أخواتي اليوم تحملوني شويه بسولف معاكم وبطول عليكم شويه بس شسوي خلوني
ابرد حرتي شوي يمكن الله يبدل بحالتي على يدكم
****
يلله بدينا بشرح لكم قصة حياتي
كان ياماكان زمان من كم سنه الله يسامح هلي زوجوني بدري يعني على 16 سنه
تقريبا .. لا تستغربون عادي عندنا يمكن بعد انا كنت في نظرهم فاتني القطار!!!
وكان الجسم في هذيك الايام قمه في الرشاقه .. رزقني الله بفضله 3 أطفال في
السنوات الأولى يعني ورى بعض والجسم الحمد لله ظل على حالته وبالعكس سنه عن
سنه يزداد روعه( على قولة الي حوالي ) والكل مستغرب ويسألون ويش اسوي بعمري
وابد والله ماسويت شي لا رياضه ولا حتى مشي ولا حتى رضاعه على قولتهم ترتب
الجسم وتشده لاني اصلا بسبب توالي الولادات مارضعت عيالي عدل واذا على الأكل
آكل الدنيا ومافيها وكل أكلي غلط حلويات وغازات وأكلي متركز في فترة الليل..
والحاصل في عايلتي الوحده مننا تتبهدل من أول حمل عشان كذا علامات التعجب
في كل مكان ..بس أنا خمنت انه السبب يمكن يكون هم الدراسه الله لايردها
من ايام سهر وقلق لأني كنت في الثانويه ايامها وبعد ماكان عندي شغاله يعني
بعيد عنكم ماكينه شغل وهم ليل نهار برى البيت وداخل البيت..
وقفت الحمل كم سنه لحد ماخلصت الجامعه واتوظفت وعلى طول حملت وكان ايامها
في 97 والله لايوريكم بدأ الجسم يتمدد من كل مكان وبدأ معاي شبح السمنه وزدت
تقريبا 24 كغم ولما ولدت بنتي مانقصت ولا غرام وبعدها بسنه وشويه حملت بولدي
الأخير وزاد الدمار في جسمي كان توه باقيلي شوية اماكن يقدر الواحد يطالع فيها الله
يحفظ ولدي كمل علي وخلاص ماعاد امت لعالم الرشاقه باي شي يذكر ولا عاد ينرجى
خيرفي رجوع ايام العز ايام رشاقتي وظليت على هالحاله الى بداية 2001 ..
الي غايضني في مشواري مع السمنه انه كل هذا يصير في جسمي وانا ابد ولا احساس
ولا حتى لوم حق نفسي ولاشي كأنه وحده عدوتي الي كذا صايره مبهدله ..
واعتقد السبب انه محد ابد من الي حواي علق تعليق جامد كنت بين فتره وفتره
اسمع كم كلمه بس كلمات عاديه خفيفه مااثرت فيني والاهم زوجي ابد ماعمره
علق على متني - الحمدلله الظاهر كمالي والكمال لله في امور اخرى غطى على هالسالفه-
لكن لو كان شويه محسسني بظلمي لنفسي وله كان انا من زمان متعدله لكن يالله ..
متى عاد بديت احس في عيد الاضحى الي قبل الماضي جاني تعليق من اختي
وبعد العيد من بنتي وفي اليوم الي بعده من بنت خالتي يعني الثلاث تعليقات سمعتهم
في اسبوع واحد لكن ياهم تعليقات الله لايسمعكم مثلهم لا ومن ثلاثه من اعزالناس عندي
****
أختي ..كنا انا وياها نسولف عن الغاليه امنا وقلت لها انا اشوف امي كنها متنانه شوي
يبيلها تنتبه لنفسها خايفه عليها من الامراض الله يبعدها عنها ويديمها لنا .. قالت ويش
بلاج تحسبين نفسج اضعف من امي ترى امي يمكن امتن منج بس تبين اضعف لانه
امي متنها حلو بس انتي منفوخه متنج مب حلو مره....:44:
***
بنتي .. بنتي تقول لي يمه الاسبوع الجاي اجتماع مجلس الامهات بس يمه اترجاج
لا تجين يمه صايره تفشلين اخاف البنات بعدين يتهزون بي :(
***
بنت خالتي .. كنت نازله من السياره لمكان عملي وبنت خالتي تنتظرني في الطابق
الثاني وانا اكلمها بالتلفون اقول لها انتي وين قالت انا فوق قلت لها بس انا
ماشوفج انتي في اي صوب قالت بس انا اشوف كره كبيره كبيره كبيره مدوره
تتدحرج على الارض:06:
خلاص عاد ولعت السالفه عندي وبلعت هالتعليقات الثلاث ولا زعلت منهم لو ماكنت
غاليه عندهم ماكان حسسوني بفضاعة حالتي..
هنا بدأ مشواري مع الحرب ضد السمنه لأنه صارت عندي اراده قويه على نفسي
وصار عندي هدف وهو اني احافظ على جسمي وارد مثل قبل في عيون الي يحبوني
فعلى طول من نهار الاسبوع التالي بديت المشوار بالتدريج هدمت السمنه الي عندي
شوي شوي على راحتي علشان ماامل السالفه واتضيع الاراده ..
1- لغيت الاشياء الغلط الي في حياتي وهيه الحلويات والغازات بالتدريج يعني خففت
وبعدين خلاص ماعاد لها وجود خاصه الغازات اما الحلويات يمكن كل فتره شوية
حلى.. ولغيت نومة الظهر لانها مب عدله بعد الغداء الدسم وعشان ينهد حيلي بالليل
وماآكل في وقت متأخر
2-بديت امشي لمدة نصف ساعه اربع مرات في الاسبوع وبعد تتدرجت في المشي
بديت بخمس دقايق لاني كنت ماامشي كلش قبل والحين بعض الاحيان اوصل لساعه
بس الي مستمره عليه هو نص ساعه مااخليها ابد
3-خففت كمية الوجبات شوي شوي لحد ماعودت جسمي على الاكل القليل
4- بديت مشوار طويل مع انواع من الريجيمات بعضها ناسبني وبعضها لأ
ونتيجه لهذا كله في ظرف سنه نقصت 20 ك تقريبا كان وزني 99.900 وصار
78.800 في خلال سنه وشويه
لكن عاد الحين بعد ما جاتني مئات التعليقات الحلوه من كل مكان لأنه على قولة البعض جسمي الحين نطقهم غصب اول كانوا ماقادرين ياذوني علشان مايخسروني بس بعد ماشافوني انا انتبهت لنفسي وتغيرت انطقوا ...الحين ضاعت الاراده وشكلي اكتفيت بالي وصلت له
بس حرام للحين احس نفسي ابي ارجع مثل قبل بس للاسف ماتت الاراده شهرين الحين كل ماابدا ريجيم اخربه حده ليله واخربه بالليل... لانه المصيبه الي اعاني منها هيه اكل الليل من صغري عندي هالحاله بس قبل ماكانت تاثر في وزني الحين على طول يولع الميزان
ولعلمكم من قبل الاراده بدت تمصخها معاي بس كنت اكسر راسها باليمين بس الى متى
بظل كل مابغيت ابدأ ريجيم أقعد احلف عليه...
خاطري بشي يقوي ارادتي او بنظام اكل يناسب حالتي وهيه الوسوسه الي تجيني بالليل
بس ابي احرك فمي عياره مب جوع
ياليت الاقي وياكم اخواتي الحل لمصيبتي
وارجع واقول لكم مافيه مثل الاراده في تحقيق اي هدف كان
في أمان الله
شيم*** @shym_2
كبيرة محررات
يلزم عليك تسجيل الدخول أولًا لكتابة تعليق.
مشالله شيم ارااادتج حلوووووه وعزيمتج قوووووويه ..وينه ليش ماتت مثل ماتقولين ؟؟؟؟؟؟؟!!!!!!!!
لا حراام يعنى بصراحه مابقااالج شىء وتتخلصين من سمنه نهائيا انتى توكلى على الله وتحملى اشوى اليوع واذا شفتى نفسج كلش مو قااادره حطى حرتج فى الجزر اهو يسد اليووع بسرعه ويشبعج وانشالله تردين نفس اول واحسن وموفقه يارب :17: :26:
لا حراام يعنى بصراحه مابقااالج شىء وتتخلصين من سمنه نهائيا انتى توكلى على الله وتحملى اشوى اليوع واذا شفتى نفسج كلش مو قااادره حطى حرتج فى الجزر اهو يسد اليووع بسرعه ويشبعج وانشالله تردين نفس اول واحسن وموفقه يارب :17: :26:
شيم***
•
غاليتي ...اندومي بالشطة
والله قبل مانفعني شي
بس الحين بعد ماشكيت للغاليات همي
اشوفني كني باديه اتعدل
وسالفة العلكه بعد جربتها بس هلكت اسناني
لأني مامتعوده عليها
وهاليومين طايحه بحلاوة القهوه كم حبه في اليوم لما تيجي الحاله
وتسلمين الغاليه
والله قبل مانفعني شي
بس الحين بعد ماشكيت للغاليات همي
اشوفني كني باديه اتعدل
وسالفة العلكه بعد جربتها بس هلكت اسناني
لأني مامتعوده عليها
وهاليومين طايحه بحلاوة القهوه كم حبه في اليوم لما تيجي الحاله
وتسلمين الغاليه
شيم***
•
غاليتي ... فلونه
تسلمين على النصيحه
بس صدقيني مب جوع
لو جوع كان مقدور عليه
ومثل ما قلتي الجزر وايد زين و مركزه عليه هالفتره
ويارب اصمد طافو يومين الله يعين على الباقي
تسلمين على النصيحه
بس صدقيني مب جوع
لو جوع كان مقدور عليه
ومثل ما قلتي الجزر وايد زين و مركزه عليه هالفتره
ويارب اصمد طافو يومين الله يعين على الباقي
انا مثلك يا شيم*** قبل شهرين كان عندي اراده حديد اسبوعين بس و اختفت الاراده استناها ترجع :27:
الصفحة الأخيرة
وعيوني حاولي تعلكين علك لانه يلهي عن الاكل
وااللله يعينك ويساعدك على الرجيم
:24: :24: