اكثر من فيديو- ركاب "السعودية" محتجزون اكثر من 6 ساعات على الطائرة

أحداث ماحصل لركاب رحلة الخطوط السعودية رقم SV1040 يوم 29 شوال 1432هـ الموافق 27 سبتمبر 2011 والمتجهة من جدة إلى الرياض

بلسان احدى الراكبات على الرحلة

وحسب ما روتها في موقع تويتر





حسبي الله ونعم الوكيل الثلاثاء27/10 حصلت مهزلةفي الخطوط السعوديةعانى فيهاركاب رحلة5عصرا جدة-الرياض معاناةدامت حتى2فجرا بعد تأخر رحلة ال5عصرا من جدة إلى الرياض تم احتجاز الركاب في الطائرة حتى الثانية فجرا لمعرفة السبب تابع هذا الموضوع:
ركبنا الطيارة الساعه 5 مع ان المفروض ان هذا موعد الإقلاع...واكتشفنا انهم دمجونا مع رحلة 6.30
الطيارة فيها شي غريب ..اللمبات اللي بالنص تأشر كأننا في دي جي!! ومع ذلك الطيارة بدت تمشي استغفر الله يارب الحر خانق والمكيفات لاتعمل ولايوجد اكسجين...فقط ركاب الدرجة الأولى لديهم تكييف...ليه؟ احنا مو بشر؟؟!!
لنا نص ساعة مشينا ووقفنا بس ماأقلعنا! وش السالفة؟..اها يمكن جولة سياحية في مطارجدة عشان نفهم فكرة بقنة<حبي كوعك اقرب من المطارالجديد .
يالييييييييييييييييييييل مكتوووومة مقدر اتنفس والمكيف لسه مطفا وما طرنا...الساعه الحين 7 !! واحنا راكبين من 5 !!هذي ثالث مرة يعيدون دعاء السفر والطيارة برضو ما أقلعت...ومشرف الرحلة يطلب من الناس الهدوء عشان نقلع!!
فجأة قرروا إعادة الرحلة لخلل فني...يالله الحمدلله قدر الله وماشاء فعل . بعد العودة واعمال صيانة دامت ساعة أعلن المشرف للمرة الثانية عن الاقلاع (الساعه8) . لم نقلع...وبعد انتظار نصف ساعه أعلنوا الآقلاع للمرة الثالثة...وبدأنا نتحرك..
طبعا الحين الساعة 8.30 وركاب السياحية من 5 العصر بدون تكييف في طيارة في جدة!! يعني ورب العزة حتى شباك مافيه . الركاب المتبقين بالطيارة يحاولون تهوية الجو بأوراق تعليمات الانقاذ


