الاستغفار ثم الاستغفار ثم الاستغفار

حبيباتي اليوم جيتكم بقصة او تجربة تخصني انا شخصيا .. وهي عن فوائد الاستغفار .. الله يجزاكم خير على هذا المنتدى الرائع اللي دلني على الاستغفار .. على قد مادرست وقريت كتب لكن ما مرت علي فوائد الاستغفار .. الله يوفق كل وحدة كتبت لنا موضوع جميل ومفيد في الدين والدنيا .. اللي صار معي اني قبل 6 شهور صارت لي مصيبة كبيرة (زوجي تزوج علي ) .. انا ما اشتكي لكم لأني قررت اني ما أشتكي الا لخالقي .. انا فقط ودي اشارككم بتجربتي يمكن وحدة فيكم تستفيد .. المهم .. كنت ايامها ماأعرف شئ عن الاستغفار وكانت حياتي الدينية عادية جدا .. مجرد الصلاة في وقتها وبعض الأحيان أفوت الفجر الله يغفرلي .. والقرآن مو دايم أقرأه .. والاذكار فين وفين .. ولمن صارت لي ذيك المصيبة فكرت مع نفسي في الحل وما وصلت لحل .. وفجأة وأنا قاعدة في بيت جدي سألت خالتي .. قلت لها عندك كتاب أدعية ؟ قالت لي ايوا قلت لها بالله جيبيه لي الأسبوع الجاي وبالفعلل جابته لي وصرت آخذ منه أدعية والحمد لله بعد فضل الله ثم الدعاء حسيت نفسي قدرت اصبر واصبر قلبي .. والحين قبل شهر تقريبا لمن دخلت المنتدى وشفت فوائد الاستغفار .. والحمد لله داومت عليه .. اتغيرت حياتي ولله الحمد شئ كثير .. من ضمن التغيرات اللي صارتلي .. اني صرت صبورة اكثر .. واحس صرت اكثر تحملا للمصائب اللي اشوفها قدام عيني .. حتى انا مستغربة من نفسي وأقول كيف كده ؟ هذا حبيبي اللي ما أتخيل ولا أقدر ان أحد ياخذه مني .. كيف انا صابرة الحمد لله .. لكن ارجع واتذكر انو بفضل الله عزوجل ثم بفضل الاستغفار .. حتى أمي وخالاتي وبنات خالي لاحظوا علي شئ .. قالولي ماشاء الله اش تستعملي لوجهك وجهك منور .. وانا اضحك في نفسي وعارفة النور من فين الحمد لله أولا وأخبرا .. انا أقول يمكن خير لي انه تزوج يمكن بهذه الطريقة يعرف قيمتي .. الله أعلم وحده علام الغيوب ..