اكتب لكم وانا ابكي كرهت نفسي من وضع طفلي الله يشفيه

السلام عليكم ورحمة الله وبركاته
عندي طفل مصاب من الولادة بالارتجاع يستفرغ يوميا من ثلاث مرات الى 4 مرات ويطلع مثل النافورة من خشمه وحلقه لين يشرق فيه لدرجة انه كره الحليب وصار مايرضع الا كل 7 ساعات بعد مايتعب من الصياح من الجوع وانا والدة بعملية وماغير اهز فيه لين تورمت الخياطة وطلع منها صديد ودم وكرهت نفسي من السهر والتعب والارهاق في نفاسي وانا في غربة ماخليت عيادة ولامستشفى ماراجعت فيه وغيروا حليبه اكثر من 5 مرات ولارضع مني طبيعي الا يمكن اسبوعين مرة وحدة باليوم ومن هو صغير الى الان مايرضع حليب عادي مثل باقي الاطفال ياخذ حليب خاص للارتجاع لين يكمل سنة الله يطول بعمره ويخليه وكلهم يقولون لي انتظري لين يكمل عمره 6 شهور وبتقوى العضلة اللي عند معدته ولايرجع او نسوي له مناظير وماادري ايش وانا مابي اعذبه بالمستشفيات يلعبون فيه وهو توه بالشهور الاولى
والله العالم وحده شكثر عانيت وانا بعملية ولاعندي بشر غير ربي من التغيير والمسح والتنظيف وغسيل الملابس والسجاد والبطانيات والمفارش لين انهد حيلي وجتني نوبة اكتئاب وصرت عصبية وصرت اصيح واثر الوضع على كل نواحي حياتي وواجباتي
فاتوا ال 7 شهور ماطاب وانا مابين عيادة ومابين معالجات حريم اللي تقول اخت واللي تقول عظيم عشان منطقة اليافوخ فيه نازلة حيل وينام شبه مفتح واذا نام يرجع راسه لين يوصل ظهره وهو ضعيف واللي تقول لاحقه شمم واللي تقول لازم كوي وانا مابي الكوي
ووديته مشايخ كثير يقولون نفس وعين وحسد ويرقونه يخف شوي ويرجع بعد كم يوم وواصلت على الرقية من شهرين وخف عنه الحمدالله التطريش
والحين في الشهر العاشر رجع نفس اول يستفرغ وعنده قدرة عجيبة انه يطلع الاولي والتالي لو يحط اي شي في حلقه لو يتحسس اي حاجة صغيرة متكتلة في طعامه المهروس بالخلاط على طول استفرغ صارت معدته حساسة بشكل مخيف لو المس بالغلط حلقه من برا استفرغ لو المس اذنه من ورا استفرغ لو حس كبر حبة الشعير متكتلة في اي طعام سيرلاك او بطاطس استفرغ واي دواء فيفادول او مضاد حيوي او عصير او ماء الشرب اي سائل انقطه في حلقه غير الرضاعه يستفرغ وطبعا مايشرب ماء ابدا لانه شرق فيه كذا مرة وصار يكرهه ويخاف منه واكله ضعيف ماله شهية بالاكل والدكتور يقول وزنه ضعيف لازم ياكل ويسمن
والمشكلة الاعظم انه ماينام الا الصباح وطول الليل صاحي ويصيح ومن ينام الصبح على الساعة 7 يقعد يتقلب ويصيح ويرافس ويفتر لين يصير راسه تحت ورجلينه فوق ولايحب الغطا واول مااغطيه يصحى ينام كل الوقت بدون غطا وينام على صدره ويثني ركبه في بطنه ويقلب ويعترض ويرفع راسه ويرجع ينزله ويضربه في خشب السرير ويبكي وطول ماهو نايم على هالوضع وانا ماغير اهز لين طلع معاي الديسك وهو اول كان خفيف ولاادري عنه والحمدلله على قضاء الله وقدره
ماينام ساعة على بعضها كل نص ساعة يتقلب ويصحى ويصيح ويقوم مرتاع حطيته معاي على سريري مترين ونفس الشي يتقلب ويتقلب لين يطيح من السرير عالارض اكثر من عشر مرات طاح تالي رجعته لسريره وهذا هو الحين يضرب راسه في خشب سريره ويصيح ويتقلب ولاادري وش اسوي تعبت يابنات تعببببت وربي اكتب وانا ابكي نفسي تصير حياتي مثل حياة الناس ننام ونصحى وضعنا طبيعي ابوه تعب من كثر الصراخ والازعاج ووراه دوام ونقل من زمان ينام في المجلس وانا وياه طول الليل ياامسح تطريش يااهز فيه يايصيح ومانصحى الا بعد العصر لافطور ولاغدا ولا حياة مثل الاوادم
ماني معترضه على قضاء الله وقدره استغفر الله واتوب اليه لكن والله انهد حيلي الحين الساعة هذي توني ممسحة تطريش وشايلة مفارش ومغيرة له وربي انه يون جنبي من كثر ماتعب وهو يطرش وربي اسمع الهواء يطلع وينزل في صدره وهو يستفرغ مثل النافورة من خشمه وحلقه ويصيح ولافي يدي اساعده
تعبت نفسيا وجسديا من السهر وجهي كله ارهاق وهالات واهملت نفسي وبيتي واخرت صلواتي وحياتي كلها غلط ومشاكل والبيت محتاس وارهاق ونوم النهار مو مثل نوم الليل الله يعين
تكفون قولولي شسوي عشان يوقف تطريشه وياكل مثل الاوادم وينام طبيعي مايتقلب ويعترض ويبكي ويضرب في راسه كل ربع ساعه
تكفون انتم يالزوار احلفكم بالله ثم بدموعي انكم تدعون له هو وحيدي ونور عيني ادعوا ان الله يشفيه ويعافيه ويخليه لنا ويصلح حالنا
اللي تعرف اي شي بعد الله تقدر تساعدنا في حالته تطريشه ونومه سواء نصيحة او دكتور او حرمة تعالج ااو تسأل امها او عمتها او اي شي الله يوفقها دنيا وآخرة ويخلي لها عيالها تقولنا وتساعدنا وتفرج لنا الله يفرج عليها وماراح انساها من دعواتي ولها اجر هالمسكين اللي بيكمل سنة وهو يستفرغ ويتالم الله يشفيه شفاءا عاجلا لايغادر سقما ويخليه لي ويطول عمره ويعافيه يارب العالمين