اكتشفت فجأه اني عانس.. والله فجأه يا جماعه

طول عمري ماخذه الدنيا طول بعرض
سفرات وروحات وجيات وكشخه واناقه ياربي لك الحمد
وموضوع الزواج شي مؤجل بالنسبه لي
كنت اضحك على اي وحده مستعجله على رزقها واقول لاحقه عالشقاء
ومرات اقول مسكينه اهلها زوجوها بدري ولاقدرت تكمل تعليمها

كنت والله العظيم يابنات ممكن تمر علي 3 او 4 سنين بدون ما احضر ولا مناسبه
لا زواج لا عزيمه ولا شي.. اقول ليه اترزز ومو لازم الناس تشوفني
هذي اشياء تضيع الوقت.. خلني بشغلي احسن.. ومن هالكلام
حتى الكم واحد اللي جوني صرفتهم لامور تافهه.. وكل شوي اقول بعدين بعدين

المهم

درست.. تخرجت.. تعينت.. وسنه ورا سنه تمر
وفجأة كاني صحيت من كابوس لما اكتشفت ان عمري صار 28 !!
وصلت لل28 ولا تزوجت ولا عندي بيبي ولا زوج ولا بيت !!
رغم اني جميله وانيقه ومثقفه ومتعلمه وبنت ناس اجاويد.. مع كذا صرت عانس
ادري الكلمه صعبه.. بس هذا اخر شي كان ممكن اتوقعه.. اني اصير كذا !!

اذكر وحده من صديقاتي كانت تقول لي اظنك يا فلانه اول وحده بتتزوجين من بينا
والحين كل البنات اللي كانوا جالسين معنا تزوجوا وجاهم عيال وانا محلك سر

مدري العمر سرقني مدري انا كنت مغتره بنفسي او ايش
بس اكتشفت شي واحد.. ان فرصي بالزواج قلت واخاف تكون انعدمت

الصيف اللي مضى مر كله بدون محد يطق باب البيت.. رغم اني بديت اغير بنفسي واصير اجتماعيه
واحيانا اضحك على نفسي واقول خلاص راحت علي الفرصه الحين للي اصغر مني
استغفر الله العلي العظيم.. مو يأس من رحمه الله.. لا والله.. بس فعلا احس اني محبطه بداخلي

غير كذا مجتمعي ينظر لاي وحده تعدت 24 بدون زواج انها عانس.. وهالشي متعبني
ولا عندي استعداد ابدا اكون زوجه ثانيه لاحد.. الله يكفيني ويكفيكم من هالوضع

اعتبروا الموضوع فضفضه.. وودي اقول لكل وحده صغيره بالعمر لا تتكررين اخطائي

الله يرزقكم ويرزقني الزوج الصالح عاجلا غير اجل.. قولوا امين