الاولين كانو متواصلين مع بعضهم لكن ....

مسا الخير بنات ...
دايم اسمع ناس تمدح زمان اللاولين وانه زمن الوصل والمحبة ولايعرفون قطاعة
ولاهجر ولا شي ، بس هالكلام مبالغ فيه لاني شفت شخصيات فيها قساوة وطغيان غير طبيعي
من رجال ومن حريم ، ومررة استغرب كيف يتم الوصل مع هالقساوة الي اشوفها ... هل كانو مرتاحين مع هالناس
الي قاسية بتعاملها ؟؟ استغرب هالقساوة مع كونهم مشبعين نفسيا وعاطفيا والواحد مايحس بوحدة ابدا
ذاك الوقت ... اقصد انه حتى لو انولد الواحد قاسي بطبيعته لما يحتك بالناس ويلقا منهم اهتمام تخف هالقساوة فيه
ويلين شوي ، مع ذلك شفت شخصيات بشعة غير سوية نفسيا !!

من الرجال مثلا الي يتزوج بنت عمه مثلا ويوم يطلقها ياخذ بناتها وعيالها ولا تشوفهم سنين !!
وعندنا بالعايلة حرمتين اشكتو من هالشي ماشافو بناتهم الا بعد ماتزوجو ..
من الحريم تلاقون هالنوع من العجز الي اعمارهم حاليا بالخمسينات ولا الستينات تكون تبغى
تتسلط على غيرها وتبغاهم يسكتون عشانها كبيرة بالسن وتوصل مرحلة بالتسلط حد انها تستهدف بالذات الناس
الي اصغر منها بالعمر عشان عارفة انهم مايقدرون يردون عليها لكبر سنها ... شي ماتخيلت اعيش واشوفه !!

ودايم اتخيل ان الي زي هذي بوقتها وبزمانها ممكن تكون من وقت شبابها متسلطة على حريم اخوانها
بالكيد والدسايس ولاهن قادرات يقاطعونها لان بذاك الزمان مايعرفون القطاعة والوصل شي اجباري
فاحس اني ارحم الناس الي كانو مضطرين يواصلونها وينوبهم شرها اجبارا ، واحس اننا هالوقت رغم القطاعة
والجحود ارحم منهم ، لان هالوقت اذا تسلط عليك احد تقدرين تتحكمين بمتى تشوفينه وتقدرين تبعدين عنه
او حتى تقاطعينه تماما ..

وايضا هالوقت الناس توعت وفهمت ان هذي الشخصيات غير سوية نفسيا وممكن تحتاج علاج عكس اول
الي يتسلط محد يروح باله للطب النفسي او يفهم انه مو طبيعي ، يعتبرونها عصبية ولا طبع ولا من هالحجج الي ماتدخل العقل !!
عطوني الي لاحظتوه او سمعتو عنه ...