حابة أتكلم معكم عن طريقة في التعامل مع التنمر على طفلك.
قبل ما أبدأ خليني ألفت نظركم لنقطة مهمة؛ الطفل اللي بسمح للآخرين يتنمروا عليه رح بتولد بداخله بذرة التنمر انتقاماً من المجتمع المتنمر، لذلك رح يكبر وتكبر هالبذرة عنده ويتزوج وهو متنمر وأكيد عارفين باقي القصة بعد زواجه.
على الأم مسؤولية كبيرة قبل وأثناء وبعد التنمر.
🌹قبل التنمر🌹
طفلك يحتاج لتأهيل بحيث لو تم التنمر عليه ما يتأثر.
_ فهميه قولاً وعملاً إنه كلام الناس آخر اهتماماتنا، وإنه كل تنمر عليك هو إسقاط لنقاط ضعف المتنمر على الآخرين، هذا يعني إنه المتنمر بيعكس مشاكله بالتنمر عليك، وكل شي بحكيه عنك موجود فيه مش فيك.
_ زيدي ثقته بنفسه يتقوية قلبه، فهميه إنه القوة ليست في العضل فقط، القوة في القلب. إذا كان قلبك قوي وشجاع ما بتتأثر بسلبية الناس مهما كانت.
_ فهميه إنه يحكيلك أي موقف للتنمر تعرضله وما يخاف ويسكت
🌹 أثناء التنمر 🌹
اتفقنا مسبقاً إنه طفلك يحكيلك كل شي، إذن الآن في قصة تنمر عليه، أول شي تتكلمي فيه عن "الاتفاقية" السابقة.
_ إيش حكيتلك أنا عن المتنمرين؟🤔
مش اتفقنا إنه كلامهم انعكاس لمشاكلهم النفسية، وإنه أنت قوي القلب وواثق من نفسك، وإنه كلام الناس آخر همنا.... إلخ
_ احضنيه وانصتيله وكوني مستمعة جيدة، لا تستهيني بالشكوى لأنها قد تسوء أكثر. لابد من تفهم المشكلة ووضع إيدينا عليها عشان نقدر نحلها
_ أهم شي يكون طفلك صادق وإنه فعلاً في تنمر، وبنفس الوقت لا تقفي مع طفلك ضد الآخرين إلا إذا فهمت المشكلة تماماً فقد يكون طفلك الغلطان.
_ إذا كان طفلك صادق فلا تقفي مع الآخرين ضد طفلك وتحكيله أكيد أنت السبب، هاد رح يلغي الأمان عند الطفل ويسببله خوف. إذا أمي ضدي وين رح أشعر بالأمان.
_ بعد تقوية طفلك وإعادة ثقته بنفسه تكلمي مع الإدارة إذا الحدث صار بالمدرسة.
🌹 بعد التنمر🌹
_ الآن طفلك مر بتجربة تنمر، دورك تعززي ثقته بنفسه وتجلسي معه تتناقشوا في الدروس والعبر المستخلصة من تجربة التنمر، وماذا عليه أن يفعل إذا تعرض مرة أخرى لذات الموقف.
_ أكدي معه ع مفهوم "لا تسمح لحد يأثر عليك بتنمره" ، أنت ما بتتأثر بكلام الناس وهاد موقف عابر ورح ينتهي، لا تسمحله ياخد من وقتك.
_ فهميه إنك داعمة إله وإنك ما بترضي لحد بتنمر عليه وإنك رح تساعديه دائما لتجاوز المشكلة
إيش تجاربكم مع التنمر؟ 🤔
