مرحبا ,,
يسعد صباحكم / مساكم بكل خير ومسره
مو كثير ادخل هالقسم ..بس مرات نسير عليكم وآآآه يابنات
آآه ومليوون آآه من المواضيع اللي اقراها
اكثر شي يؤلمني ويحز بخاطري بين كل المشاكل اللي تكتب هنا هو موضوع مشكله بين الاخوات !
ايه خوات من ام واب ووصل الحال ان الوحده تدعي على اختها بأشد الدعوات وتعاديها وتحقد عليها
الاخت لافقدت اختها وش بتكون الحياه ؟
والله ماتعرفين قيمة اختك الا لما تغيب عنك ماني قايله موت بقول مرض تخيلي اختك يستجيب ربي دعوتك فيها ويصيبها مرض
من اووول ليله راح تشتاقين لها وتكرهين حالك بدوونها و وتدعين انه ترجع للبيت بالسلامه وكنووز الدنيا كلها ماتكفي شوفتها
يا اخووات الدنيا لاتقسينا على منهم من لحمنا ودمنا
مافيه شي يستااااااهل
اقطع العالم كله ولا اقطع خواتي
بحريقه العالم كله الا خواتي
اللي لها مشكله معينه مع اختها بس ابيها تسأل نفسها كم بتعيش هي ؟
هل هي ضامنه عمرها ؟
هل ودها تترك الدنيا وبينها وبين اختها مشاكل و مقاطعتها ؟
وبعضهن تلقون سبب مشاكلها مع اختها اطفالهم ..
عيالهم الصغار تطاقوا مع بعض وكل وحده شالت عالثانيه وقاطعتها فتره ..!
وين الايام اللي عشناها وحنا صغااار
وين ذكرياتنا الحلوه واسرارنا اللي كانت بينا وحلم الصبآ
وين اللي كنت العب معها من حنا صغار يوم انا بنتها ويوم هي بنتي
وين اللي نرجع سوى من المدرسه ويدها بيدي
نسينا ايام الطفووله والزمن الجميل نسينا لما الوحده تقسم لاختها من اللي تأكله ويتشاركون الضحكات
وسوالف ماقبل النوم
الآن كيفهم ؟
غيره حسد وحقد
الوحده تثاقل اختها وتتحسس من اي كلمه وتتثاقل حتى نصيحتها وتعتبرها سبه وشي متجاوز لايحق لها
قلت زيارتها لاختها تمر شهووور ماتكلمها ولا تطمن عليها
تسمع الكلام اللي ينقال في اختها وتصدقه ..!
ماتفكر في يوم تسأل اختها وش اللي مضايقها وتشاركها همومها وتحل مشاكلها
هذه الدنيا زائــــــله لنصفي النيه مع اقرب الناس الينا
ولنراجع انفسنا وعلاقتنا معهم
اللي شايله على اختها تطهر قلبها مما فيه
واللي مقاطعه اختها خل تكون خير وتبدا بالسلام
والاخت دون اختها وش تسوى ؟
الله يخلي كل وحده لـ اهلها ولا يفرق اخت عن اختها ويكفينا شر فتن الدنيا
واعتذر عن الإطاله ولكن يعلم الله انها نصيحه من القلب وارجوا ان يكون لها القبول
ومايحس بكلامك الا اللي مجربه الطعم ,,
وآه من الغربة والبعد عن الاهل والحبايب
والخوات لهم طعم ثاني
يَ رب لاتحرمني ابتسامتهم