الام النرجسية المتعبة

السلام عليكم ورحمه الله وبركاته
اولاً موضوعي هذا فقط لمجرد الفضفضه ولاني اعتبركم مثل خواتي وابي الكلمه الحلوه الي تطبطب علي ..
ثانيا الله يخلي لكم امهاتكم ويرحم الميت منهم رجاءاً الي ما تثقفت حول اضطراب النرجسية النفسي لا تجي وتدرعم وتتكلم ..

ندخل في صلب الموضوع الا وهو " معاناتي مع امي النرجسية " الي اكتشفت فعلا انها نرجسية من وقت قريب جداً للاسف كانت تتلاعب فيني بخباثه شديدة و شي على مستوى رفيع ماكنت افهمه ببدا اول شي بستغلال عاطفتي و جعلي دايماً مخطئه مهما كان ومهما صار هي الصح وانا الخطا مرات حتى والله ماستوعب المشكله هي ايش نكون في نقاش بسيط وتكون الحجه معاي وانا الي على حق فجاءة ينقلب الموضوع ضدي ! وتروح تبكي وانا اطلع الغلطانه وانا المطلوب اعتذر دايما تحسسني بشعور الذنب اتجاها والتقصير مهما سويت ومهما فعلت طبعا شعور سيئ جدا جدا ..
هذا غير الذكريات السيئه في طفولتي الضرب والتنمر وهدم الشخصية وانتي الناس يحبونك عشاني انتي صديقاتك يستغلونك لانك غبيه انتي محد يحبك وووووو ورب العزه والجلال عمرها عمرها في حياتها ما مدحتني او قالت لي كلمه حلوه حتى يوم زواجي المصوره تقرا علي الاذكار وهي تقول اووه يلا بس امشي تخيلوا ؟ و زواجي برضوا اهل زوجي خطبوني عشانها ولا انا ما استحق وغير انها فجاءة بتموت ولا تبيني احمل تقول تو الناس تو الناس لدرجه كل شهر تسالني تتاكد جتك الدوره ؟ ومره ابوي كلم زوجي قاله يا ابو فلان مناديه ب اسم ابوه نطت في حلقه وقالت ماتدري يمكن تجيب بنت تجيب ولد على طول ؟ لاحول ولا قوه الا بالله
غير الاستهزاء فيني امام الناس وتاخذني محتوى وتطرح اموري الشخصيه وتخليها موضوع لنقاش المترديه والنطيحه يتكلمون في اموري الشخصيه لا ويعطون رايهم بعد مره يضحك ويبكي في نفس الوقت
غير انها دايما تحطنا سبب في تعاستها انا واخواني تقول بسببكم ما انبسطت كنتو صغار مزعجين ما خليتوني ارتاح بسببكم ما انبسطت مع ابوكم بس جالسه امسكم قلت لها مره ليش جبتينا طيب دامنا مزعجين ؟ تخيلوا ردها كان بكل بساطه عشان مايقولون عني عاقر صدمه صح ؟ على فكرة يوم كنا صغار كل واحد في اخواني يتذكر الناني حقته وذكرياته معاها اكثر من امي تخيلوا ؟ يعني مثلا اختي البكر اول فرحه المفروض لها ذكريات مع امي صح ؟ لا تخيلوا اول يوم لها بالمدرسه كان مع الناني وهي ولا على بالها ودايما تحب السلطه والتحكم
ودايما تذكر نفسها وذكرايتها وهي صغيره وافكارها وسوالفها لما كانت صغيره واهلها و كل شي له علاقه فيها مستعده اسمعه لكم من كثر ماحفظته لكن حنا لا احد منا تتذكر له شي برضوا لا !
وتحب تصتغر نفسها تدرون لما تزوجت انا واختي بغت تموت الا تبي تحمل ؟ تخيلوا وهي في الخمسين ؟ مو حبا للاطفال لا هي اصلا تكرهنا وتكره سوالفنا لما كنا صغار وقلت لكم انها تحسسننا ان حتا كنا عبئ ثقيل جدا عليها بس تبي تثبت انو انا لسى صغيرا ومتاكده لو تحمل وتجيب نونو بترميه زي اخواني الصغار كنت انا واختي الكبيره والناني الي نهتم فيهم
ودايما كل الناس يحبونها وتتكلم عن نفسها كثير ودايما هي الضحيه المسكينه وووووو دايما هي محور الكون
اصلا يوم تزوجت ماساعدني بالجهاز و النصايح الا اختي ولا هي مافكرت تشوفني ولا تعطيني خبر
ولما اكلمها عن مشكله حصلت لي لازم تذكر مشكله مشابهه صارت لها وكيف هي صارت البطله و تنسى موضوعي دايما هي المهمه ونحن اتباعها حبها مشروط ضمن ايطار معين اذا ما خضعتي للاومرها وطلباتها عمرها ماراح تحبك بلعكس تحطك عبره وتقول شوفوا الي مايطيعيني كذا يصير فيه عشان ترهب باقي القطيع " اخواني "
مره ما انسى كيف استهزئت في زوجي قدام صديقتي استهزاء جارح جذا تقول شوفي كذا كان يمشي وتقلد مشيته وتستهزء في كلامه عشان تضحكها علي ولما زعلت جتني وقالت عشان العين ! لان صديقتي هذي ماتزوجت
غير انها حاولت كذا مره تفرق بيني وبين اختي ليش؟ بلا هدف كذا فرق تسد مابي خوات ملمين يحبون بعض ليش ؟ حبوني انا انا الام

