الامارات الله يخليك................؟

مرحبا الغاليه..

أنا من دبي وبكلمج عن دبي..
بصراحه أكثر الناس اللي إيون الإمارات يقعدون في دبي..
لأنها مليانه أسواق ومناطق و..و...الخ الخ الخ..

أولاً..
الفنادق:
أفضل الأماكن للإقامة عندنا الفنادق لأن عددها يطغى على الشقق الفندقيه..
من الفنادق الفخمه والحلوه الموجوده في دبي:
1) فندق مينا السلام والقصر ودار المصيف ==> هذيل 3 فنادق جنب بعض بحوطه وحده..
هالفندق يتميز بمناظر جدًا خلابه.. وكل اللي يقعد فيه يستانس..
أنا قعدت فيه ليلتين بعد عرسي..
وهو أروع الفنادق الموجوده..

2) برج العرب ==> غالي بس حلو..
3) شيراتون ديره..
4) جميرا بيتش..
5) انتركونتينتال..
6) رحاب روتانا سويتس ==> هذا شقق فندقيه بس راقيه..
7) أبراج الإمارات..
8) شانغاريللا..
9) فيرمونت دبي..
10) دوست دبي..
11) غراند حياة..
12) حياة الرجنسي..

هذيل أمثله على فنادق ممكن تقعدون فيها..

بالنسبه للمناطق الموجوده..

عندج أولا المراكز التجارية أو مثل ما تسمونها المجمعات..

1) ديرة سيتي سنتر..
2) وافي سيتي..
3) مركز البستان..
4) مركز برجمان..
5) ابن بطوطة مول..
6) لامسي بلازا..
7) صحارى سنتر ==> موجود في الشارجه بس قريب من دبي.. في أول الشارجه..
8) الريف مول..
9) سينشري مول..
10) مركز حمرعين..
11) مدينة الغرير..
12) ميركاتو..

معظم المراكز التجاريه فيها أماكن مخصصه للعب الأطفال..

عندج الأسواق العامه..

سوق الوصل وسوق نايف.. ==> للأقمشه والملابس وأشياء كثييييييره..
مينا بازار ==> تلاقين عنده أقمشة فخمه مثل الحرير الهندي والأقمشه المطرزه للأعراس..
السوق الجديم في الشارجه فيه وايد أشياء..
والسوق الجديد في الشارجه أيضًا ممكن تلاقين عنده أشياء تتسوقين..
بس ترى هالأسواق ما فيها محلات ماركات لأنها أسواق جديمه..

أماكن للأطفال..
عندنا في الصيف مهرجان يسمونه: مفاجآت صيف دبي..
الأطفال عندهم وايد أماكن يروحون لها..
عندج مثلا مدينة مدهش والمدينه الثلجيه في المركز التجاري..
والمراكز التجاريه أغلبها فيها العديد من الفعاليات للأطفال..
مركز حمرعين ينظم كل يوم مسابقات للكبار وعلى ما أظن فيه للصغار ورش عمل..
بس أفضل مكان للأطفال مدينة مدهش الترفيهية لأن فيها الكثير من الفعاليات..
من ألعاب ومسابقات و..و..الخ..

بالنسبه للسياره..
أنا ماعرف شو تبين بالضبط..
تشترون سياره من هنيه ولا تأجرون..؟!
فيه مكاتب خاصه لتأجير السيارات عندنا في دبي..
وتلقون لهم أفرع في المطار أول ما توصلون..
يعني ممكن تأجرون سياره من الفرع الموجود في المطار وبعدين ترجعون السياره لهم يوم رجعتكم لبلادكم..

المطاعم :
أيطاليه
مطعم فرايديز
مطعم دفنشي في فندق المطار
في مطعم أيطالي حلو في مركز الواحة
طبعاً غير إلي في الفنادق
مطعم مصري غراند أبو شقرا / مطعم الجاد للخفايف
مطعم هندي قصر الهند / مطعم قيصر
مطاعم إيرانيه
مطعم البرز / مطعم صدف/ مطعم بارس / في مطعم نسيت اسمه لكن في مركز وربة
أكلات شعبيه : مطعم بن عيد الشعبي
المطعم مغربي : في فندق رويال ميراج

هذي بعض المعلومات اللي عندي..
إذا تذكرت أي شي ممكن أفيدج عنه بخبرج إن شالله..
وإذا عندج أي استفسار أنا حاضره..

تحياتي..

-..-*(( شمـــ وفا ـــعة ))*-..-

شكرا الف شكر والله يجزاك الجنه
اريد معرفت السواق ارخيصه وكذلك اريد تفصيل عباءه واريد معرفت اماكن الجلابيات الحلوه ورخيصه ؟؟؟؟؟؟؟؟؟؟؟؟؟؟؟؟

ويريد زوجي شراء سياره كابرس 2004 مستعمله استخد ام بسيط وسلامتك

حياك الله أختي الغالية وسط أهلك في بلدك و ان ما وسعتك الإمارات تشيلك عيوننا

أختي بالنسبة للعبايات سيري مركز أبوهيل (( اسألي سواق التكسي يدليك)) في أنواع و أشكاااااال من العبايات و أسعارها مناسبة و في متناول الجميع، و بعد في عندهم محلات للجلابيات القطن في الطابق السفلي (( 4 محلات تقريبا)) و لما تطلعين من المركز على الشارع الرئيسي في محل اسمه(( كشخة بلازا)) للجلابيات الجاهزة

××××××××××××××

سوق عكاظ فيه مختلف أنوااااااااع الجلابيات و بأسعار خيالية
××××××××××××

سوق نايف فيه أشياء حلوة و رخيصة و بجانبه السوق الكويتي يبيعون قطع و جلابيات
××××××××××××××××××××××

نصيحة مني لا تشترون سيارة مستعملة أحسن شي تأخذين سيارة من الوكالة ولا تتبهدلون بالسيارة المستعملة تراها عوار راس ... في حالة تعرفون صاحب السيارة المستعملة و واثقين منه 100% ما في مشكلة تاخذون مستعملة في هاي الحالة فقط لكن مستعملة من الوكالة ما أنصحكم فيها( اسأل مجرب و لا تسأل طبيب) :)


سامحينا اختي طولنا عليكم
الله يحفظكم و يسهل عليكم الامور.......... ان شاء الله تنبسطوا عندنا و إجازة سعيدة نتمناها لكم

الأخت حناين ما قصرت..
محلات العبي والشيل كثيره عندنا..
مركز أبوهيل بكبره كله محلات للعبي و الشيل..
وفي محلات ثانيه بعطيج أساميها..
1) ماي فير ليدي (سيدتي الجميلة) في أبراج الإمارات..
2) فيرست جويس موجود في كذا مركز (سيتي سنتر ، برجمان ، صحارى ، ....)
3) الحلوة..
4) سويت ليدي.. هذيل موجودين في الملا بلازا..
والحلوة لهم فرع في مركز البستان..
5) غواني.. في مركز البستان..
6) المتحجبة في حمرعين..
7) حبايب وحناين في مدينة الغرير..
8) ميد نايت في مركز صحارى..

الأسواق الرخيصه عندج الأسواق العامه مثل سوق نايف وسوق الوصل وسوق عكاظ في دبي..
السوق الجديم واليديد في الشارجه..
سوق مرشد في دبي..
وفي سوق اسمه سوق السور في الشارجه فيه محلات أقمشه واايد حلوه وبأسعار مناسبه..
عندهم أقمشه عاديه وأقمشة سهره وأعراس ((يعني فيها شغل))..

بالنسبه للجلابيات مثل ما قالت الأخت حناين سوق عكاظ..
وفي في مركز بوهيل محلات تحت عندهم جلابيات حلوة أنا آخذ من عندهم دايمًا..
وجلابياتهم فخمه مناسبه للبيت..
وأسعارهم بين 50 إلى 150 درهم..
سوق عكاظ أسعارهم أرخص..
يعني ممكن تلاقين جلابيات بـ 25 أو 30 وطالع..
سوق عكاظ موجود عند سوق الذهب في دبي.. وإذا تسألين أي حد بيدليج إياه..

بالنسبه للسيارات أنا ما عندي علم في هالمجال..
بس ما أنصحج تاخذين سياره مستعمله..
تاخذون سياره يديده من الوكاله أحسن أو تاخذون سياره مستعمله من وكالات السيارات المستعمله مش من عند أشخاص عاديين..


أي استفسار حاضرين له غناتي..

تحياتي لج..

-..-*(( شمـــ وفا ـــعة ))*-..-