الاجهاض في الشهر الأول..

السلام عليكم ورحمة الله وبركاته

صباح الخير على كل الحوائيات ...

عندي موضوع تاعبني حيل وقلت مالي غير هالمنتدى الرائع أشاوركم فيه ..

أنا عندي طفلين جبتهم وراء بعض ما بينهم إلا 3 شهور .. الصغير توه ما كمل شهرين

وأنا طالبة أدرس الى الان يعني أداوم الصباح وأوديهم عند الوالدة والظهر أجيبهم ... شغلة طويلة عريضة

هذا غير شغل البيت والطبخ والغسيل ... وإنتو أدرى بالباقي :angry:


والله إني من التعب ساعات أنام زي العمال نهاية اليوم ما أدري عن نفسي .. ومع هذا النومه بالهم كل 10 دقايق أصحى لواحد فيهم .. رضاعات ولف ودوران في كل واحد منهم الين ينام وساعات والله أشيلهم الإثنين ..

المهم مالكم بالطويلة ...

أنا بعد نفاسي ما جاتني الدورة تأخرت شهرين قلت عادي يمكن من الرضاعة .. ورحت بأركب اللولب وقالتلي الدكتورة لازم تعملي التحاليل عشان نطمن ..

المهم عملتها وأنا مطمنة .. وشوي وأنا بالانتظار تجيني الدكتورة وتقولي ما راح أقدر أركبه لك إنتي حامل ....!!!

أبو الصدمة اللي أنا فيها .. والله يا جماعة الخير قمت أبكي بحرارة .. أنا عارفة بعضكم بيقول حرام عليك هذه نعمة من رب العالمين وغيرك محروم منهم ويدورهم دواره ... أنا أقول الحمدلله والشكر على كل حال .. أنا ما كفرت بالنعمة ..

بس الموضوع أكبر من إني أقدر أتحمله .... لفت يومياتي مع عيالي كلها قدام عيوني قمت أفكر لو يجي طفل ثالث وشلون تصير حالتي ...

رجعت البيت وأنا في حالة ما يعلمها إلا رب العالمين .. أضرب أخماس في أسداس ..

المهم من بعد يومين وأنا أفكر بموضوع الاجهاض .. عارفه إنه بعضكم بيستهجن الموضوع ,,,

بس لا أحد يستعجل ويحكم علي ..

أنا جايتكم أبي مشورتكم والحكم الشرعي للي تعرف .. هل هو حلال ولا حرام خصوصا انه أنا لسه في الشهر الأول
أبي فتوى لمفتي عام المملكة آل الشيخ ولا ابن باز ...

وأي وحده صارلها مثلي تشاركني قصتها ....

أنا فعلا محتاجه لكم خصوصا إنه مافي أي أحد يدري بالموضوع إلى الآن .. ونفسيتي مره تعبانة ,,,

أبيكم تساعدوني وتقولولي ايش أسوي ..

الله لا يحرمني منكم ...


وأتمنى من المشرفات إنهم ما يحذفون الموضوع ...