غير المنه والتمنن والتفضل انا صرفت عليكم وانا عطيتكم وهي مالها وظيفه اصلا ابوي الي يصرف علينا يعطيها وهي تعطينا يعني مالك فضل في الصرف المادي و ووانا كبرتكم وانا سويت لكم قلت لكم هي لها الفضل في كل شي حتى زواجي هي لها الفضل فيه لان الناس يحبونها وخطبوا بنتها
على انها ترا كانت ترفض الي يخطبوني بدون علم مني ولما عرفت بالصدفه ان فيه كذا ناس خاطبيني وهي ترفض من راسها زعلت عليها وواجهتها قالت انا ابي لك الخير وابي الزين لك و الي رفضتهم مافيهم خير لك على كيفك ؟ انا الي اختار مو انتي ! و زوجي لو ما كانت الخظبه عن طريق الرجال ماكنت بتزوجه لانها كلعاده بترفضه بدون مايوصلني العلم اساسا
ولما تزوجت فجاءة حطتني تحت دائره الفضل مره اخرى تقول شوفي عمتك ترا مازوجت بناتها عشان مايكبرونها اما انا زوجتك وتفضلت عليك ولا كان بتخيسين عندي !
دايما انا الي ماعرف اختار ودايما اسراري الكل يدري فيها ودايما ماتسوي شي خير او كويس الا لما يكون فيه شهود عليه ولا غير كذا مسسسسستحيل ماقد سوت شي زين بيني وبينها !
دايما تحرش ابوي علينا تحريش قوي واذا عصب وجا يهزنا تدخلت فالموضوع عشان تطلع بالشكل البطولي الي واو شكرا ماما انقذتينا من ابوي وهي اصلا ساسا المشكلة .
مرة من المرات سالتني وانا اجهز لزواجي طبعا كنت اجهز لحالي انا واختي وهي ماتدري ولا يهمها 😂 وسالتتي قالت وش سويتي وكذا انا فرحت وعلمتها حجزت كذا سويت كذا اخترت كذا فجاءة رفعت سماعه الجوال وكلمت وحده وقامت تسولف معاها ان حنا سوينا لها كذا وحجزنا لها كذا نفس كلامي الي قلته قبل ثواني يعني تراني مهتمه في بنتي ! وهي مادرت عن هوا داري
واذا جيت اشتري الشي الغالي موب لازم لاتجيبين لا تسوين لا تحطين تكسير فرحه بس حتى الزفه لا تنزفين كذا بس رفض لكل شي تستخر حتى الفرحه فيك
تدرون لما رجعت من شهر العسل ماسولفت معاي ولا سالتني ولا شي ؟ وحتى لما اسولف على خواتي وهي تصير جالسه تغير الموضوع غيره هو ولا ايش ولا تسلط ولا ماتبي غيرها الي يسولف ؟
طبعا السوالف تكون عادية مثلا اقول رايي عن الدوله الفلانيه وان المكان الفلاني صار فيه حدث كذا بس يعني شي عادي بس برضوا ماتبي تعطيك الاتنشن في ولا شي !

والله العظيم مرات تجييني افكار هل انا اذا جبت اطفال راح اكون نرجسية كريهه واعقدهم في حياتهم واهز شخصياتهم زيها ؟؟؟