كيفكم ياحوائيات مع العطله والصيف ذو الحر القاتل:06:
وطبعن ماننسى هادا موسم الزواجات
انا عندي شوية اشياء مضايقتني بنظام اعراسنا بالسعوديه راح ابداء اسردها وقبل مااسردها موضوعي من اجتهادي الشخصي غير منقول اتمنا محد يحدفو او ينقلو لمكان تاني عشان تتم الاستفادة وكمان ابغا تجاربكم تسردوها معايا عشان ينشط الموضوع
حاكون صريحة معاكم نظام افراحنا جدا ممل ممل ممل ممل ممل وتكاليف غاليه على الفاضي لعدة اسباب :
1_ اولا نظام الزفة ههه محبط جدا العروسه ماتطلع الااخر الليل ومدة الزفه مو اكثر من 30 او ازا كترت 40 دقيقه ويكون فستانها مو اقل من 10 الالاف ريال يعني حرام والله تكلفه على الفاضي وبالنهاية اتحدا لو احد من المدعوين بعد العشا يتزكر موديل الفستان لسبب بسيط انهم ماشافوها الا نصف ساعه او اربعين دقيقه
2- الدقاقه وماادراك مالدقاقه اقل واحده تاخود 7 الالاف ريال والصوت بشع والحمدالله من عدل الاغاني اللي حتغنيها يعني من غير زعل مافي دقاقه سعوديه يستاهل ادفع عليها مبلغ 1000 مو 7000 ولا بعضهم بيبالغ بياخود 12 و14 الف لمدة 3 الى 4 ساعات وبصراحه انا كمعزومه اشعر بالممل نفسي اسمع اغاني عراقي ولبناني ومصري ومغربي وخليجي واغاني اجنبيه مو بس دق خليجي وياريتها متقنه الايقاع الا جدا سيء
3_ البوفيه ماعمري دخلت بوفيه عجبني امرهم غريب مجتمعنا يالبوفيه الواحد يشمل جميع الحضارات الذبايح اللي تكلفتها الشي الفلاني غير اكل هندي على صيني على شامي على مغربي على ماكولات بحريه بصراحة نظام مجاعه مافي تنسيق وياحرام تلاقيهم دافعين مو اقل من 15 الى 20 الف<<<والاكل وانتم بكرامه خساير على الفاضي واتحدا لو احد خرج يمدح بالاكل ويفيض ويزيد كتير من الاكل
4_ التوزيعات انا ماني ضد التوزيعات ازا كانت حتشمل عدد المدعوين فردا فردا لاكن اللي لاحظتو بيسير العكس بيجبو توزيعات فخمه جدا تكلفة الواحدة مو اقل من 15 الى 10 ريال وماياخود منها الا 40 فرد من المدعوين وناس ماتاخود تتفرج بس انا اعتبر فيه قلة للذوق والاتيكيت العام طالما اللي ربنا كرمكم تصرفو على التوزيعات مبلغ كبير بحبوحها شويه وخلو جميع المعازيم ياخودو او من اصل الشي لاتجيبو توزيعات والشي اللي يضحك بالموضوع التوزيعات وسطها حبة شوكولا فاخره من باتشي ولا شوكولاين اعطيهم 5 دقايق فقط وتلاقي 20 % بالمية من المدعوين اللي معاهم التوزيعات فكو العلبه واكلو الشوكولا ورمو العلبه بوسط القاعه
5_ قاعة الحفلة مو اقل من 15 الف سعودي طبعن خير الاضافات التانيه زي الكوشه والمدخل خير فين عايشين ندفع 15 الف ريال او اكثر عشان اعمل فرح وبالنهاية يطلع الفرح ممل والله لو كانت القاعه ايش لو حنمشي باعراسنا بالسلبيات اللي ذكرتها فرح فاشل وديون وتكلفه على الفاضي
6_ اغرب شي عندنا بيسير غياب اهم شخصية محوريه بحفل الزفاف الاهيا العروسه مسكينة تكون محبوسه بالجناح الملكي وماتدري ولاعن شي لا تسمع الدقاقه ام صوت نشاز ولاتشوف التوزيعات اللي بتتوزع ولا تدري عن موديل وتصميم القاعه ولا حاجه بينما يكون العريس دافع مو اقل من 40 الف لتكلفه الفرح وهيا ماتنبسط وترقص وتحلل الفلوس مايبدا ظهورها الا اخر الليل نصف ساعه وتروح ولا ازيدكم من الشعر بيت تكون حايسه بزفتها والاضواء خافته يعني منجد ظلم والله حرام فلوس بتنرمي على الفاضي بينما في الدول العربيه المجاورة العروسه تحلل القاعه والفستان والكوشه مسنتره من اول الحفل بالقاعه وترقص منجد هادي اعتبرها عروسه عندكم قناة مسايا خير دليل شوفواكيف العرايس محللين فساتنيهم ومكياجهم وقاعتهم وكل شي
