السلام عليكم و رحمه الله و بركاته
لما تيجى تلاقى ورق كتتتتتتتتتير عندك اوعى ترميه هتقوليلى الحبر هقولك اقلبيه على ظهرة و بدل ما تحطى علبه المناديل كلها هتحطى طبقه على الورق لامتصاص الزيت
تانى حاجه يا فتوكاتى الصابون اة بواقى الصابون اييييييييييياكى ترميها هتخديهم و تحطيهم فى اللبس الشتوى بدل النافتالين و كمان تلمعى بيهم حلل الالوينيوم هتبرق معاكى و مقوليكيش عالريحه او تغسلى بيهم الحمامات
تالت حاجه ياقمرات الزيت اللى متبقى زيتى بيه الابواب اوعى ترميه و لو شاطرة اعملى بيه صابون
رابع حاجه بواقى الرز جمعيهم و اعملى رز بالباشاميل باخضار مش هيبان نوهائى
رابع حاجه جرابات النظارات اللى بتتقفل حطى فيها العملات هتكون منظمه بدل ما تتنتور
خامس حاجه و دى اتعلمتها من المنتدى اى ليمون خايفه يبوظ حطيه فى قوالب ثلج و عالفريزر لو اتزنقتى تلاقيه
سادس حاجه و انتى بتحشى المحشى و اتبقى خلطه يكون دايما عندك فلفل احشى الفلفل بيه و عالفريزر عدل وقت الزنقه يادوب تسويه ما بياخدش شوربه كتير و بيكون فله
سادس حاجه و حاجات كتير لما الاقى التقييمات بترف على عشان الموضوع يثبت بجد عندى افكار تحفه
المهم اولا لما تعملى مخلل و يزيد منك الميه بملح او خل تعملى ايه ترميهم ايييييييييياكى دول تغسلى بيهم الفراخ او تنقعى فيهم البطاطس عشان متسودش او الباذنجان
ثانيا لبس المدرسه متجبيهوش على قد العيل و فى نفس الوقت ميكونش اهبل و كبير جدا عليه انتى بالنظر كدة جبيه مثلا اكبر مرتين لو ابنك بيكبر بسرعه عشان لما يتغسل هيكش و يكفيه السنه الجايه ما انتى مش كل سنه هتشترى البيت اولى بحاجات ياما
ثالثا الكتب الخارجيه اوعى تبهدليها او ترميها اة المناهج بتتغير لكن افرضى ملقتيش الكتاب او اتاخر فى نزوله او السنه دى اتزنقتى فى الفلوس هتعملى ايه مش احسن من مفيش و كتب المدرسه كمان اللى فيها نحو و جرامر هيفيدوكى اوعى ترميهم
كمان العيش العيش دة كنز يا فتوكاتى بالنسبه للبلدى دة يتحمص و يتعمل فى الفته و لو كان فينو حمصيه و اطحنيه هيعملك احلى بقسماط
الاكياس ياسلام عالاكياس انا لما بشوفهم بحس ان روحى اتردت لى الاكياس بقا دى كنزززز اولا دى كلها تستخدميها انك تحطيهم فى الباسكت او لما تكونى جايبه فراخ و عيزة تكيسيها و طبعا انتى كدة كدة لما بتتطبخى الفراخ لازم تشطفيها الاول اكياس بتاعه البقاله بس اللى تحتفظى بيها بتاعه الخضار و كدة لا تترمى
الكرتون اى كرتونه عندك متطلعيش تجرى ترميها استنى ياختى متلهوجه ليه حطيهم فى قاع الزباله عشان لو الكيس اتخرم هى تمتص اى وساخه و تتغير بعد كدة
الاسكايب دة اختراع بيقلل فاتورة التليفون جدا يعنى امك اختك لو نفسك ترغى بالساعات كلميهم عادى لو عندك دى اس ال
