اكشن وووووولادتي بأحلى ألين مع قصة حملي اللي فقدته

السلام عليكم ورحمة الله وبركاته
اشلونكم نفر نفر كرشه كرشه اشتقت لكم
ابحكي لكم قصة حملي الاول اللي فقدته :( انا ربي اكرمني بالحمل بشهر شعبان 1431 وكان حمل متعب جدا الله يكتب اجري يارب كان تعب نفسي وجسدي ولمن وصلت للشهر الرابع خف الوحم وارتحت شوي ونزلت السوق انا وزوجي وولدي
نتمشى واقضي لولدي لبس العيد ورجعت البيت واتروشت ونمت وعلى الفجر بتاريخ 8 / 11 صحيت ابي اروح الدوام ودخلت الله يكرمكم الحمام الله الا انا بوسط بركة من الدم صحيت زوجي ورحت مستشفى الولادة ولاطفال بالدمام ودخلت عليهم وجات الدكتورة سوت سونار قالت مافيه جنين انتي متاكدة انتي حامل قلت له ايوه متاكدة وانا ببداية الرابع قالت خليني اكشف وكشفت الا الجنين نازل بالمهبل الله يجعله شفيع ليه ولابوه يااارب يالله شعور لايوصف جلست ابكي والدكتورة والممرضات يهدوني قالوا المشيمة ما نزلت لازم عمليه تنظيف وقع زوجي على العمليه ودخلت العمليات على العصر ونص ساعه وانا خالصه بعد العمليه بساعة جتني حرارة مانزلت فوق الاربعين عطوني مضاد ولانزلت كمادات وثلج وروشوني ومافيه امل تنزل سبحان الله كنت اشوف الموت بعيوني جاء الوالد وجلس يقراء على ويرقيني وسبحان الله طلع من هنا والحرارة نزلت من هنا جلست منومه
5 ايام وعطوني موعد على 10 ذو الحجه وقالولي انتبهي لا تحملين الا بعد سته شهور سويت التحاليل وكل شئ كان تمام
رجعت لهم في المراجعه..وقلت لها يادكتورة اكتبي لي حبوب منع الحمل قالت اول شئ لازم نسوي تحليل حمل
والمفاجأة كانت مبرووووووووووووك انتي حامل يالله قد ما فرحت بالحمل قد ما خفت تتكرر مأساتي
حملي الثاني الحمدلله الوحام كان خفيف لكن المشكلة من بداية حملي كانت تنزل على افرازات دم وكانت مستمرة للشهر السادس
كان الحمل ثقيل حرمت نفسي من الخرجات ومن كل شئ يالله خفت تتكرر المأساة كان كل يوم يمر ودمعتي على خدي تعبت مرة وكان الحمل بعد تسقيط متعب من الالم الظهر والبطن والالم النفسي ياارب لاتحرمنا الجنه الطلق كان مستمر معي من الشهر الخامس وكانت الدكتورة تقول احتمال في اي وقت تفقدين حملك الله يسامحها ماكان معي في شدتي الله رب العالمين كنت يوميا ادعي وابكي على سجداتي ان الله يثبت حملي ويثمن تعبي الحمد الله الحمد لله الحمدلله حتى ترضي مرت الشهور الثلاثه الاخيرة بسلام دخلت الشهر التاسع ومن اول يوم بديت امشي في اليوم 4 ساااعات وكنت يوميا اخذ 10 حبات تمر كنت ابي اولد بداية التاسع تعبت من الحمل من شهر 8 عام 31 الى شهر 8 عام 32 سنه وانا حامل مارتحت بعد تسقيطي فكان الحمل متعب فقررت اني امشي وابذل مجهود في التاسع وكنت احكي للبنات بالمنتدي وأقول لهم سبحان الله عندي احساس اني بولد يوم الخميس وجاء يوم الخميس ومن اول ما صحيت قمت اتروش واحلق ونظفت نفسي وجهزت اغراضي كان عندي احساس وجات الساعة 11 بالليل وقلت لزوجي خاطري امشي ورحنا الواجهه البحرية ومشيت الين الساعه 2 انا وزوجي وكل ما وقفت مسكني وقال لا امشي الله يوفقه دنيا واخره رجعنا البيت وصاااار جم ··········· دخلت الحمام واتروشت الا وشوف دم سكت ماقلت لزوجي طلعت وجهزت اغراضي وبداء الطلق معي كان تحجر بالبطن كل 10 دقايق رحت واخذت تمر مع لبن وجلست بمويه وزيت زيتون 10 دقايق وعلى الساعه 4 صار الالم منتظم كل 5 دقايق وقلت لزوجي مسكين خاااف اكثر مني وركبنا السيارة وعلى المستشفى دخلت وكشفت على الدكتورة وقالت مفتوح 4 سانتي خلاص تنويم وانا طقتني ام الركب كلمت زوجي وسوى اوراق التنويم ولبست لبس الولادة وطلعوني غرفه الولادة كانت الممرضه فلبينية ركبو المغديه وجهاز الطلق وكان ماشاء الله منتظم دخل على الدكتور وقال انتي بالاسبوع 36 بدايه التاسع وكشف عليه على الساعه 4:30 وقال مفتوح اربعه قلت متى احتمال اولد قال عالساعه 10 ياربي اتحطمت بس الحمدلله كان الالم محتمل وجات الساعه 5 وشد على الالم سبحان الله طلق البنت في الظهر وقلت للممرضه احس فيه شئ بينزل قالت لا باقي بدري قلت لها عطيني مسكن او اي شئ عطتني الكمام اول مره اجربه صدق يخليكي تعيشي بحلم المهم شافتني الممرضه اصرخ قالت خليني اكشف ويوم كشف انفجعت لقيته مفتوح 10 سانتي ماشاء الله وفجاءة ما اشوف الا الغبار وراها تركض راحت تنادي الدكتورة وانا اصرخ عليها واقول لاتتركيني وربي رحمت نفسي مره شوي الا جات الدكتورة وجهزوا كل شئ وعدلوا السرير واسمعهم يقولون يالله ادفعي ادفعي وكانوا كثير قدامي ودفعت 3 مرات وشرفت احلى الونه يارب تحفظها لي شرفت عالساعه 6 شوي وجاء طلق للمشيمة وعلى طول اخذت الجوال ودقيت على زوجي يابعد عمري ماصدق وقلتله ابشرك ولدت وسكرت ورجع واتصل عليه وقال من جدك ولدتي قلت ايه والله وجبت بنوته جلست ساعتين وبداءت الخياطه بس والله ما حسيت فيها كانت يد الدكتورة خفيفه نقلوني سرير ثاني وقالوا روحي الحمام ورحت وغيرت ملابسي بعدين جابوا فطور وافطرت وعطوني الونه عشان ارضعها وطلعت غرفة التنويم عالساعه 10 وتوته توته خلصت الحتوته
اي سؤال او استفسااار انا حاضرة