اكتشفت زوجي يخوني ،، الحكيمات ردو علي

سلام عليكم
قلبي نار وجمر ماني قادره استوعب
انا متزوجه لي ٨ شهور
وحامل بالشهر الثاني ،
زوجي كويس معي لكن فيه صفه تعبت منها انه متشدد علي مره ممنوع اطلع اي مكان الا معه واجبرني اغطي عيوني وممنوع علي منعا باتا طلعات كافيهات تمشيات وحتى لما اروح لاهلي مانعني اطلع معهم ....

اعطيتكم نبذة عنه

ماعمري شكيت بزوجي ابدا
لكن صرت الاحظ له فتره يقولي بنزل تحت واجيك وجواله معه وراقبته من الشباك كان جواله بيده ويراسل احد وبالواتس مو متصل
وتكرر هذا الموضوع بس ماشكيت لان زوجي دايم يتكلم ويسب الرجل اللي يخون ان زوجته مايستحق تجلس عنده وكان يقولي كلام كذا كثير
لدرجه بيني وبين نفسي اقول الحمدلله انا محظوظه زوجي لو بين الف بنت انا واثقه فيه جدا وكنت ممتنه لهالشي لاني اكره ماشوف بحياتي الخيانه خط احمر عندي لانها استغفال للطرف الاخر


امس دخل يتروش وشاورت نفسي وقلت بس بفتش سناب
دخلته لقيت كله اصحابه الا حساب برموز وبدون ايموجي

ودخلت عليه وليتني مادخلت اه اه ليت اللحظة ماصارت

كان يتواصل مع بنت بادي معها من ٢٠٢٠
وبينهم اغاني واهداءات ورومانسيات
وكذا مره جت القريه اللي هو ساكن فيها وكاتبه to وحاطة اسم المنطقه وهو يقولها نورتي

وهو كذا مره يروح للرياض عندها ويرسلها
وهي نزلت صوره بكوفي مع صديقتها وارسلها وقال
وانا يوم اقولك اقابلك بالليل تقولين صعبه ؟؟؟

والبنت صورها ستوري وهو يعلق عليها على جمالها ويعايدها كل عيد حتى العيد اللي كان مملك علي فيه

ويقولها كلام غزلي نفس الكلام اللي يقوله لي
وصورته باول عيد لنا مع بعض ارسل لي صورته وارسلها لها

وارسل لها قبل ١٠ ايام من زواجنا وقال لها :
ممكن سؤال ؟
اذا تزوجت تسيبيني صح ؟
قالت جوابي على هذا السؤال تختصره اغنيه عبدالمجيد عبدالله ( كيف أسيبك )


اه يابنات اقرا وقلبي جمر نار وقلبي خفقان وماسكه معدتي والدنيا دارت فيني وحسيت اني بستفرغ
وزواجي صار واليوم الثاني طلعنا المالديف شهر العسل وثالت يوم بزواجنا هي حاطه ستوري هابي بيرثدي
وارسل لها وانا معه بشهر العسل
وعايدها وقالها كل عام وانتي بخير ♥️♥️

كان قبل يتزوجني يحفط كل رسايلهم بس من يوم تزوجني بس حفط المعايده فقط والباقي لا بس واضح للان يتواصلون لان اسمها فوق برموز
وامس هي مرسله له مقطع فيديو مامر عليه يوم وهو فاتحه

اه انكسر قلبي قلبي صار يعورني

كل اغانيهم مع بعض عبدالمجيد
وفيه فيديوهات ارسلها لي ايام ملكتنا
كانت من محادثاتهم

للان يابنات هو مستمر معهاااا اه بس
وهو يوم تصير بينا خلافات على تشدده علي كان يقولي : احمدي ربك انا ما اخون ولا اسكر ولا بخيل وهذا حرصي من حبي لك 

وكنت اقول حريص علي لانه يحبني وكنت اتغاضا عشان باقي صفاته الكويسه واقول مع الوقت يفك تشدده علي 


قلبي انكسر ليتني مت ولا شفت هذي اللحظة
حامل وحاسه بطني يعورني من تحت
بس صبرت صبرت
سويت له قهوته وغداه وجلست اتابع معاه فلم
وانا احاول ابين عكس مافيني لكن داخلي نار مابتبرد

ماني عارفه اشلوووون اتصرف بحكمه .....


