عزيزتى قمر تاج شوفى حبيبتى طريقة تاجير السخانات واجد سهلة عن طريق اى شركة تجهيزات غذائية وبنسبة حق الاكلات تعدينهم من الليل افضل لك مثل المحاشى اتلفينهم فقط بدون طبخ واليوم التالى تطبخينهم وايضا الفطائر ممكن اتعدينهم وتجهزينهم والسويس رول نفس الطريقة والكبب وفى يوم العزيمة الشركة راح اتجيب الطاولات والساخانات من الظهر رتبيهم على ذوقك ولاتنسين تطالبين منهم الشراشف لتغطية الطاولات وانتى ابدورك كلما اتخلصين من طبخة حطيها فى السخانة اسهل لك عشان متتعبين بس اختى اخر شى اتحطين السلطات يعنى قبل العشاء بدقائق عشان ماتخرب وخلى الملاعق والشوك والصحون فى بداية البوفية وتكون من النوع الكبير والصحون الصغار حق الحلو وحطيهم اخر البوفية مع ملاعق صغيرة اما الاكلات فهى موجودة فى المنتدى ليش انروح بعيد وباعافية ولاتنسين الدعاء لى

ام محمد اكتبى لى طريقتك فى الششبرك لأنى احب اسويها و على فكره انا اسوي القبوط مثل الششبرك باللبن و مرة اسويها بمرقة حمرا بالنسبة للمحاشى و المقالى (الكبب و السمبوسة) كلها متوفرة عندى بالثلاجة ما اتعب فيها و بصراحة احب الأكل راهى و احب انوع فى الأكل
اصابع المسخن اسويها لعزايم العشاء بس اشلون طريقتج ياريت تكتبيلى اياها و يعطيج العافية

هناء الكويتية شكرا على اهتمامك بموضوعى فانا عندى غرفة بوفيه خاصة للعزائم و فيها طاولات مجهزة بجرارات خشب مسويتهم خصيصا للعزايم ،،،، انا اسال عن سخانات الفضة و ليس السخانات العادية

بالنسبة للمحاشى فانا دائما اخلى الخدم يحضرولى المحاشى و نضعهم فى الفريزر و كذلك الحال بالنسبة للكبب و السمبوسة و السبرنج رول

البوفيه الى اسويه دائما متشابه فحبيت اغير باكلات غريبة او سهلة تساعدنى (عشان اغير نمط عزيمتى)

فبالنسبة للشوربة

عندى سخانين نحاس متشابهين عميقين صناعه هنديه اخليهم للشوربة و احب اسوى صنفين شوربة دائما واحد طبعا شوربة عدس و الثانى اما شوربة (مشروم او بطاطا او كوسة او قرع)

بالنسبة للسلطات

تبولة و فتوش لازم طبعا
شمندر مع ذرة معلبة طويلة و ليس حبات
سلطة روب مع خيار و نعناع
سلطة معكرون
سلطة بطاط
و اشترى من المطعم حمص و متبل جاهز

السخانات
ورق عنب
كوسة محشى مع المرقة الحمراء
مجبوس لحم
بريانى دجاج
مطبق سمك
مربين روبيان
لزانيا
معكرونة مع بشاميل
يريش

الحلويات انواع متنوعة من الكيك(تمر، فستق ، جيس كيك ) و حلو قهوة (من المنتدى حصلت اشياء وايده انوع فيها كل مره ) بالإضافة الى المحلبية و طبقات الكستر و الجلى

فانا مليت من هالمنيو الذى دائما متكرر فحبيت اجدد فيه :

اغير السخانات من استيل الى فضة
غرفة البوفيه اغيرها يعنى مثل اضيف الشموع و الزهور فيها
اغير انواع الأكل عن الأكلات المتكررة

فى قسم الديكور ماشاءالله الأخت ام فرح مو مقصره بالبوفيه و استفدت منه وايد و لكن اردت ان انوع فى الأكل نفسه الذى اسويه دايما

شكرا هناء على اهتمامج و ياريت اتساعدينى بوصفات و طرق جديدة و انا دائما ادور فى المنتدى على اكلات جديدة بس حبيت اشوف اذا فى احد عنده اكلات مجربه تنفعنى

قمرتاج الله يسهل عليج وإنشاءالله تضبط الامور كلها معاج ..

