبكن الطيبة الخيّرة تتسع للي حابة أقوله ,
يا بنات أو بمعنى أدق ( يا مسلمات )
أفعالنا أو بعض أفعالنـا بصراحة .. ما تدل أبدًا على محبّتنا لـ ربّ العالمين جلّ في علاهـ !!
الحين راح تفهمون أنـا ليه قلت كذا ,
:
افرضي يا الغالية الطّيبة إنّك ( أستاذة ) في مدرسة ,, و عندك بالصّف بنت قليلة أدب ما تحترمك !!
تتكلم و تسولف أثناء الشرح .. تآكل و تلعب و تحوس و مسوية إزعااااج
وش رايك فيها ؟ وقحة و قليلة أدب صح ؟
طيب افرضي لو تشوفين طالبات يحبونها و يكلمونها و يسولفن معها
و فوق كل ذا
وش موقفك من هالطّالبات ؟ قليلات أدب مثلها صح ؟ ما فيه فرق !
و يمكن هن أشد بعد !!
يمكن بتتسائلين وش آللي بيني و بينهن حتّى يشكرون الطّالبة الوقحة على آللي تسوّيه فيني ؟
و يمكن تتألّمين أكثر و أكثر لمّا تتذكرّين إنّك سبق و كرّمتِ هالطّالبات في يوم من الأيّام و أعطيتيهن هدايا و أكرمتيهن بالدّرجات
و بالأخير يسوّن بك كذا ؟ هل هذي جزاتك ؟
أنـا يا الغالية الطيبة أبيك تتفكّرين بإحساسك هنــا ,, بهذي اللحظة ,, و تتصوّرين الموقف الآن !!
لو فعلاً كنتِ مدرسّة و فيه طالبة تأذّيك و البنات يشكرونها على آللي تسوّيه فيك ,,
مين آللي راح يعوّر قلبك أكثر ؟
إذا ذيك البنت يعني أمرها منتهي ..
البنات الباقيات ليه يشكرونها على وقاحتها معي و أنـا آللي أعطتيتهن هدايا و رفعت درجاتهن ؟
يمكن أختي الغاليـة الحبيبة الطيبة ما تنامين الليل من القهر !! لأنوهـ شعور مؤلم و قوي و قاسي بالحيل !!
هل هذي جزاتي ؟ أكرمهن و كذا يتعاملن معي ؟
أحس ودّك تقولين : والله ما هن بـ كفو إنّ الواحد يكرمهن !! صح ؟
بالضبط يا الحبيبة الطيبة هذا آللي أنتِ جالسة تسوّينه مع كل شخص يُبارز الله بمعصية من المعاصي !
تشوفين بنت حاطّة مقطع لرقص و أغاني ( يعني تعصي الله ) تروحين تردّين عليها و تشكرينها !
تشوفين بنت حاطّة صور نساء ( يعني تعصي الله ) تروحين تشكرينها و تردّين عليها و لا بعد يمكن تقولين لها ( لا عدمنا جديدك ) !
يعني يللا بعد نبي زووود إذا عندك لا تقصرين !
و حتّى تستشعرين وقاحة الموقف أكثر :
نرجع للطّالبة آللي من شوي .. البنات ما هن بجالسات يشكرنها على آللي تسويه فيك و بس ؟
لا ,, جالسات يشكرنها و يقولن لها : يللا بعد إذا عندك حركات زود لا تقصرين !
سبحان الله !! وش هالعداوة آللي شايلاتها البنات في قلوبهن عليك ؟
حبيبة قلبي الطيبة الغاليــة ,, ترى هذا آللي حنــا جالسين نسوّويه مع رب العالمين !!
ما فرق يا الغاليــة !!
لمّا نطلع مجمّعات و نشوف مغنّي و إلا ممثل ؟ ننهبل !! نطير !! نشوفه شرف و عزّ إننا شفنا ممثل على الحقيقة !!
و نروح له ركض - نسأل الله العافيــة - حتّى نسلّم عليه .. و نصوّر معه بعد !!
ليــه طيّب ؟ مو هذا البني آدمي عاصي لرب العالمين !! مهنته الأساسيّة عصيان الله عزّ و جل !
هالشّخص فتن الملايين من النّاس ,, هالشّخص تسبب في إلحاق الفساد بـ كل بيت و كل بيئة و مجتمع !!
مو هو مغنّي ؟ و الأغاني حرام و إشاعة للفسق و الفجور ؟
مو فلان أو فلانة ممثل أو ممثلة أو إعلامية سفور أو متبرّجة أو عارضة أزياء ( يعني عُصاااااة ) و آللي يسوّنه يغضب ربّ العالمين ؟
أجل وشّوله لمّا نشوفهم قلوبنا تطير و نحس الأرض ماهيب شايلتنا من الفرحة ؟
و نررررركض ركض حتّى نلحق نسلّم عليهم و ناخذ تواقيعهم أو نصوّر معهم ؟
لهالدّرجة عاجبنا إنّهم عُصاة الله ؟ لهالدّرجة ما فيه احترام لرب العالمين ؟
لهادّرجة انعدمت الغيرة على الدّين ؟
تشوفين شخص عاصي لربك و تروحين تودّينه و تسلمين عليه و تشكرينه على سواته مع رب العالمين ؟
الشّكر يا قلبي مهوب شرط بالكلام !
