اكتشفت سر من اسرار زوجي ومب عارفه كيف اتصرف ؟؟

السلام عليكم ...

انا صارلي متزوجه سنتين وسبعة شهور ... ف بداية حياتي الزوجيه طبعا صارتلي مشاكل وخلافات لين تأقلمت مع زوجي ,, ومن كملنا السنتين تغيرت حياتنا للافضل ,, في السابق كنت احس اني طفولية ومش ناضجه والحين نضجت وقدرت اتحكم ببيتي وزوجي ..
عندنا بنت وحده عمرها سنه ونص ...
حالتنا الماديه ما شاء الله زينه ,, بس من البدايه لاحظت انه زوجي حريص مع انه ما شاء الله عنده الخير وع فكرة ف حياته ما كان عنده دين الحمد لله ,, ويكره الدين ,, بشكل عام اتربى من صغره على جيه وكل اسرته نفس الحال الله يحفظهم .. بس من البدايه لاحظت انه حريييص .. ما اقول انه مقصر ابدا مش مقصر ,, بس حالي مقارنة مع بعض الحريم فيه فرق .. يعني من سنه ريلي في دورة ,, باجي منها شهر الحين ,, آخر الاسبوع يرجع البيت بس وطول الاسبوع محد ,, كل اسبوع يعطيني 400 درهم مصروف البيت وانا وبنتي !!!! طبعا قبل ما يروح كل اسبوع يوم الجمعه نروح السوبرماركت ويجهز البيت من كل شي مش مقصر ابدا ..
بس انا من النوع اللي ما اصرف ولا اتسوق الا من فتره لفتره ,, للعلم انا اروح المولات واشتري من الغالي ,, وبنتي من يبتها ما البسها الا الغالي ,, طبعا في الغالب استغل التنزيلات ..

انا حطيتكم في الصور والحين بخبركم السالفه ..
امس بالصدفه بنتي تلعب ببوك ابوها (محفظته ) ,, وطلعت ورقة البنك طبعا انا دخلت وشليت من ايدها وطاحت عيني على الورقة ,, لقيت حساب زوجي 30 الف درهم !!!!!! للعلم دوم يتشكى انه الراتب بسرعه يخلص ودوم حريص وما يحب يصرف وخلاني اتعود اشيل نظري من الاشياء الغاليه وايد وصرت اراعيه واقصر على عمري وارضى بالـ 400 اللي يعطيني اياها كل اسبوع مع انه احيانا اصرفها من اول يوم يروح فيه وتخلص واتم بدون بيزات !!!
واكتشفت هالشي البارحه وما تكلمت ولا تغيرت تصرفت بشكل طبيعي ولا حسسته بشي ..
وبعد ما اكتشفت هالشي قلتله ابغي اشتري فستان لحفلة بنتي هالاسبوع ورد علي الميزانيه ما تسمح راح الراتب ع الحفله !!!!
انا مصدومه وتعبانه ما تخيلت ريلي جيه تشوهت صورته في عيني مع اني احبه ويحبني ,, وحياتنا نوعا ما مثالية .. مب عارفه شو اسوي ساعدوني وااايد تعبانه
كيف اتصرف معاه كيف اواجهه .. وللعلم هالشهر راح يزيد راتبه وااايد ,, طبعا ف الامارات صارت عندنا زيادات للرواتب ,, وريلي في الجيش وزيادته كبيييييره .. شو راح يسوي لما يزيد راتبه ؟؟
احس انه يحب فلوسه ويفرح لما يشوفهن يزيدن ويخاف يصرفهم ..
كيف احل هالمشكله انا تعبانه وايد ساعدوني