الاخت المنافقة وش الحل معها

عندي اخت صف اول ثانوي
اقل مايقال عنها انها منافقة تحب الشر بين الناس
ماخذة اكبر من عمرها بكثيير
تقعد تفتن بين هذا وهذا وبالاخر تدخل نفسها على انها واسطة خيير
بالبيت تعتبر جاسوسة ل ابوي حتى على امها
الحركة والنفس ل اي واحد بالبيت نعتبرها صارت عند ابوي
متوارية مثل الافعى تطلع وتستخبي على طول
لي حذرني منها هي امها يعني زوجة ابوي
وين صارت هذي يوم اسولف مع زوجة ابوي تقعد تضحك وتقولي ترا بنتي كذا انتبهي منها
اخوها ابو ١٠ سنين يضربها ذاك اليوم وهي تهرب منه
اقوله عيبب ترا هذي اختك
يقولي والله هذي حقيرة تفتن علي عند ابوي
غيره مواقف كثير لدرجة انه مثلا لو شافت غلط تصور ل ابوها وتوريه
اخوها انطرد من البيت بسببها كان قاعد بسيارته ويشرب الشيشة الالكترونية تروح مدري من وين طلعت له وصورته ل ابوها
ومواقف كثيرة خلتني اكره حتى اشوفها
انا اكرمتها وقعدت معاي بالغرفة وصارت اقرب وحدة لي
وادلعها واشتري لها وصارت تاخذ وجه علي لدرجة ما احد يتوقعها
اخواتها حذروني منها
تدخل غرفتي تاخذ لي تبيه مكياج ملابس فلوس بطاقة البنك حقي لا طلعت تاخذها وتصرف منها لها
اللاب توب تاخذه
يعني شوفو كمية الميانة لي بيني وبينها وكل هذا ما اثمر فيها ابدا
ماحصلت الا الطعنات بالظهر منها عند ابوي وحرمته
ابوي يجيني معصب وحرمته تعصب قدامه وبعدها تقولي خذي حذرك من بنتي ترا ماحد قالنا الا بنتي
وانا مصدومة منها
والله اختها تقولي ترا هذي ممكن وهي قاعدة تكون فاتحة تسجيل صوتي لك
يعني الكل يتحاشاها ويعرف طباعها
اخر شي قبل فترة صار مشكلة بيني وبين بنت عمي
شريت لها فستان على اساس ادفع دفعة انا والباقي تكمله بنت عمي وخلاص وصاحبة المحل نعرفها وتعرفنا
والبنت تأخرت وصاحبة المحل صارت تتصل علي وصارت هوشة بيني وبين بنت عمي وتهاوشنا وتزاعلنا وصار علي ضغط نفسي من صاحبة المحل لانها كل يوم تتصل
بهذا الوقت طلعت اختي هذي لي
جات يومها تضحك وتسولف معاي وبعدها قالتلي فلانة لازم نحل هذي المشكلة عيب
وبعدها قالتلي ترا صاحبة المحل اليوم رايحة تشتكي عليكي
وترا بنت عمك قاعدة تنكر وتتهمك لك وتقول عليكي كذا وكذا
ولا واجهتها تقولي انا ابغى اتدخل انتي اختي وحبيبتي وانا اليوم بروح عند صاحبة المحل حتى لو دفعت فلوس من مصروفي ابخلص مشكلتك
وبنفس الوقت ماقصرت عند بنت عمي عبت راسها علي ووصلت اني كنت بضارب بنت عمي مثل البنات الصغار
وتدخلت زوجة ابوي بالقصة وهي لي خلصت موضوع الفستان التافه هذا وبسبب بنتها قعدت اسبوعين ما اكلم بنت عمي ولا هي تكلمني
بالمناسبات والعزومات نشوف بعض ومانسلم على بعض وهي عاجبها كذا
بعدها تجي تسحبني عند بنت عمي تقولي ابصالحكم مع بعض عيب تراكم بنات عم واحنا نتمشى بالطريق تعبي راسي عليها وبنفس الوقت كان معبية راسها علي وقعدت بينا وماتصالحنا بالعكس نتهاوش اكثر
اليوم صباح قابلت بنت عمي وعبرنا ل بعض وفتحنا قلوبنا
وبالاخر كل وحدة تكتشف ان المشكلة اقل ما يقال عنها انها تافهة جدا
بس مين لي كبرها غير اختي حسبي الله عليها
والله قايلة ل بنت عمي كلام ماينقال وهي لي محرضة ان البنت صاحبة الفستان تشتكي علي
انا وبنت عمي مصدومين منها
انا الحين بصدمة منها مو عارفة كيف اتصرف مع هذي المخلوقة حراام لسا صغيرة وقاعدة تطلع على نفسها سمعة انها منافقة وفتانة
واليوم بعد ما الاقيها الا ترسلي حالة عن الاخت واغنية للاخت وهي قاعدة تعطي الطعنات بظهري
حتى خطبتي على خالها تبغى نفشلها قاعدة تعبي راسي على خالها وكيف طباعه وكيف اوصافه ومدري اذا كانت موصلة كلام عني لبيت جدها لأن كل شي صار شبه رسمي والرجال يبغى يجي يتقدم لي بعد العيد على حسب كلام امها
والله مدري بصدمتي من هذي البنت كيف ولي يشوفها يقول يا الله وش قدها طيبة ونشمية وكفو وهي اكبر منافقة وفتانة بالبشرية