اكتشفت زوجي مدمن

السلام عليكم

هذا موضوع من وحده اعرفها زين عز المعرفه
تبيكم تنصحونها لوجه الله
بترككم مع قصتها اللي حكتها

ممكن اطول عليكم بموضوعي بس نار بصدري نااار مايعلمها الا الله
من تزوجنا ووضعنا ماكان كويس ابدا
زوجي يعشقني عشق عشق والله ماقد شفت انسان يعشق مثله
ف البدايه ماحبيته وكنت كارهته جدا بس بعدين تعدلت واكتشفت اني لا يمكن الاقي انسان احسن منه
الحين انا اعشقه واحبه حب كبير كبير كبير
وهالحب يمكن هو اللي كاسر ظهري

زوجي مريض من تزوجنا وهو يتخيل اشياء كثيره ويسمع اصوات
يتهيأ له من يهدده بالقتل و امور كثيره جدا
كان يخاف علي من كل شيء لدرجة حرمني البس قمصان النوم عنده خوفاً من اذية الجن لي
اخته تقولي كان كذا من قبل يتزوج
كان يتهيأ له امور و اشياء وان حد يلاحقه امور كثيره
طبعا اخته قالتلي على امور صارت له و هو صغير صعب اذكرها بس كنها طعنه بقلبي لين اموووت

اهله ماخلوا شيخ و رحت معاه اجمعوا على ان عنده مس عاشق
لكن مافي اي تحسن مع الرقيه ابدا ابدا ابدا
قبل سنتين تقريبا الحاله صارت متدهوره جدا
كسر اثاث البيت لانه يشك فيه او ان احد حاط فيه سحر لنا
يتفحص الاشياء بطريقه والله ماقد شفتها يعني لو شاف رقم او كتابه على جهاز مثلا يقول اكيد هذي مقصوده لنا ولها دلاله ويكسر هالجهاز ماخلا شيء ماكسره ويبدلها ولكن يرجع يشك فيها
و يشك في اهله ويلعنهم ويدعي عليهم
ويقول هم السبب هم اللي ساحريني !!
قبل فتره لقيت حبوب كبتاجون بجيبه
طبعا انهرت ووريته قال ايش هذي ؟! اكيد حد حاطها لي عشان يورطني!!
انا متواصله مع اهله من وراه واعلمهم بحالته بدون يدري لانه لو درى طلقني
طبعا اخذه ابوه ووداه لمستشفى وللاسف ابوه رافض يقول اش عنده واتوقع انه كشفو ادمانه عطوه علاجات نفسيه للصرع !!!!!!!
وزوجي ما استخدمها

بعدها لقيت اكثر من حبه وكأنها رسايل لي تخبرني عن ادمانه بس قلت لااا يابنت مستحيل يكون مدمن !! مع ان اعراض الادمان كلها باينه

قبل فتره سافرنا جده قبل نمشي دخل دوره المياه وكان معه كيس صغير وطبعا مادخل حمام وتوقعت انه ياخذها
يوم سافرنا مره شفته حاط كيس ورا مقعدته واخذ منه شي نزل لمحل وسبحان الله مدري اش خلاني امد يدي اشوف
طبعا كانت هي للاسف كيس مليان حبوب !!
رجعته ومشت الايام
فاتحته بالموضوع انكر انكار شديد يقول ياليت اللي فيني منها هي !!!!!!
البيت مكسر
كل شيء كسره ماقدر استقبل حد ببيتي ماقدر
انحرج من جاراتي يقولون بنزورك واتعذر !!
صار عندي خوف من صوت التكسير واذا سمعتها ارجف
قبل فتره شاف بادية صغيره حديد كنت اذوب فيها سمن وكانت محترقه
قومني نص الليل وانا راقده اش هذي اش كاتبه فيها و صارخ علي وقال والله ماعاد تقعدين معي بكره اوديك لاهلك جهزي شنطتك
واليوم الثاني اعتذر !! ويوم ناقشته زعل مني
تعبت تعبت تعبت تعبت
والله العظيم تعبت وصرت اقارن حياتي بغيري وانا ماكنت كذا
بدا يطلع الشيب براسي والله
زوجي يحبني ويخاف علي جدا وعارفه هالشيء
بس والله تعبت صرت الكي بكاء دايم
ما انكر ايام يكون طبيعي وهادي
بس ايام يصير انسان ثاني

فكرت كثير اتركه واقول اذا ماتعدلت والله ماعاد تشوفني بس اخاف من رده فعله لانه بايعها وممكن ينتحر !!
اش اسوي وربي تعبت
يعلم الله اني ادعيله يومياً بس الله يغفر لي احيانا احس بوسواس عجيب مايفارقني
تعبت وماعاد اعرف اش اتصرف ماعاد اعرف افكر حبه لي كسر ظهري اذا فكرت اتركه
وفنفس الوقت ابي آخذ موقف واحل السالفه
اهلي ما يدرون ولا ابيهم يدررون ابدا

اسفه طولت عليكم
ادعولي