الاشعة الصبغية للرحم

السلام عليكم و رحمة الله و بركاته

اول مشاركة لي بالمنتدى و القسم
الحمدلله اولاً و اخيراً على كل النعم ، الله يرزقني و إياكم الشكر و الرضآ و يجعلنا من المؤمنين الصالحين الصابرين
نبدأ القصة من زواج ٣ سنوات بعمر بعد ال ٣٠ ، و تأخر في الحمل مع العلم ان ما اكلت و لا حبة مانع 😬 لكن كان الاتفاق اول سنه بدون حمل و بعده نشوف موضوع الحمل ، بعد اول سنة زواج و استقرار و راحة بدينا نمشي بموضوع الحمل و المحاولات و اتوقع اي اخت جميلة متاخرة عن الحمل تعرف الموضوع كيف يكون ، عيادات نساء و ولادة تحاليل و فحص و كشف و بعدها منشطات مع العلم اني التبويض عندي كويس و بعدها ابرة تفجير و ووو و لكن رب العالمين له حكمته في كل شي الله يرضينا و يرضى علينا
اخر اجراء سويته الاسبوع هذا وهي اشعة صبغية للرحم ، طبعاً جيت بسويها قبل شهر او شهرين بدون تخدير و دخت و قالو لي ما ينفع فيه فيه اجراء تسوينها مع تخدير ، رجعت البيت و قلت ماراح أسويها الان النفسيه تعبت بريح اشوي و اخذ جرعة طاقه و أسويها ، حجزت موعد اشعة مع تخدير و اللهم لك الحمد كان الموضوع بسيط جداً مع التخدير ، صحيت من البنج و لا فيه اي الم لا يحتمل ، مجرد بس نغزات بسيطه جدا ، الدوره اشد الم منها و تنقيط بسيط و انتم بكرامه ، و الحمدلله طلعت النتيجه سليمه الرحم سليم و القنوات سليمه ، بس قالت لي الرحم مايل لليمين و على كلام الدكتورة هذي حالة مولوده انا فيها و العلم عند رب العالمين ، حاليا ابي اريح اشوي و ابدأ اركض بشوط التلقيح الخارجي .
اللي ابي اشاركم فيه هي مشاعر الراحة لما تفحصين و تكتشفين ان كل شي طبيعي بس ربي له حكمته ، سوي اللي عليك بالطريقة اللي تريحك و توكلي على رب العالمين ، و لا تتوقعين مافيه وحده مر عليها الموضوع من غير انكسار و بكاء و تعب نفسي و جسدي و وووو ، كل اللي بقوله بيجيك وقت بتسلمين امرك لرب العالمين لما تحسين ان صحتك تمام لكن ربي ما كتبه و لحكمه الله سبحانه ادرى به ، اللهم لك الحمد والشكر على كل النعم اللي رزقتنا به و حنا ما نستشعره و الله يزيدنا من فضله و نعمه و يرزقنا الرضا و الشكر 🤲🏻