المشكله كان يتكلم عن الخيانه قد سولفنا عن هذا الموضوع قلت له لو تخوني انفصال ع طول لو بينا عشرين طفل
وهو قال لو تخوني اصلا بوديك بيت اهلك بس بدفسة رجل لما اوصلك بيت اهلك اشوتك برجلي لانك خاينه
واتذكر وقتها زعلت قلت انا محترمه ونظيفه لاتقولي هذا الكلام انا ماخنت فبيت اهلي عشان اخون الان وانا متزوجه
انا الحمدلله نظيفه

لكن كان مركز على سالفة الشرف والخيانه والبنات
وانا عبايتي اسود سادة ومنقبه بس كان يجبرني اغطي عيوني وحرمني من كل شي كنت عايشته فبيت اهلي

وظيفه اختلاط ممنوع وقلت له انا وظيفه ماهي مجتمع نسائي بحا مستحيل اتوظفها هذي قناعاتي قبل اتزوجه وبعد كمان
سواقه ممنوع واصلا انا ماحب اسوق

انسانه كويسه لابعد حد لكن كان ينتقدني ع اي شي لاني اطلب منه نتمشى نروح كوفيهات او اقابل صديقاتي كان يرفض رفض تام يقول مستحيل اخليك وامشي انا مو ديوث

اه بنات كلامي ملخبط بس انا عجزت استوعب


هو بباقي امور الحياة كويس وحنون وكريم ويقدرني ويحبني ويخاف ع زعلي واحيان انا انفس من الحمل وازعل يراضيني
بس عيبه التشدد علي بزيادة ممنوه اطلع اتنفس
واكتشفت الان سبب حرصه علي
يخاف اكون مثل البنت اللي متعرف عليها اني اخووون !!

البنت محجبه ممرضه وصورها بستوري بشعرها
والبنت جمالها اقل من العادي
انا اجمل منها وزوجي مايستاهل وحده نظيفه مثلي صاينته وصاينه بيته وما اخطي خطوه الا استأذن منه ولو رفض اجلس
رغم اني بطبعي مسؤوله وقياديه ومايعجبني كذا بس قالو بداية الزواج الزوج يكون متشدد وحريص اصبري

بس ماتوقعت انه يخوووون !!!


زوجي فقه صفات كثير كويسه وهذا زواجي الثاني وعمري بالثلاثين صعبه انفصل


زوجي عنده نقطة ضعف بالحياة يخاف من كلام الناس وقد مره صار بينا موقف وهددته بابوه وانهبل جاء يعتذر ويقول ابوي تعبان لاتدخلينه بامورنا .....

كيف استغل هذا الشي لصالحي
ابي راي وحده حكيمه
كيف اخليه يعتذر مني ويتندم
كيف اخليه يندم اشدم الندم انه بيخسرني
هل اروح لاهلي بس ماقول لاهلي
وهل اصارحه ولا شلوووون ؟؟؟

انا ابي اصارحه وبزعل وبتخذ موقف
لكن بنفس الوقت بكسب بعض الامور لصالحي لو اعتذر وتركها

ابيه يعطيني حريتي يخليني اتنفس شوي
اطلع مع اهلي اماكن عامه او صديقاتي
يخف علي بالعبايه مايخليني اغطي عيوني بالاجبار

كيف اتصررف ابي راي وحده حكيمه
قسم بالله فيني شعور محد يتحمله
وافكر بطفلي اللي حامل فيه وش ذنبه

ساعدوني الحكيمات 
واكيد بيقولي ليه تفتشي جوالي ؟؟ 
وش ارد عليه بهذي اللحظه ؟؟؟ 

ساعدوووني ابي راي وحده حكيمه تكفووون