افكر اتوظف. بس خايفه زوجي يعتمد ويشيل ايده من المصروف..

السلام عليكم اخواتي حبيباتي..
انا بدخل في الموضوع علطوول ونختصر عليكم الوقت..
انا متزوجه وماشاءالله عندي 4 اطفال.. اكبرهم 10 واصغرهم 2..
انا متخرجه من جامعة قبل 8 سنوات.. بس مافكرت اول بالوظيفه لعدة اسباب اهمها عشان اولادي كانو لسه صغار يبغالهم عنايه وانتباه..
وبشرحلكم عن حالتنا الماديه انا وزوجي.. هو عنده اعمال حره .. يعني مافي دخل صابت زي الوظيفه.. يعني مره فوق ومره تحت.. ونقول الحمدلله..
طبعا زوجي عليه الاشياء الاساسيه من مصاريف مدارس واكل وشرب والخ..
وانا علي الكماليات اهلي يعطوني من فتره لفتره مبلغ بسيط مره الف مره الفين.. وبهالمبلغ اجيب لنفسي او الاولاد الكماليات..زي احسانا التمشيات والملاهي مره زوجي ومره انا..
اللي صار ان اللي كان يعطيني من اهلي مبلغ شهري ، امي ، توفت الله يرحمها ويسكنها الجنه..
والحين زوجي الاساسيات الحمدلله ماشي الحال ، مره يعصب ومره يسكت والحمدلله الواحد يمشي حاله..ع فكره هو وضعه المادي عادي.. مو مره كويس و لا مره سيء.. بس تجينا اوقات تضيق علينا الماده ، عسى ربي يفرجها علينا وعالمسلمين..
لكن بالنسبه للكماليات.. من تمشيات واغراضي الخاصه من عطور ملابس مكياج احذيه ملاهي الاولاد .. الخ ، صار زوجي سضايق من كثرة المصاريف.. وبيني وبينكم ما الومه في ظل الغلا اللي احنا فيه ..يعني هو يصرف الاساسيات .. اما الكماليات فمره يعطيني ومره انا بفلوس اهلي ومره يعطيني شي بسيط..
المهم..انا بعطيكم فكره سريعه عن زوجي.. هو مشكلته انه من النوع اللي الله يهديه لو عرف انه معي قرشين، خلااااص يبدأ يسحب يده من انه يعطيني مصروفي.. كذا مره جربت ، يدري انه اهلي اعطوني قرشين.. ولما اطلبه يقولي ماعندي.. وفي نفس الوقت القاه رح يشتري لاهله اغراض ويجيبلهم مطاعم والخ.. انا قسم بالله مو ضد ابدا والله.. بس انا انقهر كيف يقول ماعندي و يروح يجيب ويسوي لاهله(انا ما اقصد امه وابوه هذول طبعا ملزوم فيهم حتى لو ماعنده،، انا اقصد حتى مع اخوانه واخواته وعيالهم)...
وانا الحين افكر في الوظيفه .. وهو مايبغاني اتوظف.. وانا متأكده 100٪ انه لو اتوظفت رح يسحب يده من اشياء كثييير.. وهو قالها بلسانه .. قالي اذا اتوظفتي انا رح اجيب الاساسيات.، اما مصروفك والكماليات وتمشياتك جيبيها براتبك..
انا بيني وبين نفسي قلت (هاذا من بدايتها كذاااا)!!!!!!!!!!
وانا متردده ساعه اقول اتوظف واعيش حياتي وادلع نفسي واجيب اللي ابغاه..
وساعات اقول اخاف اتوظف يقوم يغسل يده من مصروفي ويبدا يلعب هنا ولا هناك( اذكر مره وحده قالتلي ، الرجال لا تخليه بدون ماتبلشيه بمصروف وطلبات والخ.. لانه لو اتوفر في ايده الماده ، رح يلعب او يسافر او لاسمح الله يتزوج والخ...
خلاصة كلامي.. اتوظف واجيب لنفسي الكماليات اللي زوجي اوقات مايقدر عليها؟؟مع العلم انه رح يغسل يده تماااما من المصروف..
ولا ما اتوظف واحاول امشي وضعي حبه حبه .. ونجيب الاساسيات والكماليات حبه نجيب وحبه مانجيب، والله المستعان؟؟
لو كنتي مكاني ايش رح تسوي؟؟