أهل زوجي ..هم عائله شريك عمري ومصدر الاستقرار له والحنان والامان له هم منبع الدفء له والحب .. :39:هم مهمين له جدا بقدر اهتمامك باهلك,,, يعني أغلب المشاكل ام زوجي قالت اخت زوجي سوووت اخو زوجي سوى ليه كل هاذا بتشتكين بيسمع لك طيب وبعدين يعني ماتحسين فيه وش راح يكون احساسه يعني انتي زوجته بس ذولي اهله يعني كلكم غالين ,,,
طيب اسمعي لو رحتي انتي وزوجك لاهلك زياره وواحد من اخوانك سوى حركه لزوجك ضايقته وقدامك بعد وطلعتو ومن ركبتو السياره قام يهاوش شفتي اخوك اللي مايستحي وش سوى وش راح يكون شعورك ؟؟ صعب جدا لان هاذا زوجك وانتي شايفه الحق معاه لكن هاذا اخوك ماتقدرين تخسرينه ولاتقولين له شي :44:طيب وبعدين يوم قالك زوجك انحلت المشكله لا ابد يمكن زادت تعقيد تضايقتي وانتي حرمه مصدرالتفيس عندك الكلام كيف الزوج اللي معروف بحبه للكتمان كيف راح يكون وضعه ,,,
تعلمي التسامح حبي اهل زوجك اكسبيهم كوني كابنه لهم لاتوقفين عند كل كلمه يقولونها ولاعند كل تصرف يسوونه لاتفسرين كل شي انه ضدك وانهم مايحبونك ولايبونك ,,,
أعرف وحده من زميلاتي ذووووق جدا حبوبه مررره بشهادة الجميع مانجتمع الاهي تسولف وتضحك وتنكت المهم عزمتنا بزواج اخوها ورحنا لما جلسنا جابت ناس وجلستهم معنا مانعرفهم بس زميلتي ووجها متغير شييييين مره ومنقلبه ومنكتمه سكتنا وجلسنا ولين جت تطل علينا ماتكلم ذولي اللي معانا ابد بس هم ياحياتي ان شافوها انبسطو تحاكينا كلمتين وتروح الى درجه انها جت ونادتني انا وحده نرقص معاها مانادت احد من ذولي بس رقصنا ورجعنا المهم لما جلسنا سالتنا وحده منهم وهم ام 4 بنات قالت انتم صديقات فلانه قلنا ايه قالت انا اخت زوجها وهاذي امي وخواتي انا صرت كذا:32::32:يعني كيف وليه هي كذا معهم وقامو يسولفون معانا من احسن مايكون وروعه واخلاق ولاذكروها الابالخير المهم عقب الزواج وانا اكلم صديقتي قلت ياحليلهم حمولتك يهبلون انجنت وش قالوا وش سوووت خالتي عسى ماقالو فيني شي قلت بالعكس ماذكروك الا بالخير بس انتي ليه كذا معهم قالت احسن لايمونون قلت بس انتي عسل مع الناس كلهم وش معنى ذولي وهم اهم شي قالت والله انا ماشيه على كلام خواتي ان الحموله ماينعطووون وجه وخليك رسميه معاهم ومن هالكلام قلت طيب شوفي وجربي غيري شوي شوي بالتدريج وشوفي المهم بعد فتره تلاقينا قالت والله اني ماتوقعتهم كذا لانها توها ماكملت سنه متزوجه قالت عسل مررره حليوووين وغير هاذا كله احس زوجي
صاير مبسوط مني ومن علاقتي معهم .. يعني والله اهل الزوج مايبون شي اعرفي بس من وين تدخلين عليهم منه ا(ذكري ام وابو زوجك مره بالشهر بهديه) (خليك على اتصال دائم معهم مع الخوات )يعني الواحد وش ماخذ من الدنيا ,,
