الاستراحات والجمعات صارت نفاق..

السلام عليكم جتني رسالة واتس اب لمست فيها كلام واقعي
حبيت انقلها لكم وأتمنى تتناقلونها بينكم لعل الله يهدي بها مجتمع..،
راح أنقلها مثل ماهي...







اخواتي اخواتي احبتي رسالة من الأعماق أهديها لكم...
في قرابة العشر سنوات الأخيرة تغير الحال
ما اتكلم عن الدين لان كل شخص مسؤول عن نفسه ويعرف الصح من الغلط الحلال بين والحرام بين..

أتكلم عن الأنفس الي ضاقت! الروح الي تغيرت
الجمعات صارت تقضية واجب ومن غير رغبه أيضا
صارو الناس أحزاب !! أنتي الي تقرين لك نصيب من كلامي ترى أنتي كذا والموضوع عندك عادي وما كأن هذي مشكله!!
صارو يجتمعون وأتكلم عن العنصر النسائي خاصة...
الاجتماع محمل ب النفاق والضحك الي مو طالع من القلب
صار ب الوجه غير وداخل القلب غير أنتي أمس تتكلمين عنها!!
واليوم تضحكين في وجهها نسيتي أن الله يشوفك والملائكة جالسه تكتب.،أصبحنا ننقل حقدنا وحسدنا لبناتنا حتى البنات صارو أحزاب!! لية وين تربيتك لها صارت الان جمعة الخالات والعمات سيئة الا من رحم ربي .. الاجتماع يكون بمبلغ ومع ذالك الانفس ماتتقبل النفاااااق علنآ صار لما ينقص لو ريال خلاص ماراح نجي المره الثانيه طيب تأكدي يا أختي يمكن طلبو حاجة زياده او انتي ما حسبتي زين...سبحان الله تبون الاجتمعات من غير ماتدفعون وتبون السعادة وقلوبكم مو خالية راح تقولين بقرارة نفسك أنا ماعلي من أحد أنا غير لا حبيبتي شوفي مجتمعك واحكمي اذا متفكك ف انتي معهم لان اذا مو عاجبك تتكلمين ..
أصبحنا نقول نخاف نتكلم فلأنه تزعل لا اساسا فلأنه زعلانه!! لان مافي توضيح للمواضيع مافيه اعتذارات وصراحه تمشون المواضيع والقلب جالس يجمع!!! إذا أختك نادت أختها وإنتي لا وش المشكله مو معناته عندهم سر! او يتكلمون فيك لا ! هي حبت تناديها والجايه انتي .. الي نزعل عليه الأحزاب تحصلين ٦ او٥ اخوات ٣ يجتمعون و٢ لا ٤ وو١ لا ليش هذي أختكم ينكسر خاطرها لما تعرف بجمعتكم والان برامج التواصل ماتقصر!!
ليش الطلعه الجماعيه صارت بتخطيط مسبق بشهر! ومشاورات وممكن فيه وممكن لا! اذا انتو كثير يتحدد ٣ ايّام تأخذون الانسب الي تقدر تجي اهلًا وسهلا الي مو جايه المرات الثانيه .. اذا ماعندها اختك إمكانية هذي المره يدفع عنها احد والمبلغ بيرجع بدون منه وعلم الجميع الأهم الجمعه مع بعض ..
أصبحتو تناظرون خطوات الشخص وحركاته حتى العفويه منها تفسر بموضوع ثاني أصبح سؤال الأخت عن أختها تدخل بشؤونها!! مع آن الأخت هي الملاذ أصبحت الأخت لما تطلب شنطة او جزمه من اختها تستخدمها تنحط ورآها علامات تعجب!!! ليه هذي اختها طيب اذا ماطلبت تطلب من مين! أصبحت القروبات تجمعنا بس المقاطع وتهاني المناسبات أما سؤال وسؤالف عادية هذي مستحيل!!! الي ضايع فيها البنات بنات الاخوات صارو مايدرون هم مع امهم او بنات خالاتهم وعماتهم .. بدل الوناسه تحصل أمها تحكي في فلأنه وخالتها تحكي في فلانه من يوم تروح الأخت هذي يبدون يتكلمون فيها وفِي بناتها ومايدرون يمكن أخر لقاء معها يمكن تموت ماشافوها... يا اخواتي الدنيا فانيه بدل نتحسف اذا صارو تحت التراب خلينا على الأقل نحسن العلاقات قبلها صار الزعل على أتفه شي ممكن حتى ليش ماتشيل وانا اشيل ليش ماتغسل وانا اغسل يمكن نقطه سخيفه مثل هذي تقطعهم سنوات صارحيهم قولي الاجتمعات معروفه البنات هم الي يغسلون وينظفون الطبخ وغيره على الكبار تعاون سوى والأمور تمشي ...الاستراحات بدل ماتكون سعاده صارت قضاء واجب وحزب موجود وحزب لا!
صارت الأخت لما تنصح اختها بلبس بنتها معناته تدخل وليه ومالها علاقه وماتشوف نفسها ! خذوها بقلب طيب وقولو جزاك الله خير والله يعينا ويساعدنا ويهدينا وبس..
بدل مانروح للام والأب نبسطهم صايرين تجون عشان بعض وتحصلين الام والأب بجهه لا يسولفون معهم ولا شي واذا سالتيههم قالو البر والبر الحمدلله احنى نبر!!! طيب سولفي معها راح ترجعين بيتك وتضل بروحها تنتظر جيتكم لأكن من تجون تجتمعون بنفس الغرفه معها لأكن تسولفون مع بعض وهي تطالعكم..اي سالفه لو ترتيب بيتك لو طلعه طلعتيها ترى مايفرق اهم شي سالفه تحسك جايه تسعدينها تذكري بناتك كذا طال الزمن اوقصًر..
ماعاد فيه جمعات وسعة صدر
اصبحو يعتذرون بضيق البيوت مع أن البيوت الان أكبر والغرف اكثر فرق الزمان وبدل البيوت ماتجمع مثل زمان وهي كلها غرفتين صارت تفرق ! الاثاث مايليق ،البيت ماياخذ ،تعب ،
راح نموت ياعالم والبيوت مسكره ماراح تجي معنا راح نموت ونحاسب على الكلام الي قلناه والظلم راح نموت ونفقد مجلس أختنا الي نبذنها وتكلمنا فيها راح نموت خلونا نموت وقلوبنا على بعض كل وحده شايله بقلبها ..... أتمنى تقرونه بقلوبكم مو بعيونكم فقط

تحيتي أم ريااااااااان.....