افكار مشاريع مجانا

السلام عليكم ورحمة الله وبركاتهبكتب لكم بعض المشاريع والنقاط اللي عندي ان شاء الله تفيدك اذا كان نفسك تبدأي مشروع صغير بالبيت
قبل لا أبدا بس بقول لك .. أي فكرة مشروع تبدينها راقبي الله فيها ولاتبيعين أي شيء يغضب الله او يدخل فيه حرام بيعي الحاجات الحلال عشان ربنا يرزقك ويبارك لك في رزقك ..فيه مندوبات الله يهديهم تطلب من مواقع ملابس كاشفه او حاجات يدخل فيها صور نساء او اي حاجه حرام _انتبهوو لا ملابس ولا اي مشروع راعي الحلال في كل خطوه وكل مشروع
دايم ادعي الله انه يبارك لك برزقك ويفتح عليك أبواب الرزق والخير
حبي الخير لغيرك وساعدي الناس لاتبخلين على احد بمساعده او راي او فكره راح يجيلك اجر ويبارك لك ربنا بشغلك
ثاني حاجه لاتسرقين فلوس الناس وتنصبين عليهم أعط كل ذي حق حقه ..وانتبهي لاترفعين الأسعار بشكل مبااالغ فيه خلي اسعارك معقوله لاتظلمين نفسك ولاتظلمين الناس
راعي الجوده والشغل المرتب والنظيف بشغلك لاتسوين شي خرابيط وتقولين ليه محد يطلب مني الناس تبي الحاجه الغريبه المرتبه اللي مشتغله عليها تكون عاملتها بحب وبدقه
راعي الابداع والتجديد بشغلك فلنفرض انك بديتي تطبخين صنف معين من الطبخات وقعدتي ثلاثة او ستة اشهر وماعليك طلب..غيري الطبخه شوفي ايش اللي الناس يطلبونه ويشترونه تعلمي عليه خلي شكله وطعمه وسعره يخلي الناس ترجع تطلب منك دايم ,,لاتبخسين حقك خوذي حق الأغراض اللي شريتيها وزودي عليها حق تعبك بس بدون مبالغه ورفع بالأسعار
بعض المشاريع تتطلب ترخيص من البلديه مو أي مشروع ينفتح بالبيت ( يختلف من مدينه ل مدينه ) اذا بغيتي تبدين مشروع تأكدي اذا لازم له تصريح طلعي له عشان ماتدخلين فمشاكل
__________________
الفكرة الأولى..
مدرسة خصوصيه بالبيت_تأكدي لو يبيلها ترخيص_ اذا عندك أسلوب حلو بالشرح وتعرفين توصلين المعلومه صح وبطرق متعدده وسهله درسي خصوصي ( الأفضل انك تختارين ماده بتخصصك اللي دارسته مثلا رياضيات فيزياء انقليزي ,,,
تقدرين تشرحين مواد ثانيه بس لازم تطلعين عليها وتفهمينها صح
شوفي باليوتيوب شروحات كثير لبعض المواد ابحثي واتعلمي كيف تشرحين بأسلوب سهل وممتع وبسيط
لاتاخذين طلاب كثير بنفس الوقت هالشي راح يشتتهم ويشتتك انتي بعد
لازم تركزين على عدد بسيط عشان تكونين متأكده ان كلهم فهمو
المناهج تتجدد كل سنه ف لازم تكونين مطلعه على هالشي
الأطفال كل واححد له قدرات مختلفه فيه اللي يفهم بسرعه وفيه اللي فهمه بسيط وكل واحد قد يكون له طريقه معينه تخليه يفهم
مثلا احد يفهم بالصور والرسومات واحد يفهم بالتمثيل والاشياء المحسوسه..راعي الاختلافات بينهم
.....................
الفكره الثانيه..
الخياطه.. اذا انتي مبدعه بالخياطه او الكوروشيه افتحي لك مشروع بس انتبهي لاتخيطين ملابس او حاجه تغضب الله لأنك راح تسألين عنها يوم القيامه والفلوس اللي تجي من حاجه تغضب الله ماراح يكون فيها بركه بتكون نقمه عليك راعي الحلال في كل شغلك خيطي مفارش سرير ومفارش طاولات وبطانيات للمواليد وملابس مواليد بس مايكون عليها صور وشراشف صلاة او اي شي تبينه
......................
الفكرة الثالثة
الطبخ.. لاتشتتين نفسك اذا كنتي مبتدئه يكفي صنف واحد وتكون اغراضه بسيطه ومو غاليه + راعي ان الحلا يكون مرغوب للناس ويكون شكله وطعمه حلو ويخلي الناس ترجع تشتري منك دايم الناس تنجذب للطبخ الفريد الغير مكرر يعني لاتبيعين شي مليون تاجره غيرك تبيعه تميزي بصنف غريب
...............
الفكرة الرابعة
تغليف الهداايا .. غلفي هدايا ونسقي ورد وابدعي بطريقة التغليف عشان تجذبين الناس لك
............
الفكرة الخامسة
اذا تقدرين تروحين للسوق دايم تقدرين تاخذين طلبات البنات وتجيبينها لهم ويعطونك مثلا عشرة ريال مثلا اللي تبي مكياج من محل معين بمنطقه مو منطقتك ولا تبي أغراض من السوبر ماركت او تبي تروحين لمحل هدايا تغلفين لها هديه ( المشروع ذا يناسب لو كان عندك اخو او زوج متفرغ تستفيدون اثنيناتكم منه
..........
الفكرة السادسة
تقدرين تصلحين كوفي او عصير وايس كريم ك تغيير عن الحلا والمالح واطلعي لأي حديقه عامه بيعي فيها للناس
.............
الفكرة السابعه
بيع الأغراض والكتب المستعمله اللي تكون بحاله جيده وماستخدمت كثير.. تقدرين تبيعين اغراضك واغراض الناس بعموله بسيطه
...........
الفكرة الثامنه
اذا انتي مبدعه في مجال الحاسب والتصاميم تقدرين تصممين كروت اعراس وحفلات نجاح وثيمات ( راعي انه مايدخل بتصاميمك صور او نساء او موسيقى او أي حاجه قد تغضب الله الأفكار كثير دوري تصاميم وبتلاقين

حاليا هاذي الأفكار اللي عندي ,,راح اتوقف لهنا لأن احس الموضوع طويل ( انا بريئه من أي انسانه تفتح مشروع من الأفكار اللي كتبتها ويدخل فيها شي حرام)