شوفي حبيت أفيدج باللي عندي راح أقولج بعض الطبخات واللي يعجبج منهم خبريني علشان أكتبلج الطريقة :

- الشوربات (شوربة الكويكر جدا لذيذة وأختي دايما تسويها في العزايم ،، مفيدة حيل ولذيذة )

- السلطات (سلطة الذرة مع المايونيز وغيره ... سلطة الجرجير تغيير عن السطات العادية والبنات مجربينها بعد)

- الاطباق الرئيسية (في طريقة للمعكرونيا وايد لذيذة ... بصراحة مانستغنى عنها في البوفيهات ... تصرير ثلاث أنواع من المعكرونيا (إسبجتي + معكرونيا الاسطوانية + الحلزونية) ومعاهم دجاج طبعا يكون قطع يعني بالعظم ماله ومعاه طبعا الفليفلة وغيره وشبنت وهالسوالف) يعني بدل لاتسوين معكرونيا بالباشميل هذي تغيير عنها ..

وتقدرين تسوين سخان كله مشاوي ومزينته بالبطاط المقلي والبقدونس المفروم .. يعني سوي شيش طاووق عزيزة بصراحة الكل يمدحه وسوي معاه كباب لحم ... ترى المشاوي حلوة في البوفيه

وهمن نسوي كنتاكي ترى شي بالبوفيهات ... بالطريقة اللي تعجبج وإذا ماعندج خبريني بعطيج طريقتنا ..... وفي عندج بعد دجاج مسحب مع الصمون الصغار ... تشترين الصمون الحجم الصغير وتسوين بعضه دياي وبعضه همبرغر صغار وبعضه خلطة لحم مفروم .....

وورق العنب أنصحج تسوين ورق عنب لاتنسو أسرانا وبصراحة لذيذ حده وراح الكل يسأل عنه وتقدرين بنفس الجدر تحطين نصه ورق عنب ونصه ملفوف ... والخلطة تسوينها من باليل وتحطينها بالثلاجة ..

والحلويات : تسوين طرق عزيزة كلها مضمونة ماشاءالله عليها .. يعني المعمول بالتمر وايد حلو اللي على شكل رول ويصير نفس السينبون .... وهمن فكرة حلوة تسوين سينبون بيكاتشو تراه حلو وجديد على البوفيهات لأنه منتشر حاليا ... وسوي حلو الرمان إذا تبينه أعطيج إياه يصير ثلاث طبقات هذا حلى سفرة يعني .... طبقة كيك جاهز وبعدين خلطة لونها أبيض فيها دريم ويب وغيره وبعدين جلى أحمر تنثرين عليه رمان .... أو تسوين مكعبات الشوكولاته لأن شكلها حلو وراح تلاقين رابطها في توقيعي ............... وبعد شنو ياربي ... يعني مبدئيا هذا اللي في البال .. إنت شوفي وخبريني إذا تبين بعد بشوف أفكرلج زيادة ..

رقيقة بعد عمرى ما قصرت اردت كل مقادير الأكلات المضبوطة التى ذكرتيها عشان اجربهم قبل لا اسوى بوفيه ثانى فانا تقريبا اسوى اكثر الأكلات التى ذكرتيها بس تعرفين من شخص الى شخص يختلف فانا احب اجرب الأكله بطرق مختلفة فياريت اذا مافيها غلبة تحطي لى الرابط للوصفات و يعطيج الف عافية

و اذا اجت على بالج اى فكره للبوفيه ياريت تنورينى فيها

قمر تاج قوليلي بالضبط أي وصفات تبينهم علشان تريحيني جذي ...