وفيه قصه عجيبه غريبه سمعتها من امي ( توفت وحده كبيره من المعارف ودقت وحده تخبر امي قالت فلانه توفت وهي اصلا تعبانه من زماان قالت لامي فلانه توفت امي انهبلت قالت مين الزعله قالت ايه انا لفت انتباهي اللقب الزعله المهم سكرت امي واسالها من توفى قالت فلانه ام فلان عرفتها انا قلت طيب ليش اللقب الزعله قالت لانها زعله على اهل زوجها من 20 سنه ماتكلمهم ولاتدخل بيتهم قلت ياساتر والسبب قالت ان ام الزوج عزمت عزيمه كبيره ببيتها لوحده عروس وقالت لولدها قل لمرتك تجي بس ولادقت عليها يوم جاء وقت العزيمه دخلت عليهم وتهاوشت هي وياهم وصارت مشكله طووويله عريضه ليه ماعزمتيني شخصيا شغاله انا ومن عقبها ماحد يكلم الثاني ) طيب توفت وبعدين الله يرحمها ماتسوى عليها الفلم اللي سوووته والقطاااعه باهل الزوج على سبب سخيف ,,,انا لو ادري ان فيه عزيمه والله لاروح لهم قبل بيوم واعاونهم واساعدهم ومعهم وحولهم خلاص انا بنتهم ماله داعي الرسميات والتكلف,,,
وخوات زوجي والله اني اشوف منهم شي وشويات وتنطيل كلام بس انا كذا:35: اطنش اعطي 99 عذر يعني مو طقاق هي يقولون اللي يبونه انا واثقه من نفسي ويتكلمون الين يشبعون وش بيضرني,,, والله واحد من عيالهم تملك مادريت الابعد يومين وانا بنفس يوم ملكه اخوي داقه على امه وابوه وعلمتهم والبنات مرسله لهم رسايل ليش اني اتوقع كل الناس نفس تربيتي وتفكيري واخلاقي الناس تختلف كل حسب تربيته,,
يعني اللي انتي تشوفينه وغلط يمكن الف واحد غيرك يشوفه صح واللي تشوفينه عيب الف واحد غيرك يشوفه عااادي والعكس يعني مو اشيل بقلبي مهما كان هم اهل زوجك وعمان عيالك يعني لاتوقع من الناس نفس طريقه تعاملي الناس والله اشكال الوان قال الله تعالى( وجعلناكم شعوبا وقبائل للتتعارفو ,,,,) يعني الناس تختلف الاطباع تختلف حتى اللهجات تختلف ولاوضاع فيه الغني الفقير المتوسط هاذا حااال الحموله والله يمكن حموله اختك رسميه مو معناه حمولتك تصير نسخه طبق الاصل منهم اومن اهلك الحين تصرفاتهم تعتبر جدا عااديه بس انتي يمكن ماتعودتي عليها ,,,
يعني قوي علاقاتك مع اهل زوجك خواته جماعته خلي ذكرهم حسن عند الناس اذكريهم بالخير تراهم والله بمقام امك وابوك واهلك شوفي زوجك قد ايش يتعب عشانك انتي وعيالك وشوفي كيف يعامل اهلك:39:
عجزانه تردي المعامله وغير كذا كل وحده بتعاملها مع اهل زوجها تعكس تربيه اهلها لها واخلاقها وصدقيني لو ماشافو اليوم يشوفون بكره ولو انكرو اليوم يعترفون بكره مافيه شي يضيع والله ,,
يعني مايستفاااد من كلامي :
1_ ام زوجك وابو زوجك تاج على راسك
2_الغلط وارد لكن سامحي وتعودي على التسامح
3-خوات زوجك اعتبريهم كخواتك ولهم في اخوهم زي مالك انتي فيه
4_تهاودا تحابوا
5_ الناس تختلف والاطباع والتفكير يختلف يعني بالعربي لاتشرهين على احد وسعي صدرك عليهم
وأخر شي واهم شي رضاء زوجك وصدقيني والله لو يشوف زوجك تعاملك متغير مع اهله للاحسن انك راح تكسبينه وبكل سهوله ..
واعتذر على الاطاله
