السلام عليكم ورحمة الله وبركاته
بنتي عمرها سنتين ونص ومازااالت معاااناتها في الاكزيما مستمرة ...ونظرا لإني صرت خبرة من كثر روحة الدكاترة والطوارئ والأدوية قررت أعرض تجربتي لكم عسا تستفيدون منها
ومثل ما ذكرت سابقا : كل اللي راح أذكره مب كلامي..كلام دكاترة وإستشاريين سواء كانو إستشاري أطفال \ حساسية \ أمراض جلدية كما سبق وذكر واللي حابة أظيفه إنه موثق بالبحث من مواقع متعددة عربي \ إنجليزي من النت عن طريقي
وأنا أشجعكم تبحثون وتقرون أكثر عن الأكزيما من مواقع طبية لإنه العلم والإلمام بالشيئ هو أول خطوة في طريق فهمه وفك رموزه
أول شي أحب أنوه لنقطة مهمة جدا ...الكل إتفق عليها من الدكاترة \ المواقع الطبية ......مافي علاج للأكــــــــــزيما غير الرضاعة الطبيعية
هي الشي الوحيد اللي تمنع ظهور الأكزيما عند الأطفال اللي يكون عندهم إستعداد وراثي لها
( الأكزيما تكون وراثة وتكون الحساسية بأنواعها أنف \ صدر \ جلد منتشرة بوضوح في العايلة )
أولا : سبب الحكة عند الأطفال اللي عندهم الأكزيما هو الجفاف الشديد للبشرة ومثل ما هو معروف البشرة الجافة يلزمها ترطيب داخلي وخارجي
داخلي : لازم يشرب الطفل كمية كبيرة من السواائل ( الماي أو العصير الطاازج ) نقطة مهمة جدا لا تستهينون فيها راح تريح الطفل من معااناة كبيرة في الحكة والأفضل تركزون على الماي
خارجي : لاازم ترطبين الجلد كل جالسم يوميا يرطب بإستخدام مرطب طبي خالي من المواد المعطرة والوحيد اللي فيه هالصفة هو مرطب ببانتين اللي خطه زهر ( في منه نوع ثاني خطه أزرق إنتبهو )..
الوحيد اللي كل الإستشاريين رسو عليه لبنتي لإنه طبي وخااااااااااااالي 100% من المواااد المعطرة وهذا كاان عيب بااقي المستحضرات الثااانية ...( سيباميد \ جونسون \ أفين ماركة فرنسية ..كلهم خرطي فيهم نسبة مواد معطرة )
ثانيا : أظااافير الطفل أول بأول تقصينها عشان لا يجرح نفسه وهو يحك وينقل العدوى لمناطق ثانية من الجلد
ثالثا : لو صار والطفل حك جلده وجرح نفسه ..على طول تستخدمين مرهم لوكويد مكان الإصابة بالمسح عشان تشفى ولا تنتقل أماكن ثانية
رابعا : الحمام ما يزيد عن 5 دقااايق بس ممنوع الليفة منعا بااااتا له والشامبو يوم تغسلين شعره تغسلينه بالماي بسرعة وعلى كل جسمه
خامسا : التنشيف بعد الحماام يكون بالطبطبة ..يعني مش بالمسح لإنه الأكزيما لو ظهرت بقعة صغيرة في جسمه ومسحتيها أو هو حكها راح تنتقل لمساحات ثاانية من الجلد ..مثل العدوى
سادسا : الملابس الداخلية لاازم تكوووون قطن 100% و إنتبهي على الشرشف اللي ينام عليه ..لو قدرتي تحصلينله قطن وحرام قطن يكون أحسن...
سابعا : الغسيل بعد ما تغسلين ملابس ولدك إرجعي فضيها مرة ثانية بمي حااارة عشان تطهيريها من بقايا مواد التنظيف
ثامنا : الأكزيما ممكن تطور وتنقلب ربو لا قدر الله معلومة خليها في بالك عشان تصحصحي زين لإبنك وإتابعيه أول بأول وما تكسلين في إستخدام المراهم والماي له
تاسعا : الأكزيما في حالتها الشديدة ممكن تأثر على نبضات قلب الطفل.كيف ؟ يوم تطور الأكيزما زيادة عن اللزوم مثل ما يصير مع بنتي تاكل شي معين وما يناسبها وتتحسس منه يصيرتحت جفونها ينتفخ بطريقة تخوف وأيام شفتها تنتفخ ..لازم ما تسكت تعطي الولد فينستيل والأفضل تاخذه المستشفى طوارئ يعطونه إبرة يكون مفعولها أسرع....وها المعلومة فقط للتنبيه مش للترعيب لإني جديد الدكتور مخبرني فيها
ملاحظة : الأكزيما تختفي بروحها عند بعض الأطفال بعمر السنتين والبعض 6 سنين والبعض عند البلوغ
وربنا يشفي بنتي وعيال جميع المسلمين إن شاءالله
لا تنسونا من صالح الدعاء
أقلام @aklam_1
محررة
يلزم عليك تسجيل الدخول أولًا لكتابة تعليق.
الله يجزاك ألف خير فعلاً كلامك 100% ماشاء الله كأني جالسه أمام الطبيب
الله يشفي ولدي وبنتك وجميع المسلمين
الله يشفي ولدي وبنتك وجميع المسلمين
الله يجزاك خير
نفس معاناتي مع ولدي
ولدي اذا اكل اي شيء فيه سمسم يتنفخ بشكل عجيب
مره اكل حلى وماكمله بمجرد انه لمس شفايفه وكان الحلى هذا من مقاديره طحينيه وتعالي شوفي شفايفه كأنه نافخها بسيلكون!!
نفس معاناتي مع ولدي
ولدي اذا اكل اي شيء فيه سمسم يتنفخ بشكل عجيب
مره اكل حلى وماكمله بمجرد انه لمس شفايفه وكان الحلى هذا من مقاديره طحينيه وتعالي شوفي شفايفه كأنه نافخها بسيلكون!!
الصفحة الأخيرة
عسى الكل يستفيد من هالمعلومات :)