افكار لفرز وتخزين الملابس الشتوية >> تفضلوا هذا وقتها

بسم الله الرحمن الرحيم


والصلاة والسلام على اشرف الانبياء والمرسلين

الايام هذي هي ايام فرز وتخزين الملابس الشتويه

والحين الدواليب مليانه ملابس شتويه شي منها مستهلك وشي ينفع للسنه القادمه وشي صغير ممكن يتخزن لطفل قادم

وشي ممكن يطلع للجمعيه الخيريه


اول شي جيبي اكياس وشنط سفر كبيرة ما تحتاجينها فترة الصيف او ممكن تشترين شنط رخيصة وكبيرة مثل اللي نشتريها للخدامات اذا جو يسافرون تكون من القماش

افرزي الملابس مثل ماصنفتهم في البدايه

الشنطه الاولى تكون للملابس اللي راح تحتاجينها السنه القادمه باذن الله لك ولاولادك وضروري تكون نظيفه ومكويه

الشنطه الثانيه تكون ملابس شتويه ممكن تحتاجينها بعد سنتين اوثلاث لطفل ثاني من اطفالك مثل جاكيتات رسميه

او بناطيل شتويه طبعا اكيد ما راح تخزنين في هالشنطه الا شي شبه جديد يعني مو مستهلك

وجيبي كيس كبير وحطي في جميع الملابس الشتويه اللي استهلكت او ما راح تحتاجينها وارسليها للجمعيه الخيريه

واذا كنت تعرفين عوائل محتاجه لها يكون افضل انك توصلينها لهم او تطلبين انهم يجون ياخذونها


المهم بعد مارتبتي الملابس في الشناط

راح اقولك على حاجه تحفظ ملابسكم من العث اللي يطلع في الصوف او من ريحة التخزين

الناس الحين يستخدمون النفثالين (السفنيك) عشان يحفظ الملابس من العث ومن ريحة التخزين بس اذا جاء بعد سنه وفتحتي الشنطه لازم تغسلين الملابس من ريحته اللي ماتنطاق


هنا بعطيك فكرة تريحك من غسلها السنه القادمة بإذن الله
وهذي الفكرة مشتركه مني ومن اختي

وهي تعرفين الجوارب السوداء اللي اسمها جورب الحشمه اللي نلبسه مع العبايه((نصيحه يا اخوات البسوا جورب الحشمه مع العبايه فتغطية القدم واجبه ترى عيون بعض الرجال ماترحم فلا تكوني مصدر للفتنه )) الجورب يكون قماشه زي الشيفون استرتش اكيد عرفتوه اللي يباع بالدرزن


كرتون خربزي او برتقالي


بعد فترة من استعماله ممكن يحبب(يطلع فيه كور صغير ) او ممكن ينشق شق صغير خليها لا ترمينها


جيبي صابون تايد او اي صابون مسحوق وحطي منه كميه ملعقه في الشراريب السوداء واربطيها وحطيها بين الملابس

فيه ناس يستخدمون صابون ممسك ويبشرونه ويباع منه في المحلات مبشور

لكن انا افضل التايد لانك لما تفتحين الشنطه بتحسين ان توك غسلتيها وريحتها نظافه

وهذي هي طريقتي المتبعه في تخزين الملابس

اتمنى تستفيدون منها

ترى انا اللي كتبتها بيدي ما نقلتها

لذلك اللي تقراها تدعي لي

بصلاح عيالي وثباتنا على طريق الحق في هذا الزمن اللي انقلبوا فيه الناس

يامقلب القلوب ثبت قلوبنا على دينك

رجاء اللي تقرا لاتبخل بالرد

وانا جاهزه للرد على اي استفسار


اختكم في الله

(الرزان)