تحية من أرض الشام معطرة بالياسمين الشامي و العراتلي و الفل مني أنا إيثار الشام ممزوجة بسلااااااام حار معطر بالصلاة على النبي
حبيبات قلبي , أكلتنا اليوم هيي عبارة عننننننننننننننننننننننننن
( قنابل ) و موقوتة كمان
ئي , قنابل , لا تستغربوا , و هي صورة
طبعآ هي الصورة للتشويق و الترغيب , مو للتخويف
و هلأ , يا نور عيوني راح نفوت بالتفاصيل
اسم الأكلة : الباسمشكات أو ( يقال لها الخواصر) , هلأ , راح نعرف سبب هالاسم ,
المهم : بنجيب من عند اللحام شقف لحمة مسطحة , موجودة بفخد الخاروف , هي الشقف , أكيد اللحام بيعرفها , و هيي شقف لحمة هبرة و مغطاة بشوية دهن و لكن متل ما قلنا مسطحة , و في منها كمان بخواصر الخروف , و لكن بتكون دهنتها أكتر
نحن , هون جايبينها من يلي موجودة بفخد الخروف , متل مو شايفين بالصورة
هلأ , لازم نفصِّل هالشقف , بحيث فينا نطبقها على بعضها و نخيطها بالخيط , و هون الموضوع بدو شوية مهارة من ست البيت
بالصورة , في شقفة لحمة لحالا بالطرف ( يلي على شكل مثلث ) , راح نقطعها بالسكين و نرقع فيها شقفة تانية , و الشقفة يلي ضلت راح نحاول نطبقها على بعضها و نخيطها , و طبعآ الثقب يلي باين كمان راح نخيطو و نسدو , أو إذا بدك تخففي الدهنة , بتشيلي الدهنة يلي باينة بالسكين و و بتطبقي الشقف الباقية مع بعضها لتخيطيها , ( سامحوني كترت حكي )
شوفو هالصورة هون , كيف حطينا شقفة تحت , و فوقها شقفة أصغر , و مشان هيك طوينا الشقفة يلي تحت لتكمل المساحة يلي فوق , يعني ممكن الشقفة نطبقها و نخيطها على بعضها متل ما هيي أو نقصها بالسكين , نطبقها على شقفة تانية ( حسب الشقف يلي عنا )
و هلأ راح نخيط الأطراف على بعضها بالإبرة و الخيط متل مو شايفين
, و راح نترك فراغ ضغير , لندخل الحشوة
الحشوة ( متل حشوة المحاشي ) رز مصري منقوع و مغسول , و بنحط معه لحمة هبرة نية مفرومة , ما كترنا لحمة , لإنه بالأصل نحن عم نحشي لحمة , و عصفر و ملح و كمون , و بهار من يلي عندك للطبخ
هلأ , راح نحط حشوة , بس مارح نكتر , يعني قد نص الفراغ الموجود بقلب اللحمة المخيطة , ( لأن الرز راح يينفش عالطبخ , و اللحمة بتكش , يعني بتتقلص )
و بعدين راح نكمل خياطة لنسكر الخاصرة , و راح نغز راس السكين , شي تلت , أربع مرات على كلي الوجهين لنعمل تقوب ضغيرة جدآ , لدخول المرقة
و بنفس الطريقة , راح نكمل باقي الشقف
و بعدين , بنجيب طنجرة , حجمها مناسب للكمية يلي عنا , و بنحط الخواصر أو البساسمشكات بقلبها , و بنغمرها بالمي و بنشعل الغاز , و أكيد بالأول راح تطلع رغوة أو زفرة على وجه المي , بنشيلها بالكفكير , و بعدين بنحط بصلة و ورق غار , و رشة بهار خفيفة , و ملح
و بس تغلي الطنجرة , راح نوطي النار تحتها , و نستنى لتستوي ( ممكن تاخد وسطيآ ساعتين عالنار )
أول ما بتستوي منطفي تحت الطنجرة و منشيل الباسمشكات مباشرة , عالسفرة دغري
حطي القنبلة بالصحن , و امسكي الخيط من أوله و شديه على مهلك , راح يطلع بسهولة , و حاولي تحافظي على شكل الخاصرة متل ما هوي ( قولي بسم الله و اتوكلي على الله و دوووووووووقي )
و بالنسبة للطعم , شو بدي إحكي ؟؟؟؟
و الله طعمها خيااااااااااااال و بيجنن و كتييير طيب , و بدي إوصفه , و ما عم أعرف كيف , بصراحة , هالأكلة طيبة جدآ جدآ , و بدون مبالغة , من أطيب الأكلات الشامية , و الشوام بيعملوها برمضان , ممكن أول يوم , او لمن بدن ييعزموا العيلة و يعملوا لمة برمضان , فهالأكلة أكيد حاضرة على لمات العيلة .
جربوها و أكيد راح تدعولي
ملاحظة : زاد عنا شوية حشوة , فماما , طلعت من الفريزر , ورق عنب , و حشتو يبرق بالحشوة الزايدة , و طبختهن تاني يوم بمرقة الباسمشكات , و طلع اليبرق ( ورق العنب المحشي ) طعمته كتييييييييير طيبة و بيجنن
( بتمنى إني ما كون طولت عليكن , و إلكن مني أحلى تحية , أزكى سلااااااااااااام )