< امزح معكم شدعوا عاد..
السلام عليكم ورحمة الله وبركاته <3 كيف حالكم ان شاءالله طيبين.؟ تاني مشاركة ليا بالمنتدى :$ ودا كان موضوعي القديم http://forum.hawaaworld.com/showthre...?t=4246162#_=_
صراحه مرة زعلت منكم كتبت كتير ومحد رد الا قليل معنو المشاهده فوق ال500 بس يلا اهم شيء متابعاتي اللي بالآسك استفادو وكلموني وردو عليا *بالاسك*
تعبت مرة عشان ادور موضوع اتكلم فيه والحمدلله لقيت قررت اني اتكلم عن العناية الشخصية بالمدرسة, طبعا غالبا نلقى بنات شياكه وذوق ومرة كيوت بس يوم نقرب منهم انواع الروايح فيهاا استغفرالله سوائن كانت ريحة ابط او منطقة الاندروير او ريحة فمها.
طيب ليش ما تكملي جميلك وتهتمي بنظافتك من جوا قبل ما تهتمي بشكلك من برا؟ والله كتييييير بنات غافلات عن النظافة الشخصية, بس منجد يعني هما ما يشمو الريحة ولا شيء؟ الحمدلله الذي عافانا
بنات انتم ترضو انو احد يتكلم عندكم عند فلان وعلان ويقولو البنت دي وييييع ريحتها معفنة افف فواحه قاعده تهفف منها...الخ
طبعا احنا مو خاشين جوا قلوب الناس عشان نسمع ذباتهم علينا, وقلتها من زمان وبرجع اعيدها لا تسمحو لأي احد يمسك عليكم شيء
اهتمي بمظهرك الخارجي والداخلي مو تهتمي بشيء وتنسي الشيء التاني؟
المهم اني بقلكم عنايتي الشخصية بنفسي فقط للاماكن المكتومة
أول شيء منطقة الاندروير; لازم الكلوت تغيريه تلات مرات بالكتير *انا اذا روحت المدرسة اغير واذا رجعت من المدرسة كمان ابدلو وقبل ما انام* بس احيان ابدله مرتين بس..
وبنات لازم لازم لازم لازم بعد الدورة تنظفو المكان وماتسمحو للشعر انه يطول
اذا كنتي تعاني من الافرازات الكتيره وتستحي تقولي لمامتك بروح عند اخصائية عشان الافرازات عندي كتيرة او امك تكون ماترضى تروحي بحكم انك بنت مو حرمة
<وانا صراحه مقتنعه بكلام ماما انو دا شيء طبيعي بالبنت ومالو داعي تروحي للمستشفى وتخلي الحرمة تشوفك وتشوف عورتك اذا الافرازات كان لونها ابيض,بس بنات اذا الافرازات كانت كتل ولونها مو ابيض ترا دي التهابات وهنا يحقلك تروحي وتكشفي *اكرمكم الله* <3
المهم نكمل محور حديثنا انو الافرازات شيء طبيعي بالبنت بس عشان نخفف منها نسوي الطريقة دي.
بعد ماتخلصي من الدورة عبّي البانيو موية حارة تقدري تجلسي فيها,مو تحطي حاره حارة وتسسلخي جلدك بعدين تدعي عليا
بعد ماتعبي البانيو موية حارة جيبي ملح خشن اخمشي خمشة كبيرة بيدك وحطيه على الموية واجلسي فيه عشرة دقايق وبعدين قومي واتحممي..
مرة مدحوهها الطريقة دي وفعلا جابت نتيجة بس بنات ماينفع ملح الاكل
كدا خلصنا عنايتنا بعد الدورة وعرفنا كم مرة نغير الملابس الداخلية,بس بنات انصحكم ما تلبسو كلوت البسو السراويل النص او على قولة اختي المتزوجة سراويل سنة ههههههههههههه
او البسي بوكسر مو لازم دا سروال السنة بس بنات السروال اللي بتلبسوة يكون قطني ومو بلاستيك او اي نوع تاني لانو حيسمرلك المنطقة..
قبل ما تلبسي المريول جيبي قطنة ومسحيها باسكينول ليمون وامسحيها من المنطقة من فوق بس.
وسمعت عن فوط كير فري اليومية واتحمست اني اجيبها,قولولي رايكم فيها لو كنتو تستخدموها..
المهم نجي لنظافة الاندر آرم *الابط* انا قريب اشتريت مزيل الرائحة بيزلين بدون عطور ولا كحول وجاري التجربه بس قبلها كنت استخدم نيفيا وشركات تانية والحمدلله ماشية معاهم.
آخر شيء الفم وما ادراك ما الفم, صراحة استغرب من البنات اللي ما يفرشو اسنانهم ويجو يتكلمو بكل ثقة,طبعا فيه فرق بين اللي ماتفرش اسنانها ومن اللي عندها التهابات باللثة,اللي ماتفرش اسنانهاا تكون على اسنانها زي الطبق لونو ابيض واصفر وقرف
المهم انا افرش اسناني بمعجوني الججممميييل *سنسوداين*
وبعدين امضمض بغسول واروح افطر,لانو اول سالت الدكتور عن رائحة الفم وقال لي ممكن انتي تفرشي اسنانك وتعتني فيها بس يكون فمك يطلع ريحة وانتي مافيكي التهابات حتا قلتله ويي كيف كدا؟؟؟ قال لي انو المعده تكون فاضيه فالفم يبدا يفرز مادة تطلع الريحة دي,يعني بنات لازم تفطروو !!
وآكل علك نعناع واتكلم وانا واثقة من نفسي
بكدا خلصت موضوعي ويارب يكون عجبكم وبس ادعولي