اكواب كودو الدجاج

السلام عليكم
اكيد الكثير يحب الكودو ... شرايكم نسويه بطريقه مختلفه شوي وبتقديم مختلف ....
يلا مع بعض
المقادير :
صحنين دجاج فيليه
نص حبة فلفل رومي ( اخضر - احمر - اصفر)
2 بصله متوسطه
ملح + فلفل + بهارات
نص كاس كريمة الخفق + 2 ملعقة صلصة الصويا المالحه او المعتدله
خبز فرنسي (افضل هرفي )
جبنة موزريلا مبشوره
الصوص : علبة زبادي + ملعقتين مايونيز + ملعقتين خردل + ملعقة كاتشب + ملعقتين عصير ليمون + ملعقه صغيره خل ( تقدرين تضيفين شطه اذا تبغينها حاره )
الطريقه :
- تقطعين الدجاج مكعبات قد ما تقدرين صغيره وتطبخينه على النار بدون اي اضافات
- تقطعين الخضار (البصل والفلفل) مكعبات صغيره وتحمسينه بزيت على النار بعدين تضيفين الدجاج والملح والفلفل والبهارات
- نخلط في كاس الكريمه والصويا ونصبها على الدجاج ونقلب
- نتركه على النار لين يبدا ينشف بعدين ابعديه عن النار
- اخلطي مقادير الصوص واتركيها على جنب
- الحين راح نشتغل بالخبز وهذا يعتمد على نوع الناس اللي بتقدمينه لهم .... اذا كانت مجرد عشاء عادي ... يعني هي الطبق الرئيسي .. تقسمين الساندويتش انصاف او اثلاث مع استبعاد الاطراف من البدايه عشان تتشكل لك قاعده .... اما اذا كانت طبق جانبي بعزيمه ... اقسمي الساندويتش بمقدار 6 سم لكل قطعه ...
- فرغي الساندويتش بحيث ما توصلين للنهايه ... واذا كانت قطعك صغيره كوني حذره وانتي تفرغين لأنك ماراح تاخذين كميه كبيره
- ادهني الساندويتش بالصوص وعبيه من خلطة الدجاج لين النهايه
- صفيها في صينيها جوانبها عاليه ورشيها بالجبن ودخليها الفرن لين تتحمر من فوق
وهي الصوره النهائيه

وهنا انا ما صغرت القطع لأنها كانت عشاء عادي مو عزيمه
اتمنى تعجبكم الوصفه
وبالهناء والعافيه