http://twitter.com/#!/e7m7/status/119072603922116608/photo/1
فجأة أخ من الركاب مسوي فيها ذكي دخل واحنا نتحرك للحمام وولع سيجارة !! صفارات الإنذار صارت ترن والمضيفات يراكضون المضيفة أخذت مني الورقة اللي كنت أهف بها وراحت تهف بها الدخان!! ياسلام عشان يشعلل أكثر<<انا جنب الحمام
الأخ طلع رامي السيجارةفي زبالة الحمام تكرمون وممكن الورق يشتعل كله! ومحدعارف ايش يسوي والكبتن للحين مدرعم يمشي عالمدرج. اخيرا قرر يرجع الطيار، وطلعوا جميلات الضيافة قاعدين يدورون بالحمام الغلط..وبكل بساطة لقاها راكب ثاني ووراهم اياها.
الحين الساعه 9 وكل شي تمام..أعلنوا الآقلاع للمرة الثالثة..الرابعه...الخامسة بس للحين ما أقلعنا!! وش صاير؟؟!! ماندري
المضيفة حقتنا لأنها مكتومة زينا تقول لنا كذاب الطيارة خربانةومحد عارف متى بتجهز حتى الفنيين ولاحظوا أننا للحين مكتومين . مازالوا يطلبون طبيب مع اننا في المطار!! يعني مسوين أكشن؟ اطلبوا اسعاف ولا تستهبلون..نعرف انها تمثيلية لإلهاء الركاب. مازالوا يطلبون طبيب مع اننا في المطار!! يعني مسوين أكشن؟ اطلبوا اسعاف ولا تستهبلون..نعرف انها تمثيلية لإلهاء الركاب.
الكل الحين صاروا في مقدمة الطيارة يبغون خبر من الطيار...وهو ممتنع عن التحدث إليهم ومخلي مشرف الرحلة في الوجه. بعد توزيع العصير والماء على ركاب الطيارة اللي (ما أقلعت) أغلب مضيفات الدرجة الأولى اختفوا..ومضيفات السياحية في قلق.
مفاجأه جميلة!! مضيفات الدرجة الأولى دخلن المطبخ وبدأن بالتهام وجبات الدرجة الأولى!! اهنيهم على روح التفاني في العمل. الركاب بدوا يدخلون المطابخ ياخذون موية وعصير للأطفال والكبار في السن بعدما تخلت المضيفات عن واجبهن .
الحين الساعة 10..اعلنوا اننا جاهزين للأنطلاق بس المريض مو راضي ينزل عشان نقلع<<ياليل الأكشن . واللي بقينا ورى معد بيدنا الا نضحك على الأعذار المتخلفة اللي كل شوي تجينا من اللي قدام..حتى مضيفتناقعدت معناوصارت زينا. والأطفال مساكين خصوصا الرضع ميتين من الكتمة..والأمهات فكوا احذية اطفالهم وشعورهم وخلوهم يراكضون بالطيارة كننا ناقصين.
اكتشفنا أن الخطوط مو راضين يبلغون الامن عشان ينزلون الرجال بالغصب ومتكتمين عالوضع كله. بعد ما اكتشفنا ان الموضوع معتم عليه حاول البعض التدخل واجبار الراكب على النزول سدا للذرائع التي تحجج بها فريق الرحلة . الاسعاف نشوفه يجي 3مرات لباب الطيارة ويرجع...وفيه ناس نزلوا للمطار واحنا لسه على امل . الان قررنا التدخل بطريقة أخرى تم الاتصال على احدالمعارف في المطار للتدخل الأمني واجبار الراكب على النزول والتحقيق. نزل الراكب المزعوم...واعلن المشرف عن انطلاق الرحلة وربط الأحزمة والناس طبعا هيصوا...الساعة الحين 11 بالليل تقريبا.
فجأة اعلان جديد من الكابتن البطل (توه يتكلم حضرته)..يرجى من الركاب تغيير الطيارة وستقلع بعد 45 دقيقة<< بدري!!
- رفض.. الركاب النزول من الطائرة إلا للطائرة الأخرى مباشرة ، مما أستدعى تدخل الشرطة. العسكرية لتهدئة الركاب ؟



http://www.youtube.com/watch?v=3KtaZmPxXrY‏
‎ ‏
كلن قعد يدور البوردينج ونزلنا والجنود يعتذرون مننا أما الطاقم محد كلف على نفسه واعتذر الا الأجودي مشرف الرحلة.
طبعا لماركبنا الباصات(طبعا باصات لأنه مطار جدة العظيم) اكتشفناانها كذبة ومافيه لناطيارة<< مع الخطوط مش هتقدر تغمض عينيك .
فجأه نطلونا عند بوابة قالوا الناس ماراح ننزل الا عالطيارة ..قال الموظف وهو يضحك طيارتكم عند بوابة1 . لماطلعنا فوق اكتشفنا أنها بوابة واحد والموظف يستهزيء فينا!! <<
الان الساعة 11.30 واحنا من موظف لموظف وبوابة لبوابة والكل يقول ما لي دخل وانا مو مسئول عنكم!! الركاب انتشروا في الصالة. الركاب اللي كانوا مروقين ويهدون الوضع اصبحوا الان في حالة هستيرية بسبب لامبالة مشرفي الرحلات بالصالة والكنترول. فجأه لقيت حرمة من اللي نزلوا اول ناس...تقول قالوا لنا روحوا صالة الفرسان ريحوا واشربوا موية ولما رحنا طردونا ورفضوا.
فيه ناس مساكين حالتهم تحزن حريم بأطفالهم مابينهم وبين ازواجهم وسيلة اتصال وشكل مامعهم فلوس..قاعدين يبكون وربي منظرمحزن.
فجأةيقال يرقعون جابواوجبات الطيارة بيوزعون عالمحتاجين..طبعا تجمهربعض الرجالوالشباب وهجموا..بعضهم من جدوالبعض مسوي اكشن.
الساعة الان 12 الا ربع والناس انجنوا لأنهم مشوا رحلتين للرياض واحنا واقفين نتفرج يقولون مالنا دخل فيكم. آخيرا يقولون روحوا ثانية لبوابة 1 جهزوا لكم رحلة<< نظفوا زبالة طيارتنا وبيركبونا فيها ثانية. لاحظو وجدنا نفس الطاقم الموجود على الطائرة السابقة مما يعني وجود نفس الكابتن العظيم اللي سكر على نفسه وقت المريض اللي رفض ينزل ... الطيار اللي يحسب نفسه أعلى مستوى من انه يرجع لأحد في الوضع او يهدئ الركاب بنفسه.
وصلنا بوابة 1 وفتحوا العساكر الباب للسيدات أولا<< لاحظوا التنظيم كله من العساكر لأن موظفين الخطوط مو راضين يتعاونون. بدأ بعض الركاب بتولي مسئولية مساعدة العساكر في التنظيم وكلهم من كبار السن فوق 60 سنة. بعد دخول السيدات والأطفال المدخل تم دفعهم للخارج بحجة تنظبم البوردينق والرجال يدفعونهن من الجهة الأخرى رغبة بالدخول.
النساء والأطفال يختنقن بسبب التدافع وموظف فرفور من الخطوط يرفض العمل لأن أحد (الشيبان) عصب عليه<< يقول عشان يتأدب.
خف ربك ياشيخ الناس لها 7 ساعات مخنوقة وأنت جاي بتأدبهم؟لاحظوا أن الشايب ماسبه بس رفع صوته يقول له يالله الحريم بيموتون.
سيدة شجاعه يأست بعد طول انتظار فبدأت تصور الموظف فيديو وصارت تهدده فيه هو والعساكر.



‎http://www.youtube.com/watch?v=usFTnsVZKz8
بنفس وقت التصوير انا طلعوني على جنب لأني كنت مكتومة وجاني واحد من الطيارين وصار يعتذر ويقول مالهم ذنب. قلت له ماعندنا شك بس راعوا نفسيات الناس اللي محبوسة 7ساعات بدون اكسجين..يرضيك طفل زي هذا يبغى يأدب الشايب؟
جاني الثاني وقال اصلا هو مو عارف وش يتبع؟ نظام الجهاز ولا يمشي بالأرقام؟ فقاعد يسوي فيها ويتمنن. قلت ياخوي احد يتدخل، قام الأجودي الثاني قال خلاص انا بامشيكم جيب يافلان ورقة وقلم وخلنا نرقم اوراقهم ونخلص.
مع العلم بان الفرفور كان للحين عالكمبيوتر يتصارع معه والكلام السابق ذكرته بس انصافا للأشراف الذين ظلموا بانتمائهم لمؤسسة فاشلة لاتعاقب. قصدي أن الخطوط فيها ناس شهمه بس لأن الإدارة ماعندها عقوبات صارمة عالناس السيئة صارت الأغلبية سيئة جدا<< من أمن العقوبة. المهم فتح الرجال اللي قلت لكم بوابة ثانية للناس وناداهم وقعد الفرفور والجنود اللي معاه مكانهم مو عارفين وش صاير.
واحد من الجنود ينادي ويسأل عن السيدة التي قامت بالتصوير ووجهه أحمر مسكين يقول تكفون لا تفضحونا وتنشرون الفيديو<< طبعا الجنود مالهم ذنب بس مسكين مقهور. الجنود يحسون أنهم مقصرين مع انهم الاجواد كانوا يحاولون المساعده بكل الطرق والمشكلة هي من سوء تنظيم كنترول الرحلات. طبعا دعينا للرجال ونزلنا والناس للأسف انجنوا معد يقدرون حتى ينتظرون الترقيم الجديد قاموا دفوا الجندي وركبوا الباص غصب. والجندي يضحك على الموقف لآنه حاس في الناس حتى الأجانب اللي معانا يصارخون بلغاتهم ويضحكون<< فرنسية وامريكية وراي يصارخون.
ركبنا الباص ورجعنا للطائرة والناس كلها تصارخ وتضحك محدعارف وش بيصير<< الساعه الحين 12:30 . الناس هجوووووم عالطيارة والمضيفين نفس الطاقم وبعضهم واقف يعمل والبعض متكي على المقعد وقاعد يسخر من الركاب. هههههههه مضيفة من الأمينات تحاول تطلب البوريدنق...من جدك انتي !! حبيبتي مابعد نسينا أماكننا حتى المطبخ صرنا نعرف كل رف وش فيه.
الحمدلله الكل جلس,,,وللآسف ما فيه اعتذرا أعلن ولا حتى أي معلومات.. الكبتن ساكت ,,,والساعة 1 الا ربع حركت الطيارة.
اشتغل الشريط حق السلامة...وكل ركاب السياحية بصوت واحد يضحكون لما قال راكب حاااافظينه والله.
وصلنا بالسلامة مطار الرياض...الساعة الآن 2 صباحا بعد معاناة دامت تسسسسع ساعات داخل الطيارة,غير وقت الانتظار قبل الرحلة.
طبعا حدثت أحداث كثيرة جدا ومضحكة في الرحلة لكن للأسف اغلب الركاب فضى شحن جوالاتهم بس يمكنكم متابعةبعضها على ‏ @e7m7 و@el3ammah على موقع تويتر.
اتمنى من كل شخص أمين غيور على بلده ويعمل في الخطوط الجوية السعودية متابعة هذا الهاشتاق والاستفادة من آراءنا فقد لانفهم في قوانين السفر ولكننا بالتاكيد نستطيع أعطائكم بعض الاقتراحات للتحسين وسأبثها كالتالي:
أولا: يجب التحقيق بعد كل مشكلة مع الطاقم وفرض عقوبات صارمة ع المضيفات المهملات حتى لايفقد الأمين حماسه بسبب التهاون فللأسف هلكت المضيفات الأمينات بمحاولة التهدئةوتوزيع مرطبات في حين الاخريات مشغولات بالأكل أو الاسترخاء والتحدث بالهاتف.
ثانيا: اشعار الطيار بالمسئولية وحق الركاب والطاقم عليه في إعطاء تبرير صادق لما يحدث حتى لو كان بجملة لا أعلم حيث أن عدم رد الكابتن على المضيفين جعل كل منهم يذكر عذر مختلف مما أفقدهم ثقة الركاب وسبب هيجانهم.. تذكروا أننا مسلمين ونستطيع بكل بساطة تقبل فكرة أن الطائرة بها خلل..فهذا أمر وارد ولايمكن الاعتراض عليه.
ثالثا: في حال وجودحالة مرضية ونحن في أرض المطار المسارعة بتبليغ العمليات وعدم التكتم على الأمر..مع المعاقبة على التأخر.
رابعا: في حالة رفض المريض النزول يطلب تدخل أمن المطار فورا فوضعه لايختلف أبدا عن مختطف الطيارة لانه احتجز ما يقارب من 700 راكب داخل الطائرة عدا عن ان وضعه ولا يحتمل التأجيل . الأمن جهة يفترض أن تكون معينة للخطوط ولا يجب النظر للأمر على أنه معيب أو مهين<< الطاقم شعروا أنها فضيحة
خامسا: تحجج كنترول الرحلات في المطار بعدم قدرتهم على المساعدة بسبب استلامهم للوردية حديثا..وعليه من المفترض أن لا تسلم الوردية دون شرح كامل ومفصل للحالة وكتابة تقرير...وهذا النظام معروف في كل قطاع بل ان بعض القطاعات تشترط عدم انصراف افراد الوردية الأولى حتى تحل المشكلة وينتهي الوضع.
سادسا: التأكيد على التعاون الحقيقي بين موظفي الخطوط والأمن، فما لاحظناه هو أن موظفي الخطوط يعاملون الجنود بفوقية وعدم اكتراث مع انهم بحاجتهم في تنظيم الدخول، وهو مادعى لحدوث الفوضى وهيجان الركاب أكثر من مرة وحالات الاختناق
اخيرا اود التأكيد من جديد بان اعتراضنا لم يكن على الخلل الفني بل البشري! فللأسف قلة هم من أبدوا تعاطفهم مع الركاب.
سبحانك اللهم وبحمدك اشهد ان لا اله الا انت استغفرك واتوب اليك
___________
بصراحه تستحق النشر لذا نسختها من تويتر - عشنا مع الاجودية اللحظات حيا على الهواء