الاستراحات _ هل هي بؤرة صراع في الحياة الزوجية _ !!

زكيه حلو الموضوع من جد يستاهل النقاش لانها صارت موضه هالاستراحات...بس مقدمتك فكرتني ببرنامج الاتجاه المعاكس كانه فيصل اللي يقدمه:33: هههههههههههههههه

عموما من ناحية الاستراحه فانا اعتقد انها بمثابة طبينه للزوجه ولكن بدون عقد زواج...ولكن هذا في حاله وحده اذا كانت كل يوم وهذا للاسف حال الكثير من الازواج...اما اذا كانت يوم اويومين بالاسبوع معقوله يعني من حقه يرفه عن نفسه ...اما اذا كل يوم يروح يقضي السهر ه برى ويترك المسكينه تغني ياليل مااطولك ..فلا والف لا اصلا الدين مايرضى بكذا لان الوحده اتزوجت عشان تلاقي احد يونسها ويسهر معاها ويلاغيها ويدلعها مو بس يجي البيت اذا قرصه الجوع ويبغى ياكل ولا اذا يبغى ينام هذه مي حياه...

اما بالنسبه لان عزاب الاستراحات يوقعون بين الازواج وزوجاتهم ....فهذا صحيح لكن اريد ان ادخل بعض التصحيح على الجمله وهي ان ا ازواج الاستراحات هم من يوقعون بين الازواج وليس العزاب...فعلا هذا شيء واقع وحقيقه رايتها في كثير من البيوت التي اعرفها فكم من رجل حولته سهرات الاستراحات الى شخص اخر لاتعرف زوجته عنه شيئا..
والعيب ليس في الاسترحات بل في كثرة السهر فيها والمثل يقول من عاشر القوم اربعين يوم صار منهم...

اخيرا اعتبر الاستراحه زيها زي اي شي مزدوج الحدين اي انها قد تكون ضروريه لتغير جو البيت والخروج من الروتين الذي يبعث الملل..وفي نفس الوقت كل شي يزيد عن حده ينقلب ضده فالاكثار من السهر فيها ليليا واهمال الزوجه والبيت يؤدي الى مشاكل لاتحمد عقباها وللاسف ان كثير من الازواج يجهلها او يتجاهلها...

بصراحة الموضوع وايد حلو .....

بالنسبة لي انا ماصارلي مدة متزوجة يعني شووووووووووية اقل من سنة ورايي هو كما يلي ....

بما اني توني متزوجة في البداية كنت اتضايق لما زوجي يطلع عني طول اليوم ويخليني بالبيت بروحي واظل زعلانة ومبوزة وهاذي حالتي على طول لكن لاحظت انه هو بعد قام يتضايق مني ولما يقعد طول اليوم ويهه بويهي يدقق على كل شي وهذا ليش جذي وهذا ليش مكانه هني ويتدخل في غير اختصاصته :) .... هذا غير انه يمسكلي كل كلمة اقولها ويحولها لموضوع زعل او نقاش الى ان تعبت نفسيتي ونفسيته ....

قمت اتبع سياية ثانية واتفقنا عليها .... وهي انه يطلع اوكي يروح لربعه اوكي بس اول شرط انه ما يتأخر يعني بوقت معين يكون بالبيت وثاني شرط اني لو احتجت شي لي او للبيت انه يوديني مكان مثلا او بعدين لو انشالله الله رزقنا بعيال لو احتاجوا العيال شي او لو بغيت اطلع معاه على طووووول يوافق ما يتعذرلي بربعه بهالطريقة اهو مرتاح وانا مرتاحة .......

ولما اكون بالبيت وهو طالع ابدا اهتم بروحي شعري بشرتي ..... اشتغل بالبيت او بالمطبخ .... لو خلص الشغل اقعد على النت او التلفزيون او اسوي وحدة من هواياتي وهي والحمدلله تقضي علي الوقت .... ولما يرجع اكون مشتاقتله ومشتاقلي وفي كلام وايد نقوله لبعض فما نحس بالملل واثنيناتنا راضين .....

اللي ابي اقوله ان العدل مطلوب يعني يطلع ويستانس اوكي بس هم انتي لج حقوق ما يطغى جانب على الثاني لو مأمن لج كل حقوقج خليه يروح لربعه لين يشبع بيردلج نفسيته احسن وما عنده وقت للنجرة والزعل اصلا لأنه بيكون فاقدج ومشتاقلج .....

اختى رحيل شكرا للمداخلة والتعليق
رفوف فعلا اللى اوله شرط اخرة نور

اختي زكيه موضوعك كثير حلو ونقاشه يبرد على قلبي لان قلبي منفقع من الاستراحات والداريات و.....الخ

اختي رحيل العمر والله انك روعه في تعليقك صدقتي كانها فيصل القاسمي ., وبالنسبه لكلامك كثير واقعي وحلو لان فعلا هم محتاجين يروحون عن نفسهم بس مو كل يووووم عطيناهم وجه ههههههه

اختي رفوف صدقتي ان التفاهم بين الزوجين هو اهم اسباب الموده وطول ما كل شخص يعطي الثاني حقه ماراح يختلفون على شئ وكل واحد وده سعادة الثاني باي شكل يختاره الجانب الاخر (ارجوا انكم فهمتوني) يمكن كلامي اوزخستاني شوي مو مفهوم هههههههه

الصراحه ماشاء الله عليكم مابقاء شئ اقوله قلت اعلق بس

اخر شئ ودي اقوله ان الرجال اذا ماهونوا وراعوا الله في زوجاتهم ترى احنا بعد بنحط لنا استراحات ونحرهم وش رايكم متحمسه واجد انا
لاتصدقون عاد

لكم مني الف تحيه وشكر
ودمتم سالمين

اختى بينار والله ماعرف فيصل القاسمى ولا بصل الفاتحى ولا عمرى شاهدت برنامجه لانى بفضل الله ماعندى دش
شكرا اختى والحمد لله ان قلبك برد شوى ودمتى