7_ توقيت الافراح عندنا بصراحه مايتفق مع مجتمعنا المحافظ يعني اغلب المناطق تبداء الافراح عندهم 11 او 12 وتنتهي بعد الفجر والله اتحد لو العروسه لما رجعت مع عريسها للجناح ما فصخت فستانها ونامت من التعب
8_ عدد المدعوين انا اتفاجاء لما احضر فرح واحصل انو المدعوين يتجاوز عددهم ال 300 شخص وبعد الاحيان يوصل 500 فرد وتحصلي نصفهم ماهم من العيله ولا الاقارب عازمين الجيران وجيران الجيران وجيرانهم كل واحده جايبه صحبتها وجارتها لفرح البنت اللي معزومه عشانو وتلاقي لاصحبتها ولاجارتها تعرف البنت ولا اهل العريس من باب الفشخره مع انو في قاعده كل ماكتر عدد المدعوين زاد الصرف على البوفيه وكمية الاكل وبتزيد تبعات على دي الزياده
9_ سعر الفستان المبالغ بسعرو جدا جدا جدا وبالنهاية تلاقيها بعد شهر عارضتو للبيع طيب ليه من الاساس ورطتي نفسك فيه حرام تبيعي اجمل ذكرى للي ليلة العمر ماهو لو فستانها بسعر معقول كان خلتو وماباعتو
10 _ الدهب انا مستغربه في بنات بمجتمعنا تحط 3/4 مبلغ المهر بطقم دهب لزوم عادات وبعد فترة ماتلبسو لسبب يانو جاتها عين ولا حساسية من الاكسسوار وتضطر تبيعو فشخره على الفاضي مع انو في اشياء اهم من الدهب تحط ميزانيتها فيلو
هادي هيا الاشياء اللي مزعجتني كواحده بتحلم بليلة العمر
انا طبعن فكرت بالموضوع واتبحثت وشفت اغلب الاوربين والا مريكان ماعندهم دي الافكار الرجعيه اللي تفقر الواحد بالعكس هما ناس عمليين راح اقولكم كيف
نتكلم عن مكان اقامة الفرح ياجماعه اصحو تدفعو 15 الف ولا 20 الف على قاعه لساعات غيرو وانا عن نفسي جبت بدائل
الاستراحات اللي بمسبح مرت عليا استراحات تصمايمها جدا فخمه وحلوة ماتتجاوز تكلفتها ال 3000 ريال واطلاله بانوراميه على مسبح وهادا مايتوفر بالقاعات الكبيره
طبعن انتو اللي حتضيفو استئجار طاولات وكراسي اللافراح على حسب عدد المدعوين
في ناس ماتعجبهم الاستراحات
في حاجه احلا منها الشاليهات الخاصه بمسبح خاص وشاطيء رملي خاص المطله اطلاله مباشره على البحر طبعن دا خاص لسكان المناطق الساحليه افخم شاليه تاخديه 4000 الاف ريال فكره جديدة غير مستهلكه
ملاحظة : في حال توفر فيلا يفضل اقامة حفل الزفاف فيه بدل الاستراحه والشاليه لانو هادي البدائل خاصة للناس اللي بيتهم صغير ومافي مكان لاقامة حفله زفاف
نيجي للفساتين مو شرط انك تدفعي 10 الالاف ريال حق فستان بامكانك تلاقي نفس الموديل بسعر ارخص بحدود 2000 الى 3000لاتقولي مالقيت حلو والله السوق مليان بس مشكلتنا مانجري الا ورا الغالي والفشخره لزوم مظاهر
دورو بالنت حتلاقو فساتين اشكال والوان وباقل الاسعار وفي حالة ازا كانت المادية ماتسمح بشراء جديد يوجد الاستئجار فستان
نيجي للتوزيعات ازا الميزانية تسمح انو نجيب توزيعات الافضل انها ماتكون توزيعات اكل او توزيعات بداخلها شوكولا
الافضل انها تكون اشياء عمليه ومفيدة مثال
