الاطفال...والسلالم الكهربائية.....وامهات...لسنا بأمهات...!!!!!!!!!!!!!

السلام عليكم ورحمة الله وبركاته

يا اخواتي...ظاهرة اهمال الامهات لعيالهم في السوق
وتاركينهم يسرحون ويمرحون بالسوق وكأنه ملاهي دون ادنى مراقبة او اهتمام
واكبر خطر اشوفه هو السلم الكهربائي...اللي حاطينه الاطفال تسلاية لهم وببركات
من اهلهم وابتسامات...هذا يصعد... وهذا ينزل... وهذاك متعلق...وهم مايدرون
انه ممكن بلحظة تصير مأساة لا قدر الله..

قبل كم يوم واثناء وقت الصلاه شفت طفل قاعد يلعب مع اخوانه على السلم..
والشغاله تناظرهم...ومطنشه...الولد قام يتعلق من الجانب الخارجي للسلم
ولمن يصعد السلم فيه كم متر يقوم يطب...وهكذا...قلت للشغالة انتبهي تراه خطر عليه
لكن لاحياة لمن تنادي...استمر الطفل على هالحال...وشوي الا الولد تعلق ولا امداه يطب
لان السلم ارتفع فوق...والولد يصارخ...ويبكي...انا تسمرت رجليني وعجزت اتحرك
والشغاله تلفت وماهي عارفه وش تسوي...الولد صعد.. فوق...فوق.. وشوي ويطيح
ونعمه من ربي...جا الامن يركض وصعد الدرج بأقصى سرعة وعلى اخر درجة
رفع الولد قبل لا يطيح...صراحة موقف مرعب...لانه لو طاح الولد كان على طول وفاة
المشكلة يوم جت الام وقالولها الناس القصة...ما ابدت اي اهتمام او خوف (وقالت تستاهل
ليش ترقا الدرج) بالله عاد هذا تصرف..!!!!!والله لو يجيه شي كان تقعد طول عمرها مريضة

الموقف الثاني شاهدته قبل امس...نفس الاسلوب ونفس اللعب من الاطفال...بس هالمره
امهم جالسة تناظرهم....الولد يتعلق ويطب ويتعلق ويطب..وامه طايحتلها سواليف بالجوال
اشرت لها ان الولد خطر عليه...واسفهتني....اشرتلها مره ثانيه..واسفهتني...
ومن ربي جاء الامن وقالها: والله انه امس ولد طايح من فوق...قالت:...هاوشه الله يعافيك
عشان يخاف....!! طيب انتي وش دورك....؟؟؟؟؟؟


يا امهات حرام عليكم اطفالكم امانة بين ايديكم...ليش نخلف ونجيب عيال لاصرنا
ما نعطيهم ابسط حقوقهم وهو الحماية والرعاية...اطفال يموتون يوميا بسبب الاهمال
والامبالاة....لاتقولون اطفالنا اشقياء...وعجزنا عنهم...!!!اصلا نادر ماتلقين طفل هادي ومايتحرك
والطبيعي ان الطفل يحب اللعب والاستكشاف...بس هو مايدرك مدى الخطر اللي ممكن يصير له
يعني لو لا قدر الله اصاب ولدك مكروه وش يفيد الندم والتحسر...والا لازم يقع المكروه عشان نستاعض
وندرك اننا على خطأ....لكن بعد ايش...بعد ماراح طفل بريئ ماله ذنب الا انك امه..
انا كلامي هذا لبعض الامهات اللي يجيبون عيال وينسونهم....وكلمة ام حسافة عليهم..
والا فيه امهات ماشاء الله لاقوة الا بالله...مربيات اجيال بمعنى الكلمة..ويستاهلون بوسة على الراس
وتسلمون .