الاكل ثم الاكل ثم الاكل

بسم الله الرحمن الرحيم


السلام عليكم ورحمة الله وبركاته


أول مره أكتب في هذا القسم بس كنت في فترة من فترات حياتي اتابعه

مو عشاني لا ... علشان خواتي النحيفات

تتسائلوا وانتي ايش سمينه والا نحيفه أخليكم مع القصة


كان (لاحضوا كان) جسمي عادي مافي مشاكل لاني ضعيفه ولاني متينه كان أحلا اجسام قريباتي العصاقيل غالبا لاني مانعرف السمنه كاننا ميتات جوع والعياذ بالله

كنت محسوده على الجسم مع اني اشوف جسمي عادي بس بالنسبه للنحيفات حولي جسم جميل


بس بعد ما دخلت الكلية انقلبت النفسية فوق تحت

ما عاد أكل شيء ولا اشتهي الاكل نحفت نحفت نحفت حيل

يا بنات لدرجه اللي يشوفني يقول اعوذ بالله وشفيها هذي

حتى الضعيفات اللي اعرفهن يتحمدن ربهم انهن مو مثلي

ياليت وقفت على الجسم بس شعري طاح ما بقى الا اقل من القليل

حتى الزواجات انقطعت عنها لان اللبس ما عاد هو حلو علي مثل قبل

ما فكرت ابدا انهاتكون عين لاني كنت اضن ان نفسيته تعبت من القسم اللي داخلته

لين قريت اعراض العين وعرفت انها بسبت ذيك العين ما أخطت الله يهدي اللي كانت السبب

تسغربون العين تسوي كذا لا بالله أكثر

بنت عمي بعد كانت تحضر زواجات ويمدحونها وفجأة جاتها ثعلبه وطيحت كل شعرها وصار لها اكثر من 3 سنين تتعالج من مكان لمكان وما في فايده حتى مره رجع شعرها وبعدها رجع يطيح وتروح لرقاة يقرون عليها وللحين تعاني

تغير حالي حيل وصرت اعاني من كلامهم انتي كولي شيء اسمني

لدرجه انصدمت من ولد اختي الصغير يقول انتي صغيره يقصد ضعيفه

صغير شلون يلاحظ الا انه شيء موطبيعي

جد انا تخرجت بس كأني وحده بالمتوسط او الثانوي

اول ما عرفت عالم حواء كنت ادخل قسم السمنه والنحافه عشان خواتي وبنات خالتي وانا ماكان عندي مشاكل

وانقطعت عنه بعد فتره رجعت أقرا المواضيع طحت على موضوع بنت كانت من اللي يدورون السمنه وما شاء الله سمنت وكاتبه تجربتها تفيد البنات قلت الله يا الدينا صاروا البنات يعلموني

وتركت الانترنت ورجعت بس ما عاد ادخل القسم قلت برجع له وللاسف عشاني ابي احاول استعيد اقل شي كم كيلو عشان ارجع طبيعيه

وفي شي ملاحضته ان في احتلال من السمينات لدرجه قليل ما اشوف مواضيع للنحاف

اول كانت مواضيع النحاف والسمان متساويه والحين كان القسم للسمنه

احس ان النحاف استسلموا خخخخخ


نرجع لمحور حديثنا ومن خبرتي وتجارب قريباتي

ان السمنه تعتمد على الاكل ثم الاكل ثم الاكل

انا من النوعيه اللي ينفع معي الحلب مع حليب ساخن مرتين باليوم

عشان كذا قررت اني اسوي لنفس نظام أمشي عليه

بس استغربت من نظام 3000 سعره اسمع عنه وما ادري ايش ياليت اللي عندها علم تقولنا ايش هو

قبل ما ابدا بالنظام راح اقطع علاقتي بالانترنت والواتس اب وكل شاغل يشغلني عن نفسي والاكل

لان عندنا زواج ولد عمتي بعد شهر ولازم احضره .. قلت مستحل ابقى على هالحال لازم اسوي شيء

ماراح اعتمد على الخلطات بعتمد على الحلبه والاكل .. وجمعت كم خلطه زيادة الخير خيرين

بس الاكل والحلبه مع الحليب الاهم وودي اعرف عن نظام 3000 سعرة ياليت تفيدوني

وفي النهايه ياليت كلنا نتعود على ذكر اسم الله على الاشياء اللي تعجبنا عشان مانكون سبب في تعاسه انسان

حتى نفسك اذا شفتي فيك يعجبك اذكري اسم الله وادعي لنفسك بالبركه لان العين حق حتى لو ما انتي قاصدة عشان ما تحسدي نفسك ومافي مثل ذكر الله أجره عظيم


يارب ارجع احسن من قبل