ملاحظة : هادي التوزيعات تعتبر غاليه نسبيا تتراوح سعرها 10 الى 15 ريال للواحده للبعض فالافضل يكون عدد المدعوين محدود على الاقارب والاصدقاء المقربين يعني بحدود 70 الى 100 شخص كحد اقصى لانو زي ماقولنا مو همنا العدد بل الكم بل بالكيف يكون عدد المدعوين قليل عشان مانتعرض للاحراج انو ناس تاخود وناس ماتاخود واللي ماعندهم ميزانيه للتوزيعات مو شرط يجيبو
بالنسبه للدقاقه الافضل توفير فلوسكم وتجيبو ديجييه يشغلك كل انواع الاغاني اللي بالموسيقى او بدون مع التحكم بعلو الصوت او انخفاضها والتحكم بنوع الاغاني يعني تحطي الاغاني علي كيف كيفك هندي خليجي مصري عراقي شامي مغربي الاسعار تتراوح من 800 الى 1000 حسب حجم السماعات وعددها سعر معقول ومنخفض نسبيا بالنسبه لسعر الدقاقه اللي تاخود مو اقل من 7000 ريال
البوفيه بدل مانخلط الحابل بالنابل ويسير البوفيه كانو مهرجان للماكولات العالميه نكون زي الاوربيين والامريكان يختارو نوع معين من المنيو مثال :يكون البوفيه اكل صيني فقط لاغير يعني بدون مفاطيح وخرابيط
مايكون مرا كتير الاكل ولاحجم الطاولة يكون البوفيه حجم معقول
والمنيو متنقي نقاوة
ملاحظه : في ناس يحبو يكون العشا تقليدي دبيحه في دي الحاله يكتفي فقط بالدبيحه او المفطح لاغير
نيجي لتوقيت الفرح يبداء من بعد صلاة العشا لحد 12 والساعه 12 يدخلو المعازيم يتعشو يسير الاستراحه او الشاليه يبداء يفضى من المعازيم والعريس يكمل فرحتو مع عروسته ويرقص سلو لحد مايقولو امين :35:
وعلى فكره في ميزة انو الفرح يبدا بدري وينتهي بدري عشان لما العروسه ترجع البيت مع عريسها يمديها تعمل برامج رومانسيه معاه لانو طاقتها مااستهلكت زي لما يكون الفرح ينتهي 4 الفجر ترجع البيت ماتشوف دربها
الدهب وطقم اللازوردي ولا داماس بامكانكم استبدالو بالدهب المقلد التاجرات بكل المنتديات يبيعو وازا كان التقليد درجة اولى محد حيعرف الفرق بينو وبين الاصلي الا الصايغ :35:
نيجي لنظام الزفه بدل مالعروسه تجلس محبوسه بالجناح حقها تحت نظام عادات وتقاليد ماانزل الله بها من سلطان تكون موجودة بكوشتها بعد اكتمال عدد المدعوين يعني تجلس ساعه فقط علبال ماتتجهز ويتبداء زفتها مافي احلا من العروسه تكون مع صحباتها وترقص معاهم ومع امها ومع اخواتها بجد تكون عروسه حقيقية الفرح مو بتكلفتو الفلانيه ولا اقامتو بالقاعه العلانيه مهما صرفو على الفرح ملايين تظل افراحنا ناقصه طالما العروسه تخرج اخر الليل
وبالنهاية ابغا تجاربكم وافكاركم الاقتصاديه لعمل زفاف بسيط وعصري وغير مكلف عشان نفيد الكتير واعتبروها صدقه جاريه فاللي عندها اسم محل يبيع فساتين رخيصه وحلوة تكتب اسمو او عنوانو او اي معلومه تفيدنا مهما كانت بسيطه اسرديها بموضوعي اتمنى محد يحدف موضوعي او يلغيه لانو من اجتهادي الشخصي وليس منقول وازا كان مكرر اعذروني والرجاء اللي حابه تنقل الموضوع لمنتدى تاني تذكر المصدر الكاتب والمنتدى الرجاء ماحلل ولا اسامح اللي ينقل بدون ذكر المصدر
وبالنهاية دعواتكم انو ربنا يجعلني من المقبولين ببعثة خادم الحرمين الشريفين للمرحله السابعه :27:
اختلف معك ببعض النقاط
يعني غير قاعات الافراح مايناسب مجتمعنا واصلا مافي مجال للمقارنه بينا وبين الامريكان والاروبين اولا الجو عندهم روعه وثاني هذول ماعندهم خصوصيه
البوفيه بالعكس حلو التنوع في ناس ماتحب الصيني مثلي:) وناس ماتحب اللحوم وناس ماتحب الماكولات البحريه يعني لمن يكون في كذا خيار افضل اماالمبالغه في الفستاين معك حق فيها والطقاقات كمان