الشكر يكون بأفعالك لمّا تروحين تسلمين عليه و تتصوّرين معه !!
ترى هذا يغني عن ألف شكر على فكرة !!
أنتِ مهوب جالستن تشكرينه و بس .. أنتِ تشجعينه و تطالبينه بالمزيد !!
و بعد هذا لنا وجه نقول إننا نحب الله جلّ في علاهـ أكثر من أنفسنا ؟
حبيبة قلبي وين إيمانك و حبّك الله آللي عنه تقولين ؟
على أيش تقولين إنك تحبّين الله و أفعالك أو بعض أفعالك نهااائيًا ما تدل على إنّك تحبّين الله ؟
الموقف هذا ,, ينطبق عليه قول الله تعالى جلّ جلاله :
{ وَمِنَ النَّاسِ مَنْ يَتَّخِذُ مِنْ دُونِ اللَّهِ أَندَادًا يُحِبُّونَهُمْ كَحُبِّ اللَّهِ
وَالَّذِينَ آمَنُوا أَشَدُّ حُبًّا لِلَّهِ
وَلَوْ يَرَى الَّذِينَ ظَلَمُوا إِذْ يَرَوْنَ الْعَذَابَ أَنَّ الْقُوَّةَ لِلَّهِ جَمِيعًا وَأَنَّ اللَّهَ شَدِيدُ الْعَذَابِ }
إيــه حبيبة قلبي ( يحبّونهم كـ حب الله ) لا تستغربين !!
لو حنـا نحب الله أكثر .. والله ما كان هان علينا إننا نسلم أو نود شخص يعصي الله جلّ جلاله !
يعني الطاّلبات آللي بالمثال فوق لو يجونك و يقولن لك ترانا نحبّك يا أبلة !
هل بتصدقينهن ؟
ذولا كذّابات و منافقات !!
لأن لو يحبّونك فعلاً ما راحن و شكرن البنت الوقحة آللي جالسة تأذّيك و شجّعنها و طلبن منها ( المزيد ) !
آللي يحبّك يحرص على رضاك ,, و يحب الناس آللي تحبّك مهوب يشجّع الناس على أذيتك و يشكرهم !!
أنـا ما أقول لك روحي تهاوشي مع العصاة و سوّي مشكلة و نفريهم من الدّين !
أنـا أقول لك انكري المنكر و فعّلي مبدأ النصيحة لا ترضين بآللي جالس يصير !!
انكري ,, تحرّكي ,, تكلّمي
و جادلي بالتي هي أحسن ,,
سوّي لك شي يرفع منزلتك عند رب العالمين !! سوّي شي يثبت إنّ الدنيا ما زالت بخير !!
خليني أقول لك وش أنتِ بأبسط موقف :
لو تهاوشتِ مع وحدة من البنات و تخاصمتِ معها ,, و كانت هالبنت ظالمتك !!
و شفتِ صديقاتك ( آللي ما لهن دخل بالسّالفة ) و لا لك أي ملكيّة عليهن إنهن يكلمنها و يحبّن البنت آللي ظلمتك و أذّتك ..
يبي يصير بـ خاطرك و بتزعلين !! صح ؟
بتقولين صديقاتي المفروض يدافعن عنّي و ينصرنّي مهوب يجلسن مع عدوتي آللي ظلمتني !! صح و إلا لأ ؟
هذا و أنتِ ما تملكين صديقاتك ! إن جيتِ للصدق ترى صديقاتك أمرهن لله عزّ و جل مهوب أمرهن لك أنتِ !!
يعني أنتِ ما تتحكّمين فيهن و لا تفرضين ملكيتك عليهن !
مع هذا بتتضايقين إذا شفتيهن مع عدوتك أو إنسانة مأذّيتك !
فما بالك بربّ العالمين جلّ جلاله آللي خلقنا و قلوبنا و أرواحنـا ملك له و كل أمرنـا و ما فينا يعود له وحدهـ فقط سبحانه ؟
فهل حنــا فعلاً نحب ربّ العالمين ؟
و هل حنــا فعلاً يغضبنا إننا نشوف شخص عاصي و نروح ننصحه و نكلمه ؟
و إلا نخلّيه على كيفه يعصي ربي ما يعصيه هالشي ما يحرّك فينا شعرة ؟
و إلا نشكرهـ و نشجعه على آللي يسوّيــه و نطالبه بالمزيد ؟
و عشان تعرفين إذا أنتِ فعلاً تحبّين الله عزّ و جل و هو عندك فوق كل شي و أهم من كل شي مهوب كلمات جالسة ترددينها بلا يقين أو شعور
إذا شفتِ وحدة غلطت أو عصت الله عزّ و جل ,, مثلاً هنـا في المنتدى ,,
حطّت صور نساء أو أغاني أو مقاطع موسيقية ,, شوفي نفسك و رغبتك في نفسك ..
