موضوعي ممكن يكون حساس بما أنه يشمل كلمة اكتئاب وأيضا ممكن ينفهم غلط بسبب ارتباطه بالدورة الشهرية.
الكثير ممكن يعتقد إني أقصد الأعراض المصاحبة للدورة واللي أغلب النساء يمروا ببعضها باختلافات بسيطة, والواقع أني ما أقصدها لأنها ما تسمى اكتئاب.
الفرق بينهم للأسف نجهله لكن علميا مثبت وموجود مصطلحين مختلفين لهم: أعراض ما قبل الدورة (premenstrual syndrome) أما اكتئاب ما قبل الدورة فيسمى (
Premenstrual dysphoric disorder)
الموضوع كان مرهقني شخصياً لأني وصلت لمرحلة ما أحس بأي شي في الحياة ولا أي شي ممكن يخليني أحس بشعور أفضل. وأحب أنوه أنه الإكتئاب مرض ماله دخل ديني ما هو مجرد ضيق ويروح أو خاطر بسبب ضغوطات, هو شعور رمادي يستمر حتى بدون وجود مضايقات أو ضغوطات. أنا شخصيا حافظة للقرآن والحمدلله مصلية وأخاف ربي وألجأ له دايما, لكنه ابتلاء والحمدلله.
استمريت فترة أعتقد أنه مجرد أعراض ما قبل الدورة لين وصلت مرحلة صار كل تفكيري متى أموت وما في أي دافع للحياة. موضوع الإكتئاب وإيش كنت أحس فيه يتشعب وكثير جداً المشاعر السلبية اللي مريت بيها. فجأة مر علي موضوع طرحته د.هبة حريري-الله يجزاها كل خير على نشرها العلم النافع المهم- في سناب شات عن أنواع الإكتئاب وذكرت هذا النوع وقالت لو تمر المرأة ب٥ أعراض من الأعراض اللي موجودة في الصورة (أرفقت الصورة من انستغرامها) فتحتاج الأنثى أنها تراجع أخصائية نفسية.
عموما أنا كنت أمر بكل الأعراض وأكثر منها وأشد والموضوع يبدأ بعد الدورة تقريبا بأسبوعين أو ٣, كل شهر بدون توقف. الضغوطات تزيده طبعا لكن زوالها ما يخفف الشعور.
رحت لدكتورة وقالتلي أنه العلاج المتوفر إما حبوب منع الحمل اللي تحتوي نوعين من الهرمونات (مو متأكدة لكن أنواع معينة) أو حبوب الإكتئاب. أخترت الخيار الأول والحمدلله الوضع أخف بكثير بعد معاناة تقريبا سنتين.
طبعا ذكرتني بأنه الرياضة والنظام الغذائي الصحي والنوم المنتظم من أساسيات العلاج لأي نوع اكتئاب.
حبيت أشارككم تجربتي لأنه للأسف الموضوع جدي لكن لمن أبحث بالعربي ما ألاقي الكثير وغالبا معتبرين النوعين نفس الشيء.
وأحب أقول لكل وحدة تمر بأعراض أكتئاب عموما أنها لا تتردد وتراجع مختصين. بعد تجربتي بدأت أميز (أحيانا) الناس اللي تكون تمر باكتئاب وللأسف ما عندي ولا عندهم الوعي الكافي وكانوا يعتقدوا أنها عين ومس. مو معناه أني أشكك في العين والمس لكن أقصد أنه أحيانا نفهم الأعراض غلط.
اللي تبغى مصادر زيادة تبلغني وأتمنى موضوعي يفيد الناس اللي زيي كانت تدور في كل مكان عن أي معلومة.
في حفظ الله.
