الاذان في دبي مول

مرحبا الغاليات

من اسبوع قريت موضوع عن اخت تسال تروح دبي والا تروح الشرقية وما ادري وين راح الموضوع المهم في بنات نصحوها تروح دبي وبنات نصحوها تروح الشرقية

الزبدة في الموضوع اني اثناء قراءتي للردود في نفس الموضوع كان فيه رد من احدى الفاضلات قالت ان لا تروحي دبي وخاصة دبي مول لان كله موسيقى وراح تضيع صلاتها لان ما فيه اذان ومن هالكلام

وانا صدقت

صح انا من الامارات لكن من امارة ثانية وهالاسبوع خصصت يوم واخذت الاطفال الى دبي مول وبالتحديد الى عالم كدزانيا الرائع

ووصلت على المغرب. وكنت متاثرة من كلام الاخت السعودية على اساس هي زارت دبي مول قبلي وادرى فيه مني وقبل لا ندخل المول وانا احاتي الصلاة وكيف بنعرف لو ما سمعنا الاذان ووين بنتوضا ووين بنصلي

وكل شوي اسال اذن والا ما اذن المغرب لان البلاك بيري الي عندي يديد وما لحقت انزل فيه برنامج اذان
واول ما دخلنا طلبت من زوجي نروح نتوضا استعدادا للصلاة لان ما راح نسمع الاذان وانا اول مرة اروح هالمول

المهم واثناء بحثنا عن مكان للوضوء والصلاة الا فجاة نسمع اذان المغرب بصوت عالي وخاشع في جميع ارجاء المول

صابتني قشعريرة. ماشاء الله تبارك الرحمن اذان عالي وصوت جميل
وفي كل مكان بالمول وين ما نلتفت لوحات ارشادية لمواقع المول وبينها موقع المسجد

لقينا المكان قسم خاص للرجال وقسم خاص مدخل مختلف للنساء

توضينا الحمدلله ورحنا المصلى لكن ما لقيت موطا قدم للصلاة ماشاء الله

ولفت انتباهي الاجانب المسلمين شفت يابانية مع بناتها كلهم لابسين لبس الصلاة ويصلون تبارك الرحمن بناتها صغار وحدة منهم عمرها سنتين تقريبا وملبسينها لبس الصلاة الله يحفظهم ويثبتهم

انتظرت لين ما خلصوا بعض النساء من الصلاة ودخلت وصليت الحمدلله

طلعت وانا حاسة براحة نفسية ان بلادي عمرت وبنت وتطورت لكن ما غفلت عن اهم ركن وهو الصلاة وخصصت لها اماكن نظيفة ومجهزة ومتطورة ايضا
الحمدلله يارب

وانا حبيت اوضح هالنقطة احقاقا للحق لا اكثر الي هي نقطة الاذان
وربي يهدي امة محمد ويصلح حالها امين