الانتظار القاتل

لما يعصرك الالم وانتي تستنين المجهول وش تسوين
خيالات تاخذك وخيالات تجيبك وش تسوين

انت محتاجه للجاي عشان يتحدد مصيرك بس ما تدرين متى بيجي
كل يوم متعلق قلبك في الموضوع هل بيوصل اليوم واعرف انا على اي ارض واقفه ولا لسا باستنى
كل ليله نومك مقطع كله احلام باقوم بكره والقاه واسوي واحط وتتخيلين كل سيناريو ممكن
وتنتهي حياتك في حلم اسود
وفي حلم وردي يصير كل شي انت فاهمته غلط كان قراءة خاطئه منك للاحداث وترجع حياتك ولا احلى منها
وحلم يودي وحلم يجيب

المشكله انه كل ما سالتي عنه قالوا بكره او بعده يجي و تقعدين تستنين بكره وما تحصلينه
بعدين يجي بعد بكره
وتقرب لحظة الحقيقه
وتخافين حتى تروحين تشيكين تشوفينه وصل ولا لأ.
الخوف يلعب بك يحطم اعصابك
الله يعين على اللي بألقاه
واللي بيصير من وراه
بس لازم اعرف انا وين
ما يصير اقعد بالحيرة اللي انا فيها
وتستجمعين شجاعتك وتروحين وكل جزء في جسمك يرتجف لحاله ما كانك جسد واحد حتى لحم الخدود ينتفض
بس تقوين نفسك تفتحين المكان اللي تستنين يكون فيه المطلوب عشان تبدين تحطين نفسك في مكانها الصحيح
تفتحينه وتلقين لسا ماجا شي تتحطمين بعد كل هذا العذاب النفسي ما في شي
وتسالين ثاني متى بيجي يقولون لك بكرة او بعده
وينعاد الموال ثاني وثالث ورابع
وانت لا على الارض ولا في السما
اكثر من اسبوع وهذا الحال
وفوق هذا وهذا لازم خلال هالفترة تعيشين حياتك طبيعه عشان ما ينتبه لك صاحب الموضوع ويخرب كل شي
كل دقيقه وانت قاعده معه تقاومين الرغبه الجارفه في انك تقولين كل اللي عندك ويصير اللي يصير
صراع مع نفسك عشان الصمت ورسم الابتسامه اللي لازم تبين حقيقيه مو باهته لان هالشخص يعرفك احسن من كل الناس
وانت للاسف خايبه اكتشفتي انك ما تعرفين شي عنه
و عشان كذا احتجت لطلب الموضوع اللي لكي حول اسبوعين تنتظرينه