اكسري الروتين ـ استغلي الوقت ـ استكشفي هواياتج النائمه ((بالتنظيم ))

اليوم بتكلم عن ثلاث نقاط كلها مرتبطه ببعض
١/ كيف تكسرين الروتين اليومي الممل
٢/ كيف تستغلين وقت الفراغ
٣/ كيف تستكشفين عن هواياتج النائمه
🌸ملاحظه :

-كل وحده تفرق عن الثانيه وكل وحده عندها اولويات او امور اهم من الثانيه (( عشان كذا راح اتكلم عن نفسي بهالموضوع ولي تحب تقتبس منه تاخذ راحتها ))

-وايضا في البعض ممكن تقول ليش اقعد اكتبها وانا اعرف شنو لي وشنو علي 🤔؟! (( كلامها صحيح لكن منو منا ماقالت لو مره مالي خلق اسوي هالشي الحين بعدين ولا بكره وتأجل وتأجل لي مايتراكم الشغل وتنضغط ؟! انا كنت منهم 😅خخخخخخ لكن لما تكتبينها تكونين ملزمه فيها لازم تسوينها بوقتها اولا لنفسج ولراحتج وايضا لصحتج👌🏻



🌸🍃في البدايه :🍃🌸

انا اول كنت اعيش بروتين يومي لفترة طويله جدا لي ماجا اليوم الي فجأه غيرت فيه كل حياتي للافضل باذن الله ☺️
🍃شلون تغيرت ؟! تابعي معاي النقاط الجايه واسألي نفسج وجاوبي وشوفي اجاباتج هل هي ايجابيه وتصب بمصلحتج✔️ او سلبيه تصب لمصلحة الاخرين✖️

١/ بالبدايه شوفي نفسج هل يضيع وقتج لمنفعت غيرج (( سواء زوج /بيت/اطفال/دوام/البيئه المحيطه)) وتستنزفين كل طاقتج وجهدج ووقتج لهم وتنسين نفسج او لا

٢/هل عندج الوقت مخصص لج مستقطع من يومج الي تقدرين تمارسين فيه هواياتج او تسترخين فيه او لا ، وليش اذا مافي وقت؟!

٣/هل تاخذين كفايتج من النوم او لا (( لان هو السبب الرئيسي الي يأثر على الجسم والعقل حتى الاخلاق طول اليوم اذا ماكان كافي ،وليش ماتاخذين كفايتج اذا لا؟!

٤/ اذا تمسكين الاجهزه كثير سواء تلفزيون او تلفون وفرفره من قناة وقناة ومن انستقرام وسناب وغيره فاكيد مراح تلاقين الوقت الي تجددين فيه نفسج وتبعدين الملل والكأبه من حياتج 🤦🏻‍♀️ فبتعدي عنهم باسرع وقت

🌸🍃اذا السلبيات اكثر فلازم تغيرين روتينج بأسرع وقت لانه هو سبب الاكتئاب والملل🍃🌸




راح اتكلم عن طريقه تنظيم وقتج في اليوم الواحد (( لان التنظيم هو الاساس في ايجاد وقت مستقطع خاص فيج ☺️ )) وبركز على الزوجة والام وربة منزل بما اني كذلك

اول شي عندي هذا المنظم (( شهري واسبوعي و يومي)) صممته بحيث يكون مرتب ومنسق جاهز للاستخدام عشان حفاظاً على الوقت والمجهود

(( تقدرين تستخدمين اي منظم ثاني ))

(( في ناس تفضل الساده وهي تزينه ـ بالواشي تيب او الستيكرات وبراحتهم هذا شي راجع للشخص نفسه اذا عنده وقت لهشي او لا )) ماعلينا 😅


١/ نجي للمهم اول شي لازم اكون جاده من داخلي بالتغيير لان لو ساعدني احد بتخطي الملل والركود اليومي الي انا فيه بعد فتره راح ارجع لسابق وكأن ماصار شي👎🏻

٢/ اكتب كل شي مهم ابي اسويه خلال اليوم لمدة اسبوع (( تخص البيت من غسل ملابس ترتيب الغرف او المطبخ وغيرها من الاشياء الاساسيه والمهمه

٣/ اكتب الاشياء الي اتقنها من هوايات او شي احب اتعلمه او اجربه مثل :-
- قراءة كتب (( هاذي انا بديت فيها من ٣سنوات 👌🏻جميله ماكنت اتوقع راح استمر فيها 😅 بديت بالروايات الصغيره بعدها توسعت شوي شوي لي ما وصلت للكتب الكبيره

- اعمال يدويه من خياطه ، كروشيه، ديكوباج، تلوين ورسم او اعادة تدوير الاشياء وتجديدها وغيرهم كثير جربيهم وشوفي الاقرب لج وطوريه

- سويلج جدول للعنايه الشخصيه (( من اعتناء بالشعر، الاظافر ، الجلد ، الرياضه ، اكل صحي وغيرها كثير ))

🌸🍃الي ماتعرف هي شنو تميل له او تحبه تبتعد عن اي شي الكتروني لمدة اسبوع وبتطلع الموهبه 😅 ))

٤/ ابدأ ارتب النقاط من الاهم للمهم وانسق بأوقاتهم بحيث يكون فيه بينهم وقت راحه او خاص لنفسي (( دائما وقتي الخاص يكون بعد صلاة العشاء مباشره حتى ١١ مساء ونفس هالوقت اكتب فيه تنظيمي لليوم التالي ))

🌸🍃🌸🍃🌸

راح اوضح اكثر بمقطع فيديو كامل عن طريقة التنظيم (( اختصارا لوقت الشرح )) بتلقونه بالرابط تحت👇🏻

تنظيم وقتج باستخدام الاجنده (( المنظم أو البلانر ))

وصدقيني مجرد ما تنظمين وقتج راح تلاقين في وقت كافي بأنج تهتمين بنفسج وهواياتج او حتى للاسترخاء وراح يختفي من حياتج الملل والاكتئاب والروتين اليومي لان وقتج بكون كله مشغول بالاشياء الملزمه فيها والاشياء المحببه لنفسج💕




🌸🍃اتمنى عجبكم الموضوع ☺️وكتبولي ملاحظاتكم وارائكم لانها تسعدني
وتمنياتي لكم بالتوفيق 🌸🍃