السلام عليكم ورحمة الله وبركاته ...
اخواتي وحبيباتي ... عضوات منتدى حواء ..
أنا دخلت المنتدى وبالظبط قسم المشاكل الاجتماعية ولفت نظري موضوع احدى الأخوات تشتكي من أنها ماتزوجت لحد الآن . وعمرها 29 – ولا 30 ولا أكثر ..
بنات أنا بقولكم قصتي وإن شاء الله ( ان شاء الله وليس ***** الله...الرجاء الانتباه...المشرفةيكون فيها مفتاح الفرج لكل مكروبه .. لا بالعكس أنا متأكده بأذن الله أنها راح تنفرج لها بشكل ماكانت تتوقعه ..
أنا ترتيبي بين خواتي الثانيه من أربع بنات .. الحمد لله اللي أنعم علينا بالجمال والأخلاق والمواصفات اللي الكل يتمناها بس انا كنت أزيد عن خواتي كثير ..
أنخطبت أنا وأختي مع بعض وتملكت أختي وانا بعدها فأسبوع تملكت .. الكلام هذا قبل 5 سنوات المهم أختي تزوجت على طول .. وبالنسبه لي أنا .. صارت بيننا وبين اهل الرجال مشاكل وبلاوي كثيره وتعقيد الله العالم فيه .. المهم خلال هذي الفتره تزوجت اختي اللي أصغر مني وقبل شهرين جابت ولد يجنن الله يخليه لها وأنا لحد الآن معلقه لاني المتزوجه ولا المطلقه ..
الرجال رافض يطلق حاول فيه أبوي وأخواني وعماني والواسطات رفض أغروه بالفلوس ورفض رفعت قضية خلع وصارلها فالمحكمة سنه وزياده وتعقدت الامور .. الدنيا كلها قفلت فوجهي حطي نفسك مكاني حتى وظيفتي تركتها بسبب الحاله النفسية اللي كنت أمر فيها .. صرت ماأقدر أنتج 24 ساعه مفهيه وسرحانه .. بالليل ما أنام لين يدوخ راسي من كثر الصياح .. وأغاني وحزن وحالي لله ..
المهم يوم أتملك كان عمري 23 والحين عمري 28 سنه قلت خلاص راحت علي .. صرت أنسانه تافهه بكل معنى الكلمه صار ميهمني شي ليل نهار برد حر ضحك بكاء أغاني وأستهبال و سماجه .. كرهت نفسي بشكل ماتتخيلونه ..
وفي يوم من الأيام كانت أختي الكبيره مسويه عزومه فبيتها ورحت هناك .. طلعت من بيتنا شخص ورجعت بعد 6 ساعات شخص مختلف تماماً ..
اللي صار أني قابلت عند أختي وحده من صديقاتها صاحبة دين وداعية .. أختي كانت متفقه معها ومعلمتها فقصتي والوضع اللي انا فيه .. جتني وجلست جنبي أقسم بالله أول ماجلست جنبي وناظرتها حسيت براحه مو طبيعيه أبتسامتها وعيونها فيها أمل فيها سمو وتفائل .. قامت تسولف معي وهي تتكلم تمسك يدي مره ومره تحط يدها على كتفي ياناس جاني النوم أعذروني ع التعبير بس من جد حسيت براحه خياليه .. كنا نسولف نضحك فجأة سكتت وناظرت فيني بحزم وقالت : تبين أقولك على شغله تسوينها تنحل كل عقدك ومشاكلك ..
طبعاً ضحكت قلتلها ما أظن مشاكلي بتنحل حتى لو أنحلت ماعاد فيه فايده ..
قالت : أستغفري ربك وأسمعي وش بقولك وسويه .. وخلال شهر واحد بس راح تتطلقين وتتزوجين اللي راح يعوضك عن كل اللي جرالك ..
قلت : مستحيــــــــــــــــــــــــــــــــــــــــــــــــــــــــــــــــــــــل
قالت : جربي منتي خسرانه شي ..
قلت وش ذا المعجزة .. وفعلاً كانت معجزه قسماً بالله يابنات
قالت : كل ليليه بعد صلاة العشاء تصلين الوتر ركعه وحده بس ..بعدها تقرين سورة الواقعه (( بتمعن وتدبر )) وتقومين وأذا جت الساعه 10 – 11 باليل أفتحي المصحف وأقري سورة (( الـــــبقرة )) كامله ..
وتستمرين على هالحال شهر .. أهم شي يكون عنك أراده وتصميم
طبعاً أنا من كثر ماجرالي مستعده أسوي أي شي علشان أرتاح .. وأنا ماكنت أصلي .. يعني أذا صليت الفجر اليوم بكرا أصلي العشاء .. والحمدلله اللي هداني بفضله ومنته ثم بفضل تلك الأنسانه الصالحه ..
