اكشنها مع زهور

السلام عليكم ورحمه الله وبركاته
كيفكم صبـايا ...
اليوم بحكي لكم اكشن ولادتي ^_^
انا نفاس لي 21 يووم
ب​​ﺳمْ آﻟﻟۃ نبدا....«
.
.
.
خلصت الاسبـوع الـ40 وقررو يعطوني طلق صناعـي ..
قالت لي تعالي السبت
المهم يوم الخميس مشيت وطلعت الدرج ونزلت
يمكن 15 د .
بعدها نصحتني وحده بكبو الله يجزاها الف خير
عملت الكبو
..
و جلست في مغطس مويا حار ومسكت جوالي وداقتها بسطه مع صحباتي الكروشات ..
و صليت الفجر وقريت سورة مريم وايات السكينه ...« انصحكم من كل قلبي بـ ايات السكينه ... تهدي البال وتشيل الخوف من قلبكم.
اكلت بعدها منجا و 7 حبات تمـر ..
ورحت انسدحت قلت بنام
قام ظهري يعورني بس الم محتمل
قمت عبيت الكماده مويا حاره وحطيتها تحت ظهري الا النوم مو قادره ..
خفت انها ولاده بس بنفس الوقت ماصدقت قلت اكيد الم عادي ...
قمت استغفر وامشي في البيت الالم كل 5 د
عرفت اني خلص دا طلق حقيقي
شربت منقوع الزعفران وجلست ادعي ..
وكل ماجاني الم جلست القرفصاء وتنتهي الطلقه بسرعـه ..
وقلت بصبر مابروح المستشفى دحين
تحممت بمويا حار يادوب طلعت كانت الساعه 7 وعليها
والطلق ماعد يحتمل
صحيت زوجي بس صحي وانا الطلق يقوى وانا اجلس واصرخ بس بشويش مو بقوه خخخ
صحيت ولدي حبيبي وعملت له رضاعه عمره سنه واربع شهور ..
وديته عنـد جدته ..
ورحت المستشفى وانا خلاص ماعد اتحمل الالم
وادخل الطواري قالت مفتوح 4 سم
وجلست في الطواري يمكن نص ساعه وانا اتالم بس علىَ الصامت ههه واخيرا طلعوني علىَ غرفة الولاده كانت وقتها الساعه تقريبا9
ركبو التخطيط
طلبت ابرة الظهر
وقالو انتظري تحليلك يطلع
واعطوني الابره الساعه 11 ونص بتمام لاني كنت مدنقه واطالع بساعة الفلبنيه
الحـمد اللـﮧ اختفي الطلق
وي دوب انسدحت الا احس بدف مو طبيعي
واصرخ علىَ الممرضه اقلها في شي بيطلع الحقي
قالت عادي ذا راس البيبي بس لا تدفين
وانا اصرخ قلها بيطلع خلاص وهي تقول لا مو دحين تحملي وتنفسي
وتجمعو حولي تقريبا 6 فلبينيات ويخاصمون من قلب وانا مفجوعه ارحمو حالي لا تخاصمو
بعدين خلاص اشوفهم متل الضباب
وجلست ادف واصرخ مو الم
بس دخلت في حاله هستريا
وجات الدكتوره وقالت يله خلص دفي الراس طالع
وانا ادف الفلبينيه حطت لي الكمام الاسود
واني ادوووووخ
وارميه وارجع ادف وطلع المحروس ولدي حبيب قلبي ..
بعدين رجعت للوعي وجاني احراج من نفسي وطيت راسي وجلست استغفر و احمد ربي
واسمع اذان الجمعه
وهم يخطون لي داخلي لانو حصل لي تمزق بس خفيف الحـمد اللـﮧ
طبعا ماعملو لي توسيع ولا شق النونو من تحت ابدا
اللهم من فوق عملو لي اربع غرز. .
وبعدين حطت لي شاش جو وقالت نطلعه بعد 7 ساعات ..
عشان نشوف عندك نزيف ولا ..
خطوني بغرفه تانيه بس برضوه في قسم الولاده
جابو لي شاهي وحبوب وغداء ..
اكلت وشرب نمت لين الساعه 4 عصر
و جاني زوجي واعطاني اغراضي وجوالي ..
وجات الساعه 7 وجات الدكتوره بتطلع الشاش وانا اقلها لا تعوريني
قالت مفروض بعد الم الولاده ماتفكري بـ الم
انحرجت واخرجت الشاش في الم احس بس محتمل

وطلعوني خلاص علىَ التنويم ..
وتوته توته خلصت الحتوته .. ^_^