السلام عليكم ورحمة الله
كيفكم يا صبايا :27: وحشتوني من فترة ما دخلت القسم الحلو هذا
بس عندي ملاحظة من اول لاحظتها وكنت ناوية اقولها ونسيت لكن صار موقف فكرني وقلت خليني انبهكم عشان ننتبه وما ننجرف
احكيكم الموقف اللي صار بعدين بنبهكم
رحت عند صحبتي ليا فترة طويلة ما زرتها من زماااااااان بعد ما جلسنا واتونسنا الا قامت قالتلي شوفي انا انظم بيتي كله بيدي وجلست توريني اختراعاتها :35:في فكرة فكرتين حلوة يعني زي مثلا علب الصلصة القزاز للبهارات لكن الباقي :angry:مجرد انه تبغى تخترع اختراع لدرجة انه تخزن كل علبة تدخل بيتها كل كرتونة البيت اتملى قرمبع كل زاوية فيها قربوعة للتنظيم كل غرفة فيها كرتون مرقع بورق تغليف وجواته قربوعات قربوعات
اي تنظيم هذا هذا اسمه فن التخريب والقربعة والدفس اللي ماله داعي وقلتلها في وجهها :27:لانه انا وياها ما بينا مجاملات ولانكم اخواتي واحبكم رح اقولكم انه احنا صرنا كذا
معروف الوحدة فينا تحب تعمل الشي بيدها وله متعة خاصة بس مو لدرجة الهوس
يعني مثلا اعملي شموع بيدك اعملي لوحات حركات حلوة يعني اكسسوار للبيت يزينه لكن مو لدرجة انه حتى كراتين التايد ما عاد نرميها كل شاردة وواردة نرفعها
خلونا نحسبها
لو انا جيت ابغا اوفر مثلا اشتريت ورق تغليف بخمسة ريال وغرا مسدس الوحدة الحبة بريال حتحتاجي حبتين ثلاثة صارو كم 8 ريال وشرايط للتزيين ب4 ريال صارو كم 12 ريال وجبت كرتون زايد عندي من شي اشتريته رح اقعد نص ساعة احوس عشان ارقعه واحط جوا اغراضي رح افرح انه سويته بيدي لكن هل شكله فعلا جميل بعد هذا التعب كله
للأسف لا
ولو اني رحت اشتريت سبت حلو ب5 ريال يطلع اجمل وفي الحقيقة اوفر وكمان عمره اطول من عمر الكرتون
كلنا نحب التنظيم والتنظيف بس لا نخلي حبنا هذا يصير هوس يبعدنا عن التنظيم الحقيقي وانا اكلمكم واكلم نفسي معاكم لانه انا مجنونة اختراعات :35: لكن في اماكن اقول لنفسي ستوب هنا وصلتي لمرحلة القرمبع
واتراجع :angry:
خلاص عندك سرير قديم لا تقلعي خشبه وتخترعي اختراع اتصدقيه لحارس العمارة اتصدقيه لاي احد محتاجه تاخدي اجر
ترى شدة التنظيم تقلب بخل على المدى البعيد بالاصح مو شدة التنظيم لانه التنظيم هو عكس التكديس اللي البعض بيسويه تلاقي ست البيت تكدس كل وارد
وحدة اعرفها حتى علب البرنقلز ما ترميها تحط جوتها الكلبسات تقول لا انا انضفها تمام لكن شعور بناتها ريحتها كتشب :mad: وقلتلها عشان لا احد يضحك عليها حرام نغش بعض
عندك طاولة مكسرة لا تغطيها بشرشف وترقعي فوقها فازة لانه بتبان مو حلوة وبيكون شكلها مخرب المكان خلاص اتكسرت حطيها قدام الباب حتلاقي ناس مساكين اخدوها يستفيدو منها ولا بيبيعوها احنا في جدة الحمدلله عندنا الحجات يشيلو دي الاغراض يفرحو فيها مرة يبيعوها بسوق المستعمل
دايما دايما في احد رح يستفيد من الشي الخربان فخدي فيه اجر بدال ما تحوليه لأنتيكة عجيبة
الكراتين ارررررررررررموووووووووووووها لا للكراتين وترقيع الكراتين بس كراتين الاحذية على الاقل مرتبة ولها غطا بس مو معناته كل ما اشترينا صندل رفعنا كرتونه شوفي عندك شي له وله مكان جوة الدولاب والا مكانه بيكون الزبالة خلو اركان البيت وزواياه نضيفة ومرتبة لا تعفسو الدنيا تحت مسمى التنظيم
لاحظت انه القسم هذا كمان باقي شوية ويتحول لقسم الاشغال اليدوية ما صار قسم تنظيم ياريت تتنبهو
لو فعلا فكرة مبتكرة والله ياريت كلنا رح نستفيد زي ما شاء الله فكرة العملاق الاخضر في التواليت وافكار كتيرة هنا حلوة
كمان ملاحظة ثانية حبيت اقولها مالها علاقة غير انها فقط مو حلوة
ابعدو قدر المستطاع عن الورد الصناعي خصوصا اللي لونه احمر وابعدو عن ورق الشجر الصناعي لانه مو حلو ويجمع الغبار
سبحان الله الشجر الطبيعي يعطي البيت حياة ورونق عكس الصناعي يشيل من بيتك جماله
واذا كان لابد اخلطو ما بين الطبيعي والصناعي جيبو شتلة صناعية تكون متقنة وعززو نفس المكان بشتلات شجر طبيعي ساعتها يكون اوكي
صدقوني هذي الاشياء تخرب بيوتنا واحنا مو حاسين

om abody @om_abody
محررة
يلزم عليك تسجيل الدخول أولًا لكتابة تعليق.

عبايه فوق الراس
•
جزاك الله خيرا



كلامك مظبوط ولا اقعد ساعه احوس في كرتون علشان احط فيه اغراض ولا احلى من سلة فيها اللي تبغين وتدوم ولو تغبرت تتنظف
يعطيك العافيه بلا كراتين بلا قرنبع
يعطيك العافيه بلا كراتين بلا قرنبع

د.رنا
•
تمااااااااام المهم كل فتره الوحده تتخلص من اشياء قديمه مو غلط لو جددت واستخدمت اعاده تدوير اشياء عندها لكن القانون المريح بالبيت كل ما عملت شي جديد لازم تتخلصي من شي قديم عشان البيت ما يصير زحمه وممكن تعمل اشياء وتهديها وخاصه لو لقت شي فكره مفيده ولو اتصدقت فيه وهو لسه ما انتهى عمره افضل مو تنتظر الوحده الغرض لما ينتهي امره وتقول اتصدق فيه وتنسى انها تضعه في يد الله قبل يدي المتصدق عليه جزاك الله خير وجعله في ميزان حسناتك
الصفحة الأخيرة