اكلمكم وانا منومه في المستشفى ..طمنوني ...ممكن تكون ولاده قبل التاسع بيومين؟؟

السلام عليكم
بنات اكلمكم وانا منومه بالمستشفى
انا اخر دوره لي 19 / 11 هجري

وعلى حساب الدكتوره ادخل شهري التاسع 4 من شهر ثمانيه يعني الثلاثاء
هذا يعني بعد يومين
المهم انا امس بالليل اخذت غفوه الساعه عشره
وجا زوجي 12 بالليل وقعدني يوم قمت حسيت شي قاعد ينزل مني على خفيف

رحت الحمام لقيت ملابسي فيها مويه تقريبا كثر الكوب تجي زي المويه مع افرازات بيضا وخيوط دم
انا خفت وقمت ابكي علشاني بكريه وقلت لزوجي شكلها ولاده
وعلى طول طيران للمستشفى
حطوني تحت الملاحظه فحصوني قالت لي الدكتوره الرحم مفتوح 1 ونص سم

وقالوا لازم تنويم وانا الحين منومه لي ست ساعات حطوا لي مغذي ومضاد وعطوني ابره لرئه البيبي
وقالت بعد 12 ساعه نعطيك ابره ثانيه
وقالت وزن البيبي كويس 2 كيلو !
ياحياتي احس انه صغير

وقبل شوي جتني الدكتوره المناوبه مدري وش جنسيتها بس انقهرت
مافهمت عليها ولا فهمت علي مدري وش فايدتها ودي اسألها اسأله كثيره لكن مافهمت علي
لكنها شافت المويه واللي فهمته منها انو مدام المويه اللي تنزل عليك شويه ومافيه الم اجل مافيه ولاده لان البيبي لسه مااكتمل تقول باقي لك اسبوعين! تخيلوا
يوم حاولت اسألها مافهمت علي قالت تجي دكتورتك اللي انتي متابعه عندها وهي تقرر حالتك يعني بعد الظهر
انا بصراحه مدري وش راح يصير لي ومتوتره هل ممكن تكون ولاده خاصه انو مستمر معاي نزول ماء الجنين بس على كميات قليله لكنه مستمر مع دم خفيف هل ممكن تكون ولاده ولا ارجع للبيت احسن لي على قولة الدكتوره
طيب كيف ارجع البيت ومويه الجنين قاعده تنزل علي
* والسؤال اللي ودي اعرف جوابه انه بعد مايعطوني ابره الرئه للجنين كم ياخذ من الوقت علشان تكتمل رئته
يعني لو جاني طلق وانفتح الرحم وولدت هل فيه خطر على البيبي لانه مااكتمل

واخيرا هل تنصحوني اخذ محرضات للولاده ولا اريح نفسي
ومثل وش اخذ؟
ولاتنسوني من دعائكم ان الله يسهل علي ولادتي ويرزقني المولود المعافى بكامل صحته يااااارب