الجنرال بتاع الارضيات انا عارفه ان فيه كتير من الشغالات بيحبوا يشربوة قصدى يستخدموة ادلق ادلقققققققققققق تعملى ايه تجيبى ازازة فاضيه و تخففيه ليها و تخصصى ليها الازازة و ممكن شويه خل و ملح من اللى اتبقوا عندك من المخلل فكراهم اللى قلت لك عليهم فوق
اللاولاد فى المدرسه كل يوم مصروف كتير طبعا و ميزانيه لوحدهم اعمليلهم مصروف اسبوعى يجيبوا اللى نفسهم فيه و ياريت لو كان من الكشك مش الكانتين و خليهم يكونوا مقتنعين ان هم كدة بيشتروا حاجات اكتر من الكانتين لانه غالى و جيبى كرتونه عصير فرج الله دة ارخص نوع تقريبا كل يوم علبه او من بسكو مصر هاتى علب بردة ياخدوا كل يوم حاجه المهم نوعى علشان ميزهقوش لكن لو طلبوا يشتروا من الكانتين لازم تديهم عشان بردة يحسوا انهم ادام اصحابهم فيسسسسسسسسسسين و لامور كتير تانيه
الطمى المغربى يا بنات اللى الكوافيرات بيعملوة ب 200 ج انا بعمله ببلاش تقريبا الليفه هاتيها ب 25 و الطمى ازازة كبييييييييييييرة ب 25 تقريبا على ما اذكر و عيشى حياتك
الفويل بردة دة ليه استخدامات رهيبه منها انك بدل ما تسيبى فوق الدولاب بتاع المطبخ مليان دهون و يغلبك فى التنظيف افرشى بالفويل و كمان فوق التلاجه و كل فترة غيريه
غطا الغساله دة غطى بيه غساله الاطباق و المجفف هيحافظ عليها لو حاجه ادلقت و تكون دايما نظيفه
النمل و الحشرات بدل ما تروحى تجيبى شركه نصابه تقولك نرش ب 500 ج لا انتى كل يوم لما تنظفى اغسلى الاماكن دى و خصوصا المطبخ و مدخل الشقه و الحمام بمطهر اى مطهر عندك و لو كان منتهى الصلاحيه بيكون مفعوله ضعيف بس هيشتغل خففيه و امسحى يا قطه
البيجامات الشتوى كلنا عارفين قد ايه هى غاليه ايه المشكله يعنى لما نجيب فردانى من تحت بنطلونات من بتوع الترننج و من فوق اى سويت شيرت قديم او حتى بتاع المدرسه القديم او تشترى جديد من بواقى التصدير العيال بتكبر و الهدوم كدة كدة بتصفر و تاكلها العته خلى الحسوكه دى لما يكبروا ووفرى الفلوس فى حاجات اهم
الفوط طبعا بردة مترميهاش لما تقدم و لونها يتبهدل امسحى بيها و خليها خيشه لغايه ما تقولك خللللللللللللللللللللاص انا دوبت بتنظف حلو
حاجه مهمه جدا بس لما الاقى التقييمات بترف اكتر على هدخل انام و اجى الاقى موضوعى ثبت يارب
اولاالمعجون بواقى المعجون اللى العيال بتفعصه اغسلوا بيه الحنفيات او شيلوا بيه الحبر من الحيطه
المخلل البيتى اوفر من اللى برة فى موسم الجزر و الليفت و الزيتون هاتوا كميه و خللوا و باقى السنه الخيار موجود و الارنبيط فى الشتا و البصل
صلصه الطماطم البيتى لا يعلى عليها هاتوها فى الرخص تعمل احلى صلصه و افيد انا ابنى مبقاش ياكل الخضار الا بيها اتودك بقا ههههههههه هيقرف مراته شكله
البهارات اة من البهارات هاتى شويه بشويه اطحنيهم و اخلطيهم ببعض و خليهم عندك بدل الخلطات القليله و بتكون غاليه