هل ودّك تنصحينها أو لا ؟ اسألي نفسك بكل صراحة و صدق !!
و إذا كان ودّك تنصحينها و تنكرين عليها ,, هل راح يتطوّر هذا الشّعور إلى الإنكار فعلاً ؟
يعني بتروحين تنصحينها على الخاص أو في الموضوع نفسه ؟
و إلا بتسكتين و لا كأن شي صار و تكتفين بالإنكار القلبي ؟
لنفرض إنكّ لا كذا و لا كذا ,, لنفرض إنّك إنسانة انعدم حب الله في قلبك ( و أنتِ مانتيب حاسّة ) و يا كثر آللي كذا
آللي يقولون نحب الله عزّ و جل لكن إن جيتِ لأفعالهم فهي بصراحة ما تدل على إنهم محبّين لله عزّ و جل !!
تدل على أشياء ثانية و هم أعرف بها !
لنفرض هالإنسانة شافت وحدة على غلط و تركتها و ما نصحتها ,, و قالت أنـا وش علي منها ؟
و لنفرض لو كانت هنــاك جائزة مُترتّبة على النّصيحة ,, يعني مثلاً لو نصحتِ هالبنت لك ألف ريال أو ألف دينار أو ألف درهم !!
بتنصحها و إلا ماهيب ناصحتها ؟ لا والله بتنصحها بالثلاث !!
يمكن تجلس طوّل الليل سهرانة و تفكّر كيف راح تنصحها و بأي أسلوب حتّى تحصل على جائزة الألف دينار أو الألف ريــال هذي !!
هذا وش معناهـ ؟
معناهـ إنّك إنسانة تفضّلين نفسك على كل شي ,,
إنسانة يوجد من أفعالك ما يدل على إنّك تحبين نفسك أكثر من رب العالمين !
إنسانة تقدّم مصلحتها و أغراضها الشّخصية و حقوقها على حق رب العالمين جلّ جلاله !
و فيه ناس ,, يا ليتهم بس كذا ,, لا ,, يعني ما تنصح ,, و لا تبي غيرها ينصح !
لمّا تشوف بنت تنصح الناس تروح تعصّب و تهاجم و تقول : وش دخّلكم بالنّاس ؟ هذي حريّة شخصيّة !!
كل إنسان يسوّي آللي يبيه ما أحد له دخل !!
>> و ذولا طبعًا آللي هم الليبراليّة أو من تطبّع بأخلاقهم النجسة ..
هم آللي يبون يطبقون مبدأ الحريّة على حساب الدّين و الأخلاق و المبادئ و القيم الحميدة ,,
و يا ترى أيش موقف القرآن من ذلك ؟ آية بسيطة توضّح ذلك :
قال تعالى : { وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ }
قال ( ليعبدون ) ,, ما قال : خلقتهم و هم بكيفهم !! أحرار !! آللي يبي يعبدني يعبدني و آللي ما يبي بكيــفه !!
لا !! بل رتّب على عبادة الناس له ( جنّة عرضها السّموات و الأرض ) .. و رتّب على كفرهم به ( خلودًا في نار جهنّم )
مشكلتنا فاهمين معنى الحرية غلط !!
الحرية آللي تحلل حرام و تُحرّم حلال هذي ماهيب حريّة يا أخيتي الحبيبة الطّيبة !
هذي اسمها ( تجرّؤ على الدين ) ..
و واجبك لمّا تشوفين شخص يتجرأ على فعل الحرام إنّك تنكرين و تتحرّكين ما تآقفين ساكتة و لا كأن شي صار !!
و إلا ليــه هالحديث الشّريف ؟
عن أبي سعيد الخدري قال :
سمعت رسول الله صلى الله عليه وسلم يقول :
( من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان ) رواه مسلم .
فهل يا أخيتي الحبيبة الطّيبة ,, المسلمة الغااااليــة ,, أفعالك تدل على محبّتك لرب العالمين ؟
كل وحدة فيــنا تراجع نفسها و كل شي هي تسويــه ,, بالنّت و برّة النّت و بأي محيط ثاني ,,
و الموضوع هذا يا حبايب قلبي أوجّهه لـ نفسي قبل لا أوجّهه لأي أحد ثاني ,,
و أسأل الله أن يكون حجّةً لي لا علي يوم أن يُبعث من في القبور
بارك الله فيكن حبيبات قلبي و أحسن إليكن ,,
آللي تبي تنشر الموضوع ( برود كاست ) أو بأي مكان ثاني يا ليت والله من دون لا تستأذن و لا تذكر اسمي ^^
المووووضوع منقول من : ( ترانيم القصيم ) ^__^
ولنبدأها حملـة ( لنأمر بالمعروف وننهى عن المنكر )
:time: