الإبتعاد عن الناس غنيمة والا جريمة 🤔

مسيتم بالخير ي جميلات 💮
يقولوا عشرة الناس بتوجع الراس!
وعلى نفس السياق نقرا الكثير من النصايح في كل منصات التواصل تأكد ع هذي الفكرة
وان البعد عن الناس غنيمة والراحة في التكفكف الذاتي وتنادي للعزلة والاكتفاء بعلاقة الإنسان بأهل بيته ومثلها..
وان الاحتكاك بالناس مامن وراه رجوة ولا منفعة الا عوائد سلبية تذكر لاتشكر🤷🏻‍♀️
والبعض ابتعد بعيد وصار يصور كتاب او كوب قهوة ويتغنى بمخطوطات الإكتفاء و ان جوه هذا يشبعه عن حاجته للمخالطة والتواصل مع الناس !
بالجهة المقابلة كثير يشوفوا هذي مبالغة تخالف فطرة الإنسان كونه كائن إجتماعي،، وانه فرد من جماعة ومايقدر ع الإنعزال مهما توفرت له سبل الراحة والرفاهية ! وان هذي خدعة يخدع فيها الإنسان نفسه لما تفشل علاقاته
كل إنسان عنده حاجات نفسية ما يشبعها غير التواصل مع الآخرين!
...
للتوضيح أنا مو مع ولاضد ...
كل إنسان له احقية يفضل أي خيار يناسب حياته وراحته النفسية والذهنية،، والأكيد ان لكل إنسان تجارب طلع منها بتيجة وعليها إختار خيار ناسبه شخصيا بغض النظر عن اي اعتبارات ثانية بعيدة عن مسألة التفضيلات...
احيان الإنسان يحب المخالطة ويلجأ لقرار العزلة إظطرارا بعد مواقف!

وفيه اللي يختار المخالطة بضوابط ويتنقل بين انعزال وإحتكاك ...
وفيه اللي مسار حياته إجتماعي جدا ومايقدر يبعد عن الناس وتتأثر عليها نفسيته...
عن نفسي لاحظت الانعزاليين اكثر إبداع وسمو روحاني وآراء حكيمة
" مجرد ملاحظة شخصية مالها اي استناد علمي"
لكن بالمقابل شعور الوحشة يلازمهم مهما عددوا ايجابيات الانعزال مجرد إعتقاد شخصي كونته من الشواهد حولي لا اكثر قد يصح او لا
واعتقد الاشخاص الاجتماعيين منحرمين من ساعات الصفاء والهدوء اللي معروف انها خلاصة وجوهر ساعات طويلة من العزلة ،،والتبصر اللي مصدره التأمل ،،لكن الاحظ فيهم انتعاش وطاقتهم عالية ممكن لأنهم اشبعوا حاجاتهم النفسية بالتواصل فتلاقي عندهم مثل هذا الإمتلاء ...ممكن ووارد جدا ..
انتي شخصيا وش تفضلي المخالطة او العزلة ؟ ولييش وش السبب؟ وضحي وجهة نظرك مشكورة 🤍
وكل الشكر مقدما للجميع🌸