الأمهات الخبيرات في التربيه تدخل ولها الدعاء (فضفضه طويله الصلاة-المذاكره-الصدق000

السلام عليكم ورحمة الله وبركاته
اخواتي الغاليات طلبتكن ابي نصيحتكن واللي جربت مع الاطفال
ابقولكم عندي بنتي الكبيره بصف خامس وولدين واحد بصف ثالث وواحد بثاني الله يصلحهم يارب
ياخواتي مااخفيكن بديت احس بالفشل مو هذي النتيجه اللي كنت اطمح لها
يااخواتي ابكي وادعي ربي يصلح احوالهم هم والحمدلله فيهم صفات زينه بس في جوانب لا00
مثل الصلاة تكاسل ولازم متابعه كل وقت بوقته مجرد انشغل عنهم شوي مايتذكرون
00مره بنت حماي باتت عندنا ماشاء الله من يجي وقت الصلاة تصلي
وحتى مره كنا في استراحه والعالم تلعب كانت اذا جا وقت الصلاة
اشوفها لفت جلالها وصلت الله يحفظها وهي بصف ثالث
المشكله عيالي بدوا يكذبون يقولون صلينا ولما ادقق يقولون هالحين نصلي صارت المشكله مشكلتين
مادري وش الاسلوب المناسب
العيال يصلون مع ابوهم في المسجد اذا كان موجود
وهم افضل من وضع البنت
والله تضايقت مره بنتي لما قرب يجي ابوها من المسجد قامت وحطت شوية مويه
على راسها وتطالع نفسها بالمرايه يعني تمثل انها توضت وصلت وكنت اراقبها بدون ماتحس
جيت عليها قالت انا صليت قلت لاتكذبين000حست اني كاشفتها وقالت خلاص اصلي
وتقول انامو محاسبه على الصلاة بالعمر هذا الله يعين تكفون ياخواتي وش السواة

ابيهم صادقين ولا يمكن يكذبون امس قلت لها كلمي زميلتك قولي لها فطورك علي بكره
عشان عندهم فطور يومي قبل الحصه الاولى وابيها تكون صداقه
(قولولي وشلون اخليها تكون صداقات)
احس مالهاصديقات ياحياتي علاقتها عاديه مع كل البنات
وقاطه وجهها على بنتين بفصلها وهن مايستاهلن واحيانا يهينوها وتخاف منهن ومتسلطات
وانقهر اقول وين قواتك على اخوانك اما البنت هذي حسيتها طيوبه
وكانت مستحيه شوي وشجعتها وقلت سولفي معاها واسئليها عن المذاكره
لانها دايم اذا كانت غايبه وكلمت تكون مكالمتها جافه يعني بدون سلام بس وش الواجب وش الحفظ ويالله خلاص اذا كنت عندها اقولها قولي كيف الحال 00مشكوره00وطلعت من الغرفه وعند الباب الا اسمعها تقول ايه حنا رحنا عند عمامي بالاستراحه يوم الاربعاء وناسه وحنا مارحنا ولا شي ولنا شهر ماشافت بنات عمامها ابوها رافض يودينا00 مادري ليش كذبت ؟:44:

والله ماحب كلمهم كثيرابيهم يعيشوا طفولتهم ياحبة عيني
البارح قعت اكلمها يمكن نص ساعه قبل ماتنام وكان كلامي عتاب لها عشانها تاخرت بالحفظ وعلشانها طفشني بالقومه الصبح وتتاخرعلى الباص مع اني اكون مجهزتها بس اول مايدق الجرس تقعد تلفت وتتذكر اشياء احيانا تافهه وتروح تاخذها وبعدين يجي ابوها يقول ليش تاخرت ونعصب وتطلع على هالحاله ودي تطلع وهي مبسوطه مومتضايقه واحيانا تبكي:(حتى بالمشاوير الثانيه بر 00سوق00حديقه اخر من يطلع هي وهواش مانفع بس نتنكدحنا ؤياها )المهم قلت يابنيتي ابيك تعاهدين نفسك تكونين اول من يطلع واتركي التفطن يعني احيانا نقول بنروح حديقه تقعد تنادي الشغاله وين وين وتجيب مثلا الزلاجات 00شوي تقول ابروح الحمام وانتم كرامه وهي دايم تنادي الشغاله قلت لها انتي مسؤله عن اغراضك مو الشغاله

وقبل كم يوم حطيت لهم ورقه على باب غرفتهم صح وخطأ ومكافئه اي واحد يطلع شي يرجعه مكانه لاني حسيتهم صاروا فوضويين مره و تحسنوا ولله الحمد00 والله رحمتها نتكلم معاهم كثير انا وابوهم ونوبخ ولا فيه نتيجه زوجي مره لقى طبييب نفسي وقعد يسأله عن حالة بنتي,, وولدي الصغير عصبي مره ويلعب بلاي ستيشن كثير))قال حرام عليكم زين ماتأثرت نفسيتها الطفل مفروض مايتعرض للتوبيخ اكثر من دقيقه باليوم وجا زوجي وقالي وحزنا وقررنا اننا مانهاوش بس هالحين رجعنا تعبت معها وخصوصا على المذاكره ماخلصتي الواجب00روحي ذاكري 00يالله احفظي ودي بنتي تهتم من نفسهابدروسها مع العلم اذا ماخلصت دروسها اخر الليل تقعد تصيح وتحب علاماتها تكون مرتفعه بس والله اتعب كل شوي قومي00خلصي 00 القاها تلعب ولا تهاوش مع اخوانها فما تخلص بسرعه وطول اليوم يصير مذاكرة حتى اني صرت امدح اخوهم الوسط كثير لانه يخلص واجبه بالمدرسه واخاف هذا من التفرقه؟
(((واليوم الحمدلله راحت للمدرسه وهي تمام بعد كلا م البارح وتقول وشرايك فيني اليوم:27:
مدحتها بس افكر بالايام الجايه000:08:
والله ادري طولت مره بس طمعانه فيكن ماشاء الله اقرا مواضيع الامهات احس عندهن خبره وحنان ماشاء الله
الله يجزى اللي ترد علي خير الجزاء