اكره بيتي

السلام عليكم

اخواتي اتمنى منكم الدعاء لي بزوال همي

مشكلتي مع اهل زوجي ,,,,
تزوجت من 6 سنوات بداية حياتي كانت رااااائعه بمعنى الكلمه زوجي كان يموت فيني وكنا مبسوطين ,,انا ساكنه بشقه فوق اهله ,,واهله امه واخواته مالهم شغله غيري يراقبون فيني
بدت حياتي تتغير مع زوجي من بعد ماكنا كل اسبوع نسافر نتمشى صرنا مانطلع حتى لو داخل ديرتنا صار يكره شيء اسمه طلعه صار يطلع يسمر ما اشوفه الا الفجر تغير علي مره كان يعطيني مصروف وقطع عني هالمصروف بخيل معي الى ابعد حد من بعد ماكان كريم لدرجة اني اذا رحت لاهلي اسبوعين بس مصروفي 4000وشاري لي كل شيء قبل اسافر يعني بس حق دلع
هاللحين لو شامبوا اطلبه انطق شهر علشان اشوفه

بيتي وفي غرفتي طلع لي مثل الدود الاسود وطلع في لحظه انا شايفه الغرفه الظهر مافيها شيء والعصر الموكيت كله دود كنسته وشلته ومازال مستمر الى الان

احلامي كلها ثعابين وكم مره افسر حلم منها ويتفسر على اني محسوده من ناس قريبين لي واخالطهم وحاسديني لاني ناجحه ومتميزه

وبالفعل اول زواجي كانوا ينبهرون بكل شيء عندي واذا سويت عشا او فطور كل يتكلم فيه
تخيلوا زوجي يكره اكلي الآن ماياكل شيء من يدي ولاعاد يسوي عزايم ويقول لي بصريح العباره اخاف تفشليني

انا افشلك من قبل ما اتزوج وانا اعشق الطبخ والحمدلله متميزه فيه حتى هو كان ينبهر بالسفر اللي اسويها وبعد كل سفره كان يشكرني ويمدح فيها ويدعي لي
واذكر فتره زوجي سمن وزاد وزنه مره وقالت لي بنتهم زوجي يقول ابو فلان سمنان اكيد من فطور فلانه
والله ان زوجي هاللحين زي العود نحيف ويكره اكلي كره يتغدى اذا كان الغدا من برا شيء انا اطبخه ما ياكله

وش اللي تغير

المهم احلامي كلها تؤكد لي حاجتي للرقيه وانها عين
وانا اعرف انها منهم لاني كذا حلم تفسر انها منهم اخذت من اثرهم واغتسلت
والان انا بعيده عن بيتي عند اهلي

لكن ماعاد لي نفس ارجع بيتي كرهته وكرهت جيرتهم وتعبت من مراقبتهم لي لو بافتح باب بيتي عرفوا اني فتحته الساعه الفلانيه وتحقيق وين رحت مطلعين على كل شيء بحياتي ولو اجلس يوم مانزلت لهم طلعوا لي
حتى لو يقضي زوجي للبيت يعرفون ويجهزون ورقتهم يبونه هو اللي يقضي لهم مثل ماقضى لنا مع ان ابوهم موجود ويقضي



المشكله سكنت جاره لي عروس تحت شقتي ومقابله لهم اذا اجتمعت معهم اسمع سواليفهم واعرف كيف يراقبون هالجاره اليوم راحت اليوم حطت اشترت وجابت شكله مدلعها هذا كل كلامهم عنها

وجارتي هاللحين تشتكي من زوجها ومقفل عليها نفس حالتي 24 ساعه واخر خبري فيها طلعت لاهلها زعلانه تخانقت مع زوجها وسافرت لاهلها هي ماقالت لي شيء هم ماشاء الله اللي يعلموني عنها سامعين كل كلامها مع زوجها وشايفينها مع الشباك لما طلعت
والله ان كل اللي ذكرته عنهم صحيح يمكن ما احد يصدق ان في ناس كذا لكن هذا اللي حصل معي

وفي اشياء اعظم الكلام عنها يطول

انا تعبت منهم ومن العيشه معهم ماعاد لي نفس ارجع بيتي ودي انقل منه بس مدري كيف اقول لزوجي
حياتي تدهورت وبسبب عيونهم
دعواتكم ان الله يكتب لزوجي نقل في القريب العاجل ونطلع من عندهم ونستقل بحياتنا وان الله يريحني انا وزجي من الهم اللي احنا فيه
لي الان اسبوع ما ادري عن زوجي ولاحتى كلمنا من بعد ماكان يكلمنا في اليوم الواحد اكثر من 3 مرات
تكفون اخواتي بحاجه لدعواتكم
واللي تعرف رقم شيخ يقرا في الرياض ترسل لي الرقم كل مالمت شيخ من اللي ارقامهم موجوده عندي القاه مسافر وموقف الرقيه

دعواتكم لي