نفس المعاناه

أنا اسوي معها نفس الحركه اخليه بدون شحن فاضي او شحن قليل حدها وقت بسيط
بس يجي لها وقت تتعلق فيه
واللي يخوفني اليوتيوب لأنه يطلع كل شي
فما أدري وش الحل
أبي طريقه يحدد لها مغامرات معينه


او قنوات تلفزيون مفيده غير قناة براعم

الايباد مثله مثل غيره من الالعاب ... له فوايده للي يحسن استخدامه و له مضاره اللي المفروض نتجنبها ..
اولا بخصوص اليوتيوب كوني أم و مريت بمواقف مع اطفالي فالحل اني قمت فتحت أكاونت خاص لليوتيوب وسجلت فيه في الايباد لهم و اخترت القنوات اللي ابيهم يطالعونها و جذيه ما يفتح عندهم الا فيديوهات هالقناه ..
ثانيا .. لازم تسويين قيود .. تدخلين من الاعدادات على العام وبعدين على القيود .. وسوي قفل لكل الشغلات اللي مب زينه و للفيديوهات اختاري لعمر اربع سنوات مثلا و بندي الافلام و الاشياء الفاضحه و بندي الحذف و اضافه الاصدقاء و شوفي كل الخيارات اللي تبين تبندينها بنديها حتى تقدرين تبدين تصفح اليوتيوب لو ما تبينهم يدخلون عليه ابدا .. و طبعا ما اوصيج كلمه السر اتكون عندج وبس محد يعرفها غيرج علشان ما يلعبون فالخيارات ..
ثالثا .. احسني اختيار الالعاب اللي تنزلينها .. كل لعبة تنزلينها لاااااااااااااازم تفتحينها وتجربينها قبل لا تلعبها بنتج .. واذا شفتي فيها اي شي مب زين احذفيها على طول .. وحاولي تنزلي العاب تعليميه اكثر علشان تستفيد منها و بالعكس الالعاب التعليميه حلوه جدا ومسلية .. من الالعاب اللي حبيتها ( agnitus - عدنان معلم القرآن- أصحاب تيمو - حروف - toonia colorbook - baby flash cards - candy count - farm animal )
وفي وايد غيرها بس انتي سوي بحث عنهم و بتحصلين بالهبل و اهم شي لا تطول عليه وايد بس بعد لا تحرمينها منه لانه وسيله تعليم و هالاجيال كلها صارت تتعامل معاه و عندنا فالامارات دخل الايباد في التعليم في المدارس كحصص تعليميه و اللي ما عنده يعتبر جاهل فهالزمن حتى لو رفضناه لضرره ع العين لكن بامكانا نحمي عينهم منه بانه ما نخليهم يطولون عليه بالساعات ..

بالنسبة لعيالي من بدت الدراسة منعتهم يستخدموه حتى بالويكند بس اعطيهم اياه اذا مسافرين يتسلون فيه فالسيارة وولدي صغير عمره 3 سنوات مايدرس بس نفس النظام ماشي ع الاثنين ... ومجرد يطفي الشحن خلاص مايستخدموه ولا يهتموا فيه الا اذا انا حطيته لهم فالشحن ..ضروري انهم مايتعودوا عليه ... عشان نتجنب مضاره ..