اكتئاب الزوجه، او الأم 🖤..

بنات لأني اشوف كثير من المواضيع وكثير من الشكاوى
وكثير من الردود اللي بدون علم او خبره فقط كلام تكرره سمعته..


حابه اقولكم تجربتي مع الاكتئاب وادوية الاكتئاب..


اول شي المرض النفسي مرض مثل المرض الجسدي، في بعض الناس تفكر انه بسبب قلة الايمان تجي الامراض النفسيه..


اقدر اقولكم انه هالشي غلطط وعمره المرض النفسي ماكان مقياس لإيمانك..


في ناس افضل ديناً مني ومنكم وابتلاهم الله بامراض نفسيه، فلاتغتري وتستهزئي بالمرض النفسي وتعتبريه قلة ايمان حتى لايبتليك الله..


طبعا هالشي لايتعارض مع انه القران، والقرب من رب العالمين شفاء وراحه وجنة الدنيا، لكن اي مرض في الدنيا هو ابتلاء قبل كل شي..


والمرض يتعالج بقوة الايمان والاستعانه بالطب..


الشي الثاني اصابتك ليست شي مخجل او مشين كمايصوره لك المجتمع،
هو شي عارض مثل اي مرض تقدرين بإذن الله تتغلبين عليه وتخرجين من هالتجربه اقوى واكمل..


مررت شخصياً بظروف صعبه ومتتاليه وضغوطات خلتني مااقدر اتمالك اعصابي ع اللي حولي، وفعلياً ممكن اضرهم بعصبيتي،
لما يكون تأثير المرض قاصر عليك وعلى نفسك ممكن تتحملي لكن لما يبدا يأثر على من حولك ويدمر حياتك!!
وممكن يخليكي تظلمي غيرك سواء زوج او اطفال هنا اقولك ستوب وحرام تظلمين غيرك والعلاج موجود ومتوفر، لازم تتصرفي علشان نفسك واطفالك وحياتك..


كان معاي قولون عصبي واظن تعرفون اثر القولون مع الاكتئاب فعلا كنت بمشكله كبيره،
قبل ماتطور الامور وبفضل من الله رحت لدكتوره وشرحت حالتي لها واعطتني حبوب مضاده الاكتئاب وكان فعليا يابنات افضل شي سويته لنفسي..


طبعا انا مااخذت الحبوب الا بعد استخاره ودعاء خالص لوجه الله انه يعافيني ويجعل شفائي فيها ويصرف عني اي اعراض جانبيه ممكن تتعبني..


اخذتها والحمدالله مع المحاوله والاصرار مني بتغيير طريقة تفكيري،
صددق يابنات شفت الراحه والسعاده..
مااكذب لو قلت سنين كنت عايشه مخنوقه وكأني عايشه في قوقعه لكن بفضل الله حسيت اني خرجت منها وصرت اتنفس واعيش مثل بقية الناس..


رجعت لي ضحكتي واحس رجعت لنفسي اللي افتقدتها، شعور لايوصف..


جلست يمكن سته شهور عليها، ولما حسيت اني ممكن استغني عنها رحت للدكتوره وبالتدريج تركتها ولي الان يمكن ثلاثه شهور وانت تاركتها..


سالفة انك تدمنين عليها تضحكني وكل مااقرا وحده كاتبه كذا اجزم انها مو عارفه ولا جربت، هو في البدايه يجيك خوف انك ترجعين لحالتك القديمه بس ثقتك بالله وايمانك وتفكيرك المنطقي يخلونك تتعدين هالشي وتتركيها..


مااصابني خمول منها ولله الحمد والاعراض الجانبيه كانت خفيفه او شبه معدومه وكله بفضل الله والدعاء، والله كنت كل مااخذ حبه استودعها الله،


الان بعد ماتركتها غيرت طريقة تفكيري للافضل، واجهت صعوبه بسيطه بس ابداً مارجعت لحالتي السابقه..


كتبت موضوعي علشان في امهات وزوجات عايشين بيننا ومعانا يعانون بصمت ويخافون يواجهون انفسهم او المجتمع..


تخاف من الادويه واثارها
تخاف من نظرة الناس


وفي نفس الوقت ظالمه اولادها ومن حولها بمعاملتها ونفسيتها وناسيه انها قاعده تبني جيل وممكن تهدمه بسبب اهمالها لنفسيتها..


كتبت هالموضوع لوجه الله وابتغاء افادة الناس وتوعيتهم وتشجعيهم،
جعلني الله واياكم من اهل الفردوس الاعلى ❤️❤️