لو بتحبى تلبسى ماركات عارفه السراج مول فى محل ابو علاء بيبيع الاحذيه ماركه السنه اللى فاتت بنص التمن تبقى لبستى حاجه محترمه و فى نفس الوقت مش غاليه و متينه
النسكويك اعملى بيه احلى ميلك شيك لو العيال طلبوة
لما تحبى تشترى لبس و انتى مش مزنوقه روحى هاتى الصيفى فى اخر الموسم و العكس تكون الحاجه عليها خصم
السلاطات اتعلمى تعملى كل انواع السلاطات يغنيكى عن اكل برة و العيال تهيص
بواقى الاكل لو مش عيزة تحطى عليه بشاميل بعد مرتين مش اكتر من الاكل حطيه فى اكياس نايلون و عالفريزر و لما تيجى شغالتك اديهولها انا عندى بتعمل بيهم عزومه لاحفادها لان الاكل بيكون فله مش بسيبه لما يزنج و يبوظ و اديهولها لا و الاقى ناس تقول الشغاله مبترضاش تاخدة
الزينه يابنات طبعا فى المواسم لازم نزين البيت امال نجيب للعيال اكتئااااب لا هاتى فرع زينه واحد و علقيه كام يوم العيد و شليه يمكن العيال تقولك عايزين نزين الفصل تتطلعيه او للعيد الجاى يتشال اصله لو اتساب هيبقى كنافه
كمان الفوانيس يلعبوا بييها طول رمضان و صادريهم للسنه الجايه الفوانيس غليت اوى و خصوصا لو عندك اكتر من طفل لو سبتيهالهم هتبقى فته و دلوقتى نوعيات الفوانيس اى كلام بتبوظ علاطول
المفارش و البراويز و الانتيكات لو عندك عيال بكرامتك كدة لميهم لغايه لما يكبروا اصل دول لو باظوا قابينى لو عرفتى تشترى غيرهم و مؤكد هيبوظوا هيدلق عليهم حاجات و محتاجات هيتكسروا العيال مش هتغلب يعنى بردة لو ساعه حائط غاليه تتشال
انا هكمل بعد مالالا قى التقييمات شغاله كمان هروح اصلى و ارجع ارجوكم قيموا نفسى يثبت
اولا تجيبى الشوايه البوكس من التحيد و النور بحوالى 40 ج و اشوى احلى كفته و فراخ و لحمه بدل متجيبى من برة
ثانيا الخل اللى متبقى من المخلل نسيت اقولك تحطى منه بردة فى مسحوق المواعين هيخليها فله
ثالثا كل ما يتوفر ليكى مبلغ جرى عالصايغ هاتى دهب كسر فى جواهرجى امين و متدين فى ميدان الجامع اسمه صادق قوليله طلعلى العلبه هو هيفهم هههههههههههه
رابعا بواقى الشامبو ايوة بواقى الشامبو متبصيش بقرف كدة فكرانى برميه اطلاقققققققققققا دة تمليه ميه و تمسحى بيه يديكى احلى ريحه لغايه ما تخلص الرغاوى
و دة ينطبق على الداونى و البرسيل بردة هو اكياس اة بس بردة افضل امصمص فيه لغايه ما يخلص
لو انتى معندكيش وقت و بتعرفى واحدة تنظف الخضار تكون نظيفه جيبى الخضار فى المواسم الرخيصه و عالديب فريزر عدل بدل الاكياس الفروزن بتكون غاليه و صغيرة
لما يكون عندك صندل ب 20 جنيه و باظ صلحيه مرة لو باظ تانى اوعى تصلحيه كدة هتدفعى تمنه اشترى جديد اكرملك
الملايات الاستيك اوعى تشتريها لو اختك اروبه او امك يعملوهالك اطرافها باستك اوفر لك و احسن لانها غاليه عالفاضى
لو معنكيش بلاكار حطى البطاطين و اللحاف تحت الملل مفرودين و كل شويه نظفى تحت السرير
برطمان العسل انتوا عارفين هو غالى ازاى بيتبقى فيه شويه صعب تتطلعيهم ترميه اوعى حطى فيه ميه سخنه و شربيهم للعيال قبل ميروحوا المدرسه على فكرة دى سنه بتدى نشاط و مناعه
المراوح كترى منها فى البيت يا فتوكه عشان تقللى استهلاك التكييف فى الصيف مش كل وقت بيحتاج تكييف
البقاله مش كل اسبوع لازم لانشون و كيرى و بسطرمه لا مرة فى الشهر عشان العيال متكونش محرومه و ياما عسل اسود يا ابيض يا حلاوة يعنى بيض و جبنه بيضا اساسى جمبههم ممكن مرة كيرى و الشهر اللى بعدة فلامنك و اللى بعدة بسطرمه كدة يعنى و مرة فى الاسبوع كاكاو و مرة كورن فليكس و هاتى شوفان او جنين القمح يتاكل بردة مرة فى اليوم افيد و احسن و اخف
االقاعدة دى تنطبق على اللبس لو تقدرى مش كله رخيص ولا كله غالى حتى لو هتقدرى انهردة عيالك هيتعودوا و عمرهم ما هيرضوا يلبسو ا الرخيص و فى نفس الوقت بردة مش علاطول رخيص فتتكسر نفسهم و سحسوا بالحرمان
هكمل بعد التقييمات و الصلاة ان شاء الله
كمل بقا يابنات بالنسبه لعلبه الايس وتش تستخدموها حصاله للعيال لازم يتعلموا التحويش لازم
و بالنسبه لغسيل الستاير مش كل منحطها فى الغساله هنشيل الدبابيس لا هاتى شراب قديم اوعى ترمى الشرابات ليها استخدامات كتيرة و لبسيهم للستارة من فوق بحيث تلم الكبش و تدخليهم الغساله ولا دوبوس هيقع و تعلقى علاطول حتى لو وقع بيقع جوة الشراب
العروض مش كل حاجه عليها عرض تجبيها اللى انتى محتجاة بس او متاكدة انك هتحتاجيه
الاقلام الرصاص الصغيرة اياكى ترميهم دول بحوشهم و لو عندك عيال صغيرة قلبهم حونين يقولولك ارجوكى يا ماما نسلف صاحبنا قلم اصلوة معندوش تتطلعى واحد و تبينى لابنك انه ياسلاااااااااام طلع من الغالى فانتى كدة راضيتى ابنك و فى نفس الوقت استخدمتى القلم اصل معلش بردة كل واحد ملزم باهله فى عيال تنحه مش هنصرف عليهم كل يوم قلم
المشاركه اللى جايه لما
المهم الشرابات تروحى التوحيد و النور و تركزى اوى هو بيبيع للناس الغلابه منين هتلاقيه بيجبلهم الشرابات من الدرج مش متعلقه اللى ب 2 ج
المشمع اللى تحت العيال عشان لو عملوا على نفسهم رحت سالت على سعرة لقيته وتر بروف ب 150 السنجل روحت كان عندى بواققى بلاك اوت و مشمع تقيل جدا بتاع السفرة خيطته و خليت الترزى يعملى استك كله اتكلف حوالى 40 ج الكبير كمان
:7_5_131:
اللمبه @allmbh
عضوة نشيطة
يلزم عليك تسجيل الدخول أولًا لكتابة تعليق.
كلها ذوووق
•
مشكورة على هالافكار الرووووعه
كيـوتـ
•
وعليكم السلام ورحمه الله وبركاته
يسلموو ع الافكار الحلوة كثيير استفدت من موضوعك وبطبقه ان شاء الله
الله يجزاك خير ع افكارك الحلوة
يسلموو ع الافكار الحلوة كثيير استفدت من موضوعك وبطبقه ان شاء الله
الله يجزاك خير ع افكارك الحلوة
الصفحة الأخيرة