اكتئاب غريب بدون مبرر

السلام عليكم ورحمة الله وبركاته
طبعا انا اتخرجت من الجامعة وجلست في البيت زييي زي باقي الشعب عادي مو جديد..
جالسة شهور طويلة في البيت متكيفة مع الروتين والملل بشكل طبيعي ولولا الله ثم قرائة سورة البقرة كان الله اعلم انا في اي مستشفى من المستشفيات الان.
بدون مبالغة تمر الاسابع مااخرج فيها..ويوم ما اخرج اخرج ادور على وظيفة وطبعا ارجع ايد ورى وايد قدام...قمة الاحباط..كل هذا عادي .

صاحباتي تركوني بعد التخرج لأنهم انشغلوا بحياتهم...غير انهم لما يتجمعوا يتجمعوا في اماكن عامة واهلي يمنعوني اروح اي مكان ماعدا عند عزايم الاقارب ومعارف ماما بس...وماما اصلا معزولة عن الناس.
انا والحمد لله متكيفة واشغل نفسي في البيت باي شي ومستنية فرج ربنا وباخد بالأسباب..

بس الغريبة اني لما اخرج في عزيمة او زواج اخرج مبسوطة واضحك مع الناس وافرفش بس من يوم ما ارجع البيت تاني يوم يبدا معايا اكتئاب واحباط وأحس بوحده فضيعة ..
كنت اكره اخرج عشان كده بس صاروا اهلي يجبروني اروح اي عزومة يحسبوا انهم بكده يخرجوني من حياة الملل والروتين وكمان طبعا(عشان اتخطب)بس اللي بيحصل معايا عكس كده...لاخطبة ولا تجديد نفسية مني عارفة ليه.

يعني طول ما انا في البيت بحاول اتكيف واشغل نفسي وعادي عندي اني ما اشوف ناس او اتكلم مع ناس...بس من يوم ما اخرج اكون ما ابغى ارجع البيت والاقي صعوبه في اني ارجع اتكيف مع الحبسة والقفلة..واخر مرة خرجت الخميس اللي فات والله وبدون مبالغة رجعت البيت مصدعة ولازمني الصداع يوميا الى اليوم لازم اخد مسكن يوميا عشان يخف الالم بس مو عشان يروح..غير اني طلعتلي حبوب في شفتي صغيرة اول مرة في حياتي تحصلى ولما بحثت في النت لقيت من اسبابها الاضطرابات النفسية..

حبايب قلبي ابغى حل...هل اعتزل الناس واجلس في بيتي ..طبعا اهلي ما عندهم خبر احاول دايما اكون طبيعية وما ابين شي ..
اكتبلكم دحين لأني من جد احس بوحده فضيعة ..وجدران غرفتي حاسة انها تبغى تفتك مني من كثر ماني مقابلتها ليل نهار.