الامساك المزمن .. الشرخ .. البواسير (تجربتي دعواتكم)

السلام عليكم
بدخل بالمووضوع على طول لان ادري ان فيه ناس كثير تعاني مماعانيت منه والصراحة ان مااحد يحس بهالمعاناة الا اللي جرب
الحمد لله كما ينبغي لجلال وجهه وعظيم سلطانة
يابنات نعمة ماحنا حاسين فيها بس مجرد انك تفقدها تعرف صدق فضل الله وقد ايش حنا مقصرين وكيف ان الانسان ضعيف من اتفه حاجة لو يفقد نعمة بسيطة.. يمكن مانحس فيها انك تقدر تروح الحمام الله يكرمكم تراها نعمة كبيره مايحس فيها الا فقدها
مشكلتي بدت من سنتين وانا اعاني من امساك دائم كنت اتمنى اني اقدر اروح وترجع لي هالنعمة اللي ماكنت ماقدرتها طبعا من جهلي كنت افكر انه طبيعي بس تطور معي الوضع صرت لما اروح ماقدر اموت من الالم وتطور الوضع ونزفت ..افكر مافيه اقوى من كذا الم حتى الولادة وانا ماجربت احس نفس الالم ويمكن المي اشد والله اني احس بقلة الحيله واقعد ابكي صار الاخراج فعلا عندي عقدة سويت كل شيء صرت اخاف من الاكل ولا اكل الا خضار واشرب موية بس مافاد معاي ولا تغير ولا شيء طبعا انا تفكيري ان هذي بواسير وشخصت نفسي بنفسي حتى كنت افكر انها سادة المجرى او المستقيم عشان كذا مااقدر

من سنتين وانا عايشة الالم وهم مايعلمه الا الله استخدمت ادوية البواسير من نيوهيلار وغيرها وغيرها ولا فادمعي شيء ماعدا تحاميل اسمها بروكتو جليفنول
تساعدني كثير بالاخراج وكنت لما اخلص احس عضلات جسمي كلها تألمني ومع كل هذا مافكرت اروح المستشفى من الخوف مره كانت مشكلتي ببدايتها تقريبا لدرجة بعد الاخراج نزفت وجتني حرارة ودخلت طواريء وتنويم احتاروا مايدرون ايش السبب ولا تكلمت عن المشكله
سويت الحجامة لكن ماسويتها الا مره ولا شفت اي نتائج في رمضان اللي فات كنت ابحث بالنت ولقيت مقطع يوتوب ولقيت خلطة لعلاج البواسير وطبقتها صراحة ارتحت عليها بس كانت تعطي مفعول التحاميل يعني كانت تساعدني اني اروح الحمام لكن ماحسيت اني تحسنت رغم اني مااستمريت الا شهر او يمكن اقل وماكان استخدامي لها يومي اذا تأزمت سويتها تساعدني عشان كذا مااقدر اقول اني مااستفدت وهذا المقطع

أقوى وأسرع علاج للبواسير والتجربة خير برهان أنشره…:

استخدمت السنا مكي وجاني صعوبة بالاخراج بالبداية وبعدها جاني اسهال لكن يومين ورجعت حليمة لعادتها القديمة
واستمرت المعناة والالم وكل شيء لدرجة اني كملت مره اسبوعين ماقدرت اروح الحمام
يوم من الايام وانا ابكي واحس بالم برحمي وعرفت ان الامساك يسبب هبوط ويسبب مشاكل صحيه مابيدي حيله التجأت لرب العالمين وبكيت بحرقة والله وربي يشهد اني جلست يوم كامل ابكي حتى ان الشيطان وسوسلي بامراض ثانيه وخفت .. بين هم اللي فيني وهم اني اكشف ويطلع معي مرض مستعصي وانا ساكته دعيت الله وتضرعتله انه يشفيني ويردلي عافيتي
من بكرا سبحان الله والله الله ساقلي العلاج من عنده اعطتني امي كوب حلبه دافية وبعدها نزل مني شيء ماكنت اتخيله اقول معقول كانت امعائي متحملة كل هذا ورحت مع اختي السوق ولقيت مطارة كبيرة سعتها ليتر ونص وشريتها وصرت اعبيها موية و اقرا فيها الرقيه الشرعيه واشربها اول مااصحى لما اخلصها وارجع اعبيها واقرا فيها واشربها يعني مرتين باليوم (3 لتر ماء) وسمعت رقية الصاعقه للحيدان وحطيت ببالي اني اتوكل على الله واستمر لما الله يشفيني من عنده في اليوم الثاني دخل خالي جايب عسل طبيعي جايه هديه واول ماشفته تذكرت حديث الرسول صلى الله عليه وسلم (صدق الله وكذب بطن أخيك،  اسقه عسلاً) وصرت اخذ منه ملعقه كبيرة على الريق وبعد كنت اشرب ملعقة زيت زيتون بعد كل وجبه بس الصراحة مااستمريت على الزيت والله الذي لا اله الا هو اني تعافيت وودعت الامساك والالم والدم من اول اسبوع كنت حجزت موعد قبل استخدامي وكان باقي اسبوع على الموعد لاني قلت خلاص ماعندي حل الا اروح والله كشفت علي الدكتورة وقالت مافي بواسير رغم اني كنت المسها واشوفها زي اللحمه نازلة قالتلي ان عندي شرخ بسالغريب انها اختفت و اني ماصرت احس بالم الشرخ ولا حكة ولا اي شيء صرفتلي كريم وتحاميل للشرخ اسمها ANUORT.HC
وقالت تستعملينها اسبوعين بس لانها تحتوي على كرتزون وحبيبات نورما كول الياف للامساك والله وربي يشهد ماابالغ اذا قلت مااستخدمته الا 3 او اربع مرات لاني مااحس بشيء
بنات حبيبات نورماكول عادي تستخدمينها كم مره باليوم لانها تعتبر ملين زي الالياف الطبيعيه وماتسبب تعود القولون عليها تمنيت اني عرفتها قبل لكن الحمد لله اللي عافاني من الامساك احيانا اخذها احتياط بس خصوصا اذا كان اكلي كله ناشف واخاف ترجع المشكله لكني اكذب صراحة لو اقول اني مستمرة عليها

دعواتكم ان الله يتمم علي العافيه ويشفي كل من يعاني يارب