أختي كلوبترا الشام :مشكورة على مشاركتك بس أختي أنا كنت عايشة بامريكا فترة بسيطة (7)سنوات وكنت أشوف صديقاتي الغير سعوديات وهن يسوقن والله ثم والله كل شئ على روسهن لدرجة صديقتي ليبيه وهي عليها الطلق تروح تجيب أولادها من المدرسة وهي بعد تودي نفسها للمستشفى علشان تولد .وكل اللي يسوقن هناك العربيات والله كانن يسون كل شئ وحضرة الرجال بس متفرغ لدرسته أو عمله وكل اللي اعرفهن كان هذا نظامهن .بس أنا كنت مستفيدة منهن كنت اروح معاهن للسوق ههههههه

((*****************
اصلن لو اروح لاهلي قال روحي مع اخوك وجيبي كل اللي تبين...مع انها اشياء خاصه في البيت...
(((يا بغضي لهم اذا قالوا ورا ما تروحين مع اهلك)))

أختي ريف الرياض مشكورة على المشاركة .تدرين أنا وش أسمي هذا الاسلوب أسميه شعار (دبري نفسك)) والله ياأختي أني طقت مرارتي من هذا الشعار كان عندنا زواج في الأجازة هنا في الرياض وأقارب العروس اللي هم أهلي وخواتي أزواج خواتي بسم الله عليهم كل وحد منهم جاب زوجته للرياض علشان تحضر الزواج وقال لها أنا جبتك وبس والمشاوير دبري نفسك تخيلي وكلهن يلجأن لي ولاختي علشان عندنا أولاد ذكور قلنا ياحسرة أولادنا مانفعونا حنا علشان ينفعونكن .وأنا عندي سواق وصرت محتارة وين أرسله ولا وين .وخليها على ربك .والله لو أكتب عن هالموضوع من هنا لصبح ماأوفيه حقة .

فعلا يا بنات والله هذا شيء معروف المرة الي تسوق زوجها يقط كلشي فوق راسها .. لاتقولون لا اخواني حكرين وزوجي حكر ومتشدد ومايرضى .. ثلاث أرباعهم جذي في البداية.. تلقينه يعصب ومايرضى زوجته تروح تجيب غرض للبيت بس بعد فترة يبدا يتدلع ويرخي شوي لما يذوق الراحة .. حبيبتي اخذي العيال اليوم معاج للدوام انا بنام ماني مداوم .. حبيبتي مري الجمعية هاتي اغراض البيت انا عندي سهرة مع الشباب ماقدر أمر الجمعية .. ليما عاد خلاص تغسلين ايدج منه .. وتعالو شوفو الحريم عندنا مساكين عن عشر رياجيل .. تطلع دوامها وشايله عيالها معاها تقطهم علدوام واهي رادة تمر الجمعية تاخذ طلبات البيت يمرضون العيال والاخ سهران برا تركض اهي بعيالها للمستشفيات .. تبي الخياط او الصالون يقولها دقي سلف ومشي .. تركض في معاملاتها ومعاملات بيتها وفواتير بيتها .. يخترب شيء في البيت تروح وتدق علسباك وتتابعه الخ من واجبات الرجال .. لاواللي يقهر لما يقولون انتو مدلعين كل وحدة لازم عندها خدامة خلكم مثل حريم اول يشيلون البيت شيل ! طيب انتو بعد قومو بواجباتكم وخلكم مثل رياجيل أول مو كل شي تقطونه بروس السواق وبروس حريمكم ! مساكين الحريم عايشين تحت ضغط كبير .. دور موظفة وجلب لقمة العيش+ دور ربة منزل + دور سواق البيت + تربية الأبناء + متابعة دروس الأبناء + حتى دور زوجها وواجباته هي قايمة فيه.. والشباب مدلعين حدددهم الصبح دوام الظهر نايم العصر انترنت المغرب طالع يرد العشاء يتكشخ ويرد يطلع للديوانية عند ربعه ومايرد الا تالي الليل .. :09: يالله لكم الجنة يا الخليجيات >> اما اخوانا العرب فما شاء الله انا من اللي عاشرتهم اشوف ان رجالهم يساعدون زوجاتهم حتى في شغل البيت من كنس وطبخ ! الله يهنيهم ليت اللي عندنا يتعلمون شوي ..

تصدقون انا عندي الليسن او مثل ماتسمونها الاجازة لكن ماستخدمها الا للدوام ودوامي قريب من بيتنا في نفس الحي .. أحلى شي فيها اني متى ماخلصت طلعت مو مثل أيام قبل لما كنت طالبة في المدرسة كنت تحت رحمة السايق واخواني وكانو دايم ينقعوني.. هذي حسنتها الوحيدة بالنسبة لي .. اما غيره فالحمدلله ماسوق في الليل ولا خارج منطقتنا لان الشباب مايخلون بنت في حالها ! وعندنا قصة مشهورة لبنت قلبت فيها السيارة هي وصديقاتها أثناء عودتهم من الجامعة والسبب محاولة الشباب التضييق عليها .. حسبي الله عليهم حدوها بسيارتهم لحد ماطلعت السيارة برا الرصيف وانقلبت وتوفت اللي تسوق الله يرحمها ..

انا اختيه ابوي محرم علي البيت رجل غريب يشتغل فيه
يعني يوم الامارات كلها (أو معظمهم عشان ما ابالغ)عندهم دريوليه احن ما طب بيتنا دريول ولا طباخ
والله يا اختي مب من قلة الفلوس بس هو خايف علينا
و تم فديت روحه يوصلنا و اييبنا بس احن ماشاء الله وايدين
كم بيوصل و اخواني الي شغلهم في ابوظبي و الي يدرسون برى يعني مافيه غيره مسكين
و كم قعد يتريانا احن البنات على بوابة الجامعة في الحر و هو مريض (والله دمعت عيني يعلني فدا روحه)
تذكرت مرة نسيت انه بييني الساعة الفلانية و كان الظهر و اترياني فوق الساعة و تعب و بعدها رد البيت .. والله اني ليلحين متلومه فيه .
الزبدة اخن كبرنا و اتخرحنا و صرنا نسوق بانفسنا و لا صرت انا أحب أوصله هنيه و هناك وين ما يبى
بس المشكلة ما تعيبه سواقتي :)
ويبنا دريوليات حريم بس الي تسوق خلاص ما تحب حد يسوق بها
الدريولية مخلينها للوالدة و لأغلااض البيت

المهم اختيه / انا اقترح يسوون مواصلات عامة للنساء فقط في السعودية
يعني باصات أو ترام (مثل أوروبا) ما يركبنه الا الحريم
يعني الي ماعندها سواق وممنوع عليكن تسوقن يوفرون لكم باصات

و سلامتج

الله كريم ان شاء الله يكبر ولدي ويوديني ويجيبني ترى عمره سنتين وثمان شهور ابوه في عمله شفتات على طول بمدينه ثانيه وانا لي الله