المهم أني رجعت للبيت تقريباً الساعه 12 بالليل .. على طول تروشت ورحت صليت ركعتين بكيت فيها بشكل رهيب وحسيت كل البلاوي والوسخ اللي فصدري طلع بعدها مسكت المصحف وقريت سورة الواقعه وبعدها سورة البقره وكان الشيطان كل شوي يحاول يستردني له ويقول يابنت البقره مره وحده تكفين يالغامدي ولا الحيدان يابنت تعبتي أنسي الموضوع أنك تختمينها الليله .. أنتي توك جايه وتعبانه خليها بكرا .. أقسم بالله أنه أكثر من 10 مرات اللي أقوم وأغسل وجهي وأتعوذ من الشيطان وأكمل القراءه .. خلصت منها بعد ساعتين لأني ماكنت أقراها متواصله كنت أقطع فيها وبعدها صرت أختم البقره بساعه وحده بس ... صرت أصلي الفجر والظهر والعصر والمغرب والعشاء ....صار عندي قوة وعزيمه وأصرار أبي ربي يرضى عني ويتوب علي و أتطلق وأتزوج الأنسان اللي يريحني وأعيش حياتي .. هذي الأشياء حطتها قدام عيوني
المهم وبعد أسبوعين فقط كانت لنا جلسه عند الشيخ فالمحكمه وكنا فاقدين الأمل أن الرجال بيجي بس رحنا كذا زي ماتقولون أجراء روتيني كنت قاعده أنتظر يقولون يالله مشينا ماصار شي اليوم ..
قال أخوي بحاول أتصل عليه يمكن يوافق يجي .. دق من جواله وأنا أنتظر أخوي يقول حسبي الله عليه .. فجأة رد على اخوي وقاله حياك يافلان سم وش بغيت ...
قاله : أخوي سلامتك . بس حنا فالمحكمه يفلان والله ماصارت تعال وخلصنا الله يوفقك .. المعجزه قاله :
(( أبـــــــــــــــــــــــــشــــــــــــــــــر )) أحسبلي مسافة الطريق وأكون عندك ..
سمعت أخوي يدعيله ويشكره وطاير من الفرحه .. قالنا خلاص فرجت نص ساعه وبيجي .. دخلت عند أنتظار النساء وسجدت شكر لله وبكيت بحراره وفرحه ماني مصدقه اللي صار قعدت أستغفر وأسبح وأهلل .. شوي إلا أخوي يناديني يقولي تعالي أدخلي عند الشيخ دخلت وشفته قدامي من الخوف والرجفه... قعدت ع الكرسي على طول.. رجولي ماقدرت تشيلني ودموعي بللت النقاب تنزل بدون أرادتي ..سأله الشيخ تطلق زوجتك قال : نعم قال أنطق بالطلاق قالي أنتي يافلانه (( طــــــــــالــــــــــــــق ))... ماني مستوعبه شي... معقوله خلاص أنا حره ..
كتب الصك وشهدوا على الطلاق أخوي واحد ثاني كان عند الشيخ وبصمت والرجال وقع ..وقالي الشيخ أنه مالي عده ..لأنه ماخلا فيني .. اللي بيننا وبينه عقد فقط .. وأخذت صك حريتي .. بعد خمس سنوات من العذاب والجرجره .. يوم طلعنا من الشيخ جاء الرجال وحب راس أخوي وأستسمح منه ومن أمي وترجانا أننا نحلله ونبيحه .. وانه ندمان على اللي صار .. على كثر ماكنت حاقده عليه على كثر ماكسر خاطري ..
المفاجئه الثانيه
بعد طلاقي بأسبوع واحد بس جاني خاطب أنسان قمه عمري ماتخيلت أنه ممكن يفكر يخطبني ولا جاء على بالي..... أنسان أخلاق ودين ومال والحمدلله رب العالمين وملكتي الأسبوع الجاي بأذن الله ...
هذا كله صار بثلاث أسابيع بس وكم يوم .... أقسم بالله هذا موضوعي هنا واللي تبي الفرج من رب العالمين تتوكل عليه وتسوي مثل ماسويت وتبشر بالفرج وأنا أنتظرها يمكن يصير زواجي وزواجها بنفس اليوم بأذن الله ..... دعواتكم لي بالتوفيق ..
&& الشمووووخ && @ampamp_alshmooookh_ampamp
عضوة جديدة
يلزم عليك تسجيل الدخول أولًا لكتابة تعليق.
فلونة79
•
يا قلبي كيف بكيتيني قسما بالله قلبي فز من مكااانه ...
سبحانك ياااربي قادر على كل شيء ..
الله يسعدج يااارب ويريح قلبج ..ويكتبلج السعادة وراحة البال في كل خطوة من خطوات حياتج .. ويتمملج على خيرررر ...ياااارب ...:)
سبحانك ياااربي قادر على كل شيء ..
الله يسعدج يااارب ويريح قلبج ..ويكتبلج السعادة وراحة البال في كل خطوة من خطوات حياتج .. ويتمملج على خيرررر ...ياااارب ...:)
مبروك والله يتمم لك على خير
ومشكورة وجزاك الله كل خير
والله يجعله في ميزان حسناتك
ومشكورة وجزاك الله كل خير
والله يجعله في ميزان حسناتك
الصفحة الأخيرة
ويرزقك خيره ومحبته ويكفيك شره وضره ,اللهم آمين .
وجزاكِ الله خير على كتابة تجربتك ونفعك لخواتك .