توني جايه من إجازه .. من يومين بس .. مده الإجازه كانت 21 يوم ..
انا وزوجي كنا بفارغ الصبر ننتظر هذي الإجازه وكنا مخططين على سفره..
بعد التشاورات والمباحثات قررنا نروح للي ما تتسمى ((تايلند)) الناس طاحو فيها طيحه قشرا..
اللي يروحون لها اربع سنين ورا بعض .. واللى خمس .. واللي ثلاث..
قلت انا وش حيثنا حنا ما نروح بعد؟؟؟
خلينا نشوف الناس وش طابين فيه ..
يقولون احلى من ماليزيا!!!! يخسون !! والله يا ماليزيا فيها جنه الله في ارضه .. يكفي النظافه!!!
المهم ظفينا الغفش وزيننا الشنط وخليت ولدي عند اهلي ومشينا للمقروده!!
المخطط كان
7 ايام في بوكيت المخيسه
4 ايام في كوسوموي الكيئيبه
4ايام في شنغماي >>>كانت اهونهم
5 ايام في بانكوك اللي الين الحين ما لقيت لها وصف من شينها!!!
اول شي مده الطيران 6 ساعات!!
ولانه ما فيه طيران دايركت من السعوديه اضطرينا نروح بالإماراتيه.. وهذا يعني ترانزيت 4 ساعات في مطار دبي!!
وصلنا مطار بانكوك وكان مررره حلو واخذنا طيراه ورحنا بوكيت اللي الناس ماخلو شي في مدحها!!
جزيره كبيره مليانه من ذا الأجانب المصاليخ اللي متجدعين على البحر!!
طبعا جايين قروبات .. واللي جاي لحاله ما يقصرون التايلنديات يسوون له ((رفقه))
الجو حاررررر.. ورطوبه ... وما فيه شي يتسوى بالبلد غير الرياضات المائيه!! بس هذي ما تاخذ منك غير يوم واحد بس!!
اليوم اللي بعده رحنا لجزيره (في في)
وهذي الجزيره تبعد ساعه عن بوكيت بالقارب.. ونروح مع قروب.. ومن حظنا قروبنا كله اجانب!!
يعني بالعربي مصخره المايوهات والحركات اللي مالها داعي .. بنص الرحله للجزيره يوقفون ويعطزنك نظاره>>>انت تستاجرها مهب بلاش..وتغطس تشوف السمك الملون تحت الماء..
طبعا انا ما نزلت .. بس رجلي نزل قعدت على القارب لحالي انا وعروس هنديه ... ياعمري مستحيه..
هي الشي الوحيد اللي وسع صدري بها الرحله المملهزوجها جري ويبيها تتلح لح وتعيشه الجو .. بس ماش ما قدر بالأخير سفهها ونام!!!
وصلنا الجزيره وكان فيه غدا .. الله يكرم النعمه نوعين رز>>> احد ياكل رز على الصبح!! ومقلي بعد!!
وسمك مغطس بصوص حلو >>>فيه سكر او عسل.. ما ادري
والباقي خنزير!!!
طبعاانا ما اكلت بس شربت ميرندا>>>اذا صارت موصله معي اشرب ميرندا حمرا
الجزيره ما فيه ولا شي غير كراسي على الشاطي والعالم متجطله ونايمه وانا لا من سنه ولا من جماعه... لا نيب سابحه ولانيب متشمسه!!
انسلقت انا وحجابي !!
قعدت اقنع رجلي يسبح عشان يروح الوقت .. طقت كبدي!!!
ما صدقت قالو رجعنا .. اول من ركب القارب انا .. من الحماس قعدت اساعدهم يركبون القارب :)
زدي يعجلون علينا..
ملاحظه :: الهنديه كانت نايمه !!
رجعنا للفندق ونمنا الين الساعه 3 الفجر وبعدين قمنا ورحنا للبحر وقعدنا الين جت حزة الفطور و افطرنا ورجعنا ننام!!!>كننا جايين عشان ننام!!
طبعا الديره ما به مراكز تجاريه الا واحد ومخيـــــــــــــــس!! رحنا تقهوينابه!!
وما يفتحون الا 10 الصبح..
عندهم عرض زي المسرح.. اسمه فانتزي شو..
ما عليه مش بطال!! بس انه الساعه 7 الين 10 يعني بالنهار اقعدو قصعو قمل..
العرض عباره عن رقصات بس متكلفين والله.. يقولون انه مصمم بلاس فيغاس..
انا استانست فيه بس رجلي طفش!! انا احي الألوان والمؤثرات .. بس هو لأ!!
وبرا فيه افيال يركبونك عليهن وتدور عشر دقايق ويصورونك وتنزل وقضت الكشته..
والعشا في اكبر مطعم بالعالم.. الأكل الله بالخير بس اهوه عن قولة اننا ما تعشينا..ورحعنا للبيت.. قصدي الفندق..
الديره غاليه .. يعني ما فيه رخص .. وحنا ما نبي نتسووق الا بالأخير عشان ما نشقل معنا عفش..
فيها شاطيء اسمه الباتونغ هذا اللي طيرونا فيه والله ما به بعد عن شاطئ نصف القمر!!
الخلاصه :: بوكيت ما هيب على وصف الناس وكلامهم,,
كوسوماي
هذي اللي ماتتنتحدر!!!
وع وع وع ممله وكئيبه..
وما فيها شي ابد ..يقولون انها ثاني اكبر جزيره بعد بوكيت..
بحرها راكد لأنها بالخلبج والله انك تشك انه بحر .. ابد ما فيه موج كناه مستنقع!!
والديره حاره ..وفيها شاطئين .. كل واحد اوصخ من الثاني .. ولا فيها اي نشاطات او اسواق او ترفيه!!
وش سويينا .. استاجرنا دباب!!!!
وصرنا من الفندق للشاطئ نتغدى ونرجع الفندق.. قريب من الشاطئ فيه محلأت.. (((شرينا برزن بريك )) وقعدنا نتفرج عليه.. خرطنا الحلقات كله..
الدباب وناسه.. اخذنا خريطه ورحنا للشلالآت نوعا ما مقبوله .. هذا الشي الوحيد اللي فيها زين..
اللي بعدها شنغ ماي
هذي حلوه انبسطنا فيه.. اولا ماهيب ساحليه عشلان كذا بارده ((نوعا ما))
ما فيه تفصخ بالعكس كل اللي غيها لابسين حلو ..
رخيــــــــــــــــــــــــصه كل شي فيها سعره حلو ..
الأكل.. المواصلات.. التسووق... والنت فيها مجانا..
سكنا بفندق مررره حلو وقريب من النايت بازار... السوق اليلي .. وسيعة صدر
حضرنا فيها عرض يشبه اللي في بوكيت .. بس انه اقل مستوى .. بس مايصلح للي معهم بزران او شباب.. فيه مفاصيخ .. يشبه عروض برودواي ..
فيه مطعم هندي هناك اكله مش بطال ..
وفيها شي مررره جميل وهو الينابع الحاره بصراحه شي خيالي..
تبعد 60 كيلو عن المدينه .. رحنا لها بالتوكتوك!!
وفيها تحس بالطبيعه
وصلنا هناك وواخذنا حمام خاص واستمتعنا بالمويه الحاره اللي من جوف الأرض .. من شده الحراره
يسلوقن فيها بيض...!!! وتشتريه عشان تاكل منه
تخيلو نروح ونقعد هناك 4 ساعات ونرجع للفندق ب 50 ريال بصراحه مررره انبسطنا
ياليتنا قعدنا فيه ولا في بوكيت المخيسه!!
بانكوك
الديره لها روائح ماهيب ريحه وحده!!!
وع!!!
تحوم الكبد اربع وعشرين ساعه تشمون روايه بيارات وانتم بكرامه!!
يطبخون بالشارع!! تشوف العربيات عليها قدور مليانه من هالمرق اللي ما ادري وش يطفح فيه..
ويقلون ديدان وصراصير وضفادع !!
والله انها كابوس ..
فيها تلوث غريب !! كل شي فيها ملوث ..وبعدين الخراب فيها شائع..
من الساعه 7 يطلعن بنات الكلب بالشوارع يتصيدين!!:angry2:
والأسعار في متناول الجميع!!!!!!!
اسواقها حلوه للنحاف .. يعني مقاشك xxs حياك الله تقل بزران !! اذا انت طويله عليك العوض
او مليانه احسن لك لا تروحين ..
شنط التقليد مليانه .. بس تقليد الله بالخير .. كل شي عندهم تقليد ..
النظارات.. الساعات .. المجوهرات.. الشنط.. المحافظ.. الملابس الداخليه الرجاليه..كل شي!!
وبسطاته واجد .. مافيه شارع يخلو من البسطات!!
وتبقى مشكله الأكل ... الله يكرم النعمه صرنا ما ناكل الا خبز وجبن ..
الله يخرب بيتك يا تايلند .. وش قردنا وخلانا نروح.. والله اني يوم وصلت مطار الملك خالد اني بغيت اخمم الناس من الفرحه .. ياحلو السعوديه ..
والله لو رايحين ابها اصرف :angry2: انا ورجلي جانا اكتئاب من ذا الفنس الله لا يعافيهم..
بس ودي ادري وش صار للهنديه اللي في بوكيت؟؟!!
الله يعينك
بس يمكن خيرره